ચેન્નાઈ : ભારતના રમતગમતના ઈતિહાસમાં વધુ એક સુવર્ણ પ્રકરણ ઉમેરાયું છે. તમિલનાડુની ઉભરતી એથલીટ બરાનિકા એલાંગોવને આઈચી-નાગોયા એશિયન ગેમ્સમાં પોલ વોલ્ટ સ્પર્ધામાં બ્રોન્ઝ મેડલ જીતીને એક અભૂતપૂર્વ ઈતિહાસ રચી દીધો છે. આ સાથે જ તે એશિયન ગેમ્સના ઈતિહાસમાં પોલ વોલ્ટ (Pole Vault) ઇવેન્ટમાં ભારત માટે મેડલ જીતનારી સર્વપ્રથમ મહિલા ખેલાડી બની ગઈ છે. વર્ષોની સખત મહેનત અને સતત સુધારા બાદ બરાનિકાએ આંતરરાષ્ટ્રીય મંચ પર ભારતનો ઝંડો લહેરાવ્યો છે.

ડરથી શરૂ થયેલી સફર ઈતિહાસ સર્જન સુધી પહોંચી

તમિલનાડુના નાનકડા મયિલાદુથુરાઈ ગામમાં જન્મેલી બરાનિકાની આ સફર ખૂબ જ રોમાંચક રહી છે. ચેન્નાઈની પ્રખ્યાત એથિરાજ કોલેજ ફોર વિમેનમાં અભ્યાસ કરતી વખતે તેણે પોલ વોલ્ટ પસંદ કર્યું હતું, પરંતુ શરૂઆતમાં તે ખૂબ જ ગભરાતી હતી. લાંબો પોલ (વાંસ) સંભાળવો અને તેની સાથે બેલેન્સ બનાવવું તેના માટે મોટો પડકાર હતો. જોકે, કોચ મિલબર બર્ટ્રાન્ડ રસેલના કુશળ માર્ગદર્શન હેઠળ તેણે પોતાના ડર પર વિજય મેળવ્યો અને આ રમતમાં નિપુણતા મેળવીને અદ્ભુત આત્મવિશ્વાસ કેળવ્યો.

એક પછી એક નેશનલ રેકોર્ડ ધ્વસ્ત કર્યા

બરાનિકાએ જૂન ૨૦૨૨માં નેશનલ ઈન્ટર-સ્ટેટ એથ્લેટિક્સ ચેમ્પિયનશિપમાં ૪.૦૫ મીટરનો નવો સ્પર્ધા રેકોર્ડ બનાવીને રાષ્ટ્રીય સ્તરે પોતાની ઓળખ બનાવી હતી. વર્ષ ૨૦૨૬ તેના માટે વળાંકરૂપ સાબિત થયું. માર્ચ મહિનામાં ભુવનેશ્વર ખાતે યોજાયેલી નેશનલ ઈન્ડોર એથ્લેટિક્સ ચેમ્પિયનશિપમાં તેણે ૪.૨૨ મીટરનો કૂદકો મારીને ભારતીય રેકોર્ડ તોડ્યો હતો. ત્યારબાદ મે ૨૦૨૬માં જ પોતાના જ રેકોર્ડમાં વધુ સુધારો કરીને ૪.૨૩ મીટરની નવી ઊંચાઈ સર કરી હતી.

નાગોયામાં કઝાકિસ્તાનની ખેલાડી સાથે સંયુક્ત બ્રોન્ઝ જીત્યો

એશિયન ગેમ્સમાં પણ બરાનિકાએ પોતાનો શ્રેષ્ઠ પ્રદર્શન ચાલુ રાખ્યું હતું. તેણે ૪.૧૫ મીટરની ઊંચાઈ સફળતાપૂર્વક પાર કરી હતી. આ સ્પર્ધામાં કઝાકિસ્તાનની પોલિના ઈવાનોવા પણ ૪.૧૫ મીટર પર રહી હતી. નિયમો મુજબ 'કાઉન્ટબેક' ગણતરીમાં પણ બંને ખેલાડીઓ બરાબરી પર આવતાં બંનેને સંયુક્ત રીતે બ્રોન્ઝ મેડલ એનાયત કરવામાં આવ્યો હતો. કોલેજના સમયની અનિશ્ચિતતાથી શરૂ કરીને એશિયન ગેમ્સના વિજેતા મંચ સુધી પહોંચવાની બરાનિકાની આ સફર દેશના લાખો યુવા એથલીટો માટે પ્રેરણાસ્રોત બની ગઈ છે.