કોલકાતા, તા.૧૯: આઈપીએલ ફ્રેન્ચાઈઝી કોલકાતા નાઈટ રાઈડર્સ (KKR) એ દુર્ગા પૂજાના પાવન અવસર પર બંગાળના સમૃદ્ધ સાંસ્કૃતિક વારસાને આદર આપવા અને મહિલા સશક્તિકરણને વેગ આપવા માટે એક અનોખી પહેલ હાથ ધરી છે. નાઈટ રાઈડર્સે પરંપરાગત કળાને જીવંત રાખતી 'SHE Kantha' (શી કાંથા) સંસ્થા સાથે હાથ મિલાવીને કોલકાતાના ઐતિહાસિક ઈન્ડિયન મ્યુઝિયમ ખાતે ‘દેવી દુર્ગા: થ્રેડ્સ ઓફ ડિવાઈનિટી’ શીર્ષક હેઠળ એક વિશેષ અને આકર્ષક પ્રદર્શનનું આયોજન કર્યું હતું.

ઈતિહાસમાં પ્રથમ વખત કેન્દ્રીય સંસ્કૃતિ મંત્રાલયના સહયોગથી ઈન્ડિયન મ્યુઝિયમ પરિસરમાં દુર્ગા પૂજા પંડાલનું ભવ્ય આયોજન કરવામાં આવ્યું છે. શ્રીમતી અગ્નિમિત્રા પોલના હસ્તે ખુલ્લા મુકાયેલા આ પ્રદર્શનમાં બંગાળની ઓળખ સમાન ત્રણ બાબતો - દુર્ગા પૂજા, પરંપરાગત કાંથા ભરતકામ અને ઈન્ડિયન મ્યુઝિયમનો ત્રિવેણી સંગમ જોવા મળ્યો હતો. આ તકે વિશેષ ગેલેરીમાં 'SHE Kantha' ની ચાર દાયકાની અવિરત સફર અને કારીગર મહિલાઓની આકર્ષક કલાકૃતિઓ રજૂ કરવામાં આવી હતી.

આ આયોજન માત્ર એક સાંસ્કૃતિક ઉત્સવ ન બની રહેતાં મહિલાઓના જીવનમાં સકારાત્મક પરિવર્તન લાવવાનું માધ્યમ બન્યું છે. રમતગમતની લોકપ્રિયતા અને પ્રભાવનો ઉપયોગ કરીને વંચિત મહિલાઓની કુશળતાને વૈશ્વિક મંચ પૂરો પાડવાનો અને તેમના માટે ટકાઉ આજીવિકા ઊભી કરવાનો મુખ્ય આશય છે. KKR ના ‘સાહસી રાણી’ (Shahoshi Rani) પ્રોગ્રામ હેઠળ વંચિત સમુદાયની મહિલાઓને વ્યવસાયિક તાલીમ આપીને આત્મનિર્ભર બનાવવામાં આવી રહી છે.

KKR ના ચીફ માર્કેટિંગ ઓફિસર બિંદા ડેએ જણાવ્યું હતું કે, "બંગાળની માટી સાથે જોડાયેલી બ્રાન્ડ તરીકે અમારી સામાજિક જવાબદારી માત્ર ક્રિકેટના મેદાન સુધી મર્યાદિત નથી. કાંથા કારીગરો અને પોતાની મહેનતથી નવું ભવિષ્ય ઘડી રહેલી 'સાહસી રાણીઓ'ની પ્રતિભાને ઓળખ મળે અને તેઓ આર્થિક રીતે સ્વતંત્ર બને તે માટે અમે આ મંચ પૂરું પાડ્યું છે." ઉદ્ઘાટન પ્રસંગે કલકત્તા ફાઉન્ડેશનની મહિલાઓએ પરંપરાગત 'ધુનુચી નૃત્ય' પ્રસ્તુત કરીને મા દુર્ગાનું ભાવભીનું સ્વાગત કર્યું હતું.

પૂજાના પાવન પર્વ સપ્તમીના દિવસે KKR ના સ્ટાર ખેલાડીઓ રાહુલ ત્રિપાઠી અને સૌરભ દુબેએ ખાસ પંડાલની મુલાકાત લીધી હતી. તેમણે કાંથા કારીગર મહિલાઓ અને 'સાહસી રાણીઓ' સાથે પ્રત્યક્ષ સંવાદ સાધીને તેમના ઉત્સાહમાં વધારો કર્યો હતો. આ પ્રસંગે યોજાયેલા ‘KKR મેળા’માં ૧૦૦ થી વધુ કારીગરો, ફેન ક્લબના સભ્યો અને સ્થાનિક લોકો એકઠા થયા હતા, જ્યાં લાઈવ પ્રદર્શનો અને વર્કશોપનું સુંદર આયોજન કરાયું હતું.

સાંસ્કૃતિક વારસો, સામાજિક જોડાણ અને મહિલા સશક્તિકરણને એકતાના તાંતણે બાંધીને KKR અને SHE Kantha એ સાબિત કર્યું છે કે રમતગમતના ફ્રેન્ચાઈઝીની ઓળખ રમતથી પણ આગળ વધીને સમાજ માટે ઉપયોગી બની શકે છે. સ્થાનિક ઓળખની ઉજવણી અને સમાજના નબળા વર્ગોને પ્રોત્સાહન આપતી આ પહેલની સમગ્ર બંગાળમાં ભારે પ્રશંસા થઈ રહી છે.