અમદાવાદ:આઈપીએલ ૨૦૨૬ની સીઝનમાં અમદાવાદના નરેન્દ્ર મોદી સ્ટેડિયમ ખાતે રમાયેલી રોમાંચક મેચમાં રાજસ્થાન રોયલ્સે ગુજરાત ટાઈટન્સને ૬ રને પરાજય આપ્યો છે. સ્પિનર રવિ બિશ્નોઈની ઘાતક બોલિંગ અને બેટ્સમેનોના શાનદાર પ્રદર્શનના જોરે રાજસ્થાને આ જીત હાંસલ કરી છે. બીજી તરફ, ગુજરાત ટાઈટન્સ માટે આ સીઝનની શરૂઆત નબળી રહી છે, કારણ કે પંજાબ કિંગ્સ સામેની હાર બાદ આ તેમની સતત બીજી હાર છે. ગુજરાતના નિયમિત કેપ્ટન શુભમન ગિલ સ્નાયુઓના ખેંચાણને કારણે આ મેચમાં રમી શક્યા ન હતા, જેના કારણે ટીમની કમાન રાશિદ ખાને સંભાળી હતી.
રાજસ્થાનની બેટિંગ: જુરેલ અને જાયસવાલનો ઝંઝાવાત
ટોસ જીતીને પ્રથમ બેટિંગ કરવા ઉતરેલી રાજસ્થાન રોયલ્સની શરૂઆત ખૂબ જ મજબૂત રહી હતી. સલામી બેટ્સમેન યશસ્વી જાયસવાલ અને વૈભવ સૂર્યવંશીએ માત્ર ૩૮ બોલમાં ૭૦ રન જોડીને ટીમને મજબૂત પ્લેટફોર્મ પૂરું પાડ્યું હતું. સૂર્યવંશીએ ૧૮ બોલમાં ૫ ચોગ્ગા અને ૧ છગ્ગાની મદદથી ૩૧ રન બનાવ્યા હતા. ત્યારબાદ યશસ્વી જાયસવાલે જવાબદારી સંભાળી ૩૨ બોલમાં ૫ ચોગ્ગા અને ૩ છગ્ગાની મદદથી ૫૫ રન ફટકાર્યા હતા.
મેચમાં ત્રીજા નંબરે બેટિંગમાં પ્રમોટ કરાયેલા ધ્રુવ જુરેલે આક્રમકતા અને સંયમનું સુંદર મિશ્રણ બતાવ્યું હતું. જુરેલે ૪૨ બોલમાં ૫ છગ્ગા અને ૫ ચોગ્ગાની મદદથી ૭૫ રનની શાનદાર ઈનિંગ રમી હતી. આ જોરદાર બેટિંગના સહારે રાજસ્થાન રોયલ્સે ૨૦ ઓવરમાં ૬ વિકેટ ગુમાવી ૨૧૦ રનનો વિશાળ સ્કોર ઊભો કર્યો હતો અને ગુજરાત સામે ૨૧૧ રનનો લક્ષ્યાંક રાખ્યો હતો.
ગુજરાતની લડત અને રવિ બિશ્નોઈનો કહેર
લક્ષ્યનો પીછો કરવા ઉતરેલી ગુજરાત ટાઈટન્સ તરફથી ઓપનર સાઈ સુદર્શને ૪૪ બોલમાં ૭૩ રનની પ્રભાવશાળી ઈનિંગ રમી હતી. જોસ બટલરે પણ ૨૬ રનનું યોગદાન આપ્યું હતું. મેચના અંતિમ તબક્કે રાશિદ ખાને ૨૪ રન અને કગિસો રબાડાએ ૨૩ રન બનાવીને ટીમને જીતની નજીક લઈ જવાનો પ્રયાસ કર્યો હતો, પરંતુ તેઓ સફળ રહ્યા ન હતા.
રાજસ્થાન રોયલ્સ માટે રવિ બિશ્નોઈએ મેચ વિનિંગ બોલિંગ કરી હતી. તેણે ૪ ઓવરમાં ૪૧ રન આપીને મહત્વની ૪ વિકેટો ઝડપી હતી. બિશ્નોઈ ઉપરાંત નાન્દ્રે બર્ગર અને કેપ્ટન રિયાન પરાગને એક-એક સફળતા મળી હતી. અંતિમ ઓવરોમાં જોફ્રા આર્ચર અને તુષાર દેશપાંડેએ શાનદાર બોલિંગ કરીને મેચ રાજસ્થાનના પક્ષમાં કરી દીધી હતી.
અશોક શર્માની રફ્તાર અને રેકોર્ડ્સ
ગુજરાત ટાઈટન્સ માટે ભલે હાર થઈ હોય, પરંતુ યુવા ઝડપી બોલર અશોક શર્માએ પોતાની ગતિથી સૌને પ્રભાવિત કર્યા હતા. પોતાની બીજી જ આઈપીએલ મેચમાં તેણે ૧૫૪.૨ કિમી પ્રતિ કલાકની ઝડપે બોલિંગ કરી હતી. તેણે ૪ ઓવરમાં ૩૭ રન આપી ૧ વિકેટ ઝડપી હતી. આ ઉપરાંત, જાયસવાલ અને સૂર્યવંશીની જોડીએ ૧૨.૦૪ રન પ્રતિ ઓવરની ગતિએ રન બનાવીને આઈપીએલ ઈતિહાસની ત્રીજી સૌથી ઝડપી રનરેટ ધરાવતી જોડી તરીકે સ્થાન મેળવ્યું છે.