ગાંધીનગર : ગુજરાતના પાટનગર ગાંધીનગર ખાતે આવેલા મહાત્મા મંદિર એક્ઝિબિશન હોલમાં રમાઈ રહેલી પ્રતિષ્ઠિત ૨૦૨૬ એશિયન સિનિયર વેઇટલિફ્ટિંગ ચેમ્પિયનશિપના છઠ્ઠા દિવસે એશિયાના ટોચના વેટલિફ્ટરો વચ્ચે કાંટાની ટક્કર જોવા મળી હતી. પુરુષોની ૧૧૦ કિલોગ્રામ વજન કેટેગરીમાં ચીનના દિગ્ગજ ખેલાડી લિયુ હુઆનહુઆએ પોતાની તાકાતનું અદભુત પ્રદર્શન કરીને કુલ ૪૨૦ કિલોગ્રામ વજન ઉઠાવી ઓવરઓલ ચેમ્પિયન બનવાનું ગૌરવ પ્રાપ્ત કર્યું હતું. તેમણે સ્નેચ અને ટોટલ કેટેગરીમાં ગોલ્ડ મેડલ પોતાના નામે કરીને રમત પર પ્રભુત્વ જમાવ્યું હતું. જ્યારે ક્લીન એન્ડ જર્ક રાઉન્ડમાં ઇરાનના અલીરેઝા નસીરીએ ૨૩૧ કિલોગ્રામ વજન સફળતાપૂર્વક ઉઠાવીને પ્રથમ સ્થાન મેળવ્યું હતું.

ભારતના હરચરણસિંહે સાતમું સ્થાન મેળવી પ્રશંસા મેળવી:

આ પ્રતિષ્ઠિત આંતરરાષ્ટ્રીય મંચ પર ભારત તરફથી રમતા હરચરણસિંહે સ્થાનિક પ્રેક્ષકોના જોરદાર ઉત્સાહ વચ્ચે અત્યંત પ્રેરણાદાયી પ્રદર્શન કર્યું હતું. તેમણે સ્પર્ધામાં પોતાનો જીવ રેડી દઈને કુલ ૩૩૮ કિલોગ્રામ વજન ઉઠાવ્યું હતું અને ઓવરઓલ રેન્કિંગમાં સાતમું સ્થાન પ્રાપ્ત કર્યું હતું. મેડલ તાલિકાની વિગતવાર વાત કરીએ તો:

  સ્નેચ કેટેગરી: ચીનના લિયુ હુઆનહુઆએ ૧૯૦ કિલોગ્રામ સાથે ગોલ્ડ, તાઇપેઇના ચેન પો-જેને ૧૮૯ કિલોગ્રામ સાથે સિલ્વર અને તુર્કમેનિસ્તાનના દાવરાનબેક હસનબાયેવે ૧૮૮ કિલોગ્રામ સાથે બ્રોન્ઝ મેડલ જીત્યો હતો.

  ક્લીન એન્ડ જર્ક કેટેગરી: ઇરાનના અલીરેઝા નસીરીએ ૨૩૧ કિલોગ્રામ સાથે ગોલ્ડ, ચીનના લિયુ હુઆનહુઆએ ૨૩૦ કિલોગ્રામ સાથે સિલ્વર અને તાઇપેઇના ડોંગ બિંગ-ચેંગે ૨૧૫ કિલોગ્રામ સાથે બ્રોન્ઝ મેડલ મેળવ્યો હતો.

  ટોટલ (કુલ) કેટેગરી: ચીનના લિયુ હુઆનહુઆએ ૪૨૦ કિલોગ્રામ સાથે ગોલ્ડ, તુર્કમેનિસ્તાનના દાવરાનબેક હસનબાયેવે ૩૯૨ કિલોગ્રામ સાથે સિલ્વર અને તાઇપેઇના ડોંગ બિંગ-ચેંગે ૩૮૧ કિલોગ્રામના પ્રદર્શન સાથે બ્રોન્ઝ મેડલ પોતાના નામે કર્યો હતો.

આંતરરાષ્ટ્રીય મંચ પર એશિયન ખેલાડીઓની રમત પ્રશંસનીય:

ઇન્ડિયન વેઇટલિફ્ટિંગ ફેડરેશનના પ્રમુખ દ્વારા તમામ મેડલ વિજેતાઓ અને સહભાગી ખેલાડીઓને આંતરરાષ્ટ્રીય સ્તરે ઉચ્ચ કક્ષાની રમત અને ખેલદિલી દર્શાવવા બદલ હાર્દિક અભિનંદન પાઠવવામાં આવ્યા હતા. તેમણે જણાવ્યું કે આ સ્પર્ધા એશિયન વેઇટલિફ્ટિંગના વધતા જતા વૈશ્વિક સ્તર અને સ્પર્ધાત્મકતાને દર્શાવે છે. આ સાથે જ ફેડરેશને આંતરરાષ્ટ્રીય સ્તરે ભારતીય ખેલાડીઓની પ્રતિબદ્ધતા અને લડાયક મિજાજની પણ મુક્તમને પ્રશંસા કરી હતી.

આ સત્તાવાર અખબારી યાદી ઇન્ડિયન વેઇટલિફ્ટિંગ ફેડરેશનના ચીફ એક્ઝિક્યુટિવ ઓફિસર અશ્વાની કુમાર દ્વારા જારી કરવામાં આવી છે. તેમણે વધુમાં માહિતી આપતા જણાવ્યું છે કે પુરુષો માટેની ૧૧૦ કિલોગ્રામથી વધુ વજનની (+110 kg) કેટેગરીની આગામી સ્પર્ધા આજે બપોરે ૩:૦૦ વાગ્યે શરૂ થઈ ચૂકી છે અને તેના અંતિમ પરિણામો આજે સાંજ સુધીમાં જાહેર કરવામાં આવશે.