બેંગલુરુ: વિશ્વની સૌથી લોકપ્રિય ક્રિકેટ લીગ IPL (ઇન્ડિયન પ્રીમિયર લીગ) ની ૧૯મી આવૃત્તિનો પ્રારંભ હવે ગણતરીના દિવસોમાં થવા જઈ રહ્યો છે. BCCI એ સિઝનના પ્રથમ ૨૦ મેચોનું શેડ્યૂલ જાહેર કરતાની સાથે જ ક્રિકેટ ચાહકોમાં ભારે ઉત્સાહ જોવા મળી રહ્યો છે. આ સિઝનની પ્રથમ મેચ ૨૮ માર્ચે બેંગલુરુના ચિન્નાસ્વામી સ્ટેડિયમ ખાતે રમાશે, જેમાં ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB) અને સનરાઇઝર્સ હૈદરાબાદ સામસામે ટકરાશે.
ડિસેમ્બર ૨૦૨૫ માં અબુ ધાબી ખાતે યોજાયેલી મેગા હરાજીમાં ફ્રેન્ચાઇઝીઓએ પાણીની જેમ પૈસા વહાવ્યા હતા. ૧૦ ટીમોએ કુલ રૂ. ૨૧૫.૧૫ કરોડનો ખર્ચ કરીને પોતાની ટીમને મજબૂત બનાવી છે. જેમાં KKR એ કેમેરોન ગ્રીનને ૨૫.૨ કરોડમાં ખરીદીને ઈતિહાસ રચ્યો છે.
 
મુખ્ય ફેરફારો અને નવી જોડીઓ
આ વખતે હરાજીમાં અનેક મોટા ઉલટફેર જોવા મળ્યા છે. ચેન્નાઈ સુપર કિંગ્સ (CSK) એ અનુભવ અને યુવા પ્રતિભાનું સંતુલન જાળવ્યું છે, જેમાં રૂતુરાજ ગાયકવાડ ટીમની કમાન સંભાળશે અને સંજુ સેમસન જેવા દિગ્ગજો પણ પીળી જર્સીમાં જોવા મળશે. બીજી તરફ, લખનૌ સુપર જાયન્ટ્સે ઋષભ પંતને પોતાના કેપ્ટન તરીકે પસંદ કરીને રણનીતિમાં મોટો ફેરફાર કર્યો છે.
 
IPL 2026: તમામ ૧૦ ટીમો પર એક નજર
•    ચેન્નાઈ સુપર કિંગ્સ (CSK): રૂતુરાજ (c), એમ.એસ. ધોની, સંજુ સેમસન, શિવમ દુબે.
•    રોયલ ચેલેન્જર્સ બેંગલુરુ (RCB): રજત પાટીદાર (c), વિરાટ કોહલી, ફિલ સોલ્ટ, ભુવનેશ્વર કુમાર.
•    મુંબઈ ઈન્ડિયન્સ (MI): હાર્દિક પંડ્યા (c), રોહિત શર્મા, સૂર્યકુમાર યાદવ, જસપ્રિત બુમરાહ.
•    કોલકાતા નાઈટ રાઈડર્સ (KKR): રિન્કુ સિંહ, સુનીલ નારાયણ, કેમેરોન ગ્રીન, વરુણ ચક્રવર્તી.
•    ગુજરાત ટાઇટન્સ (GT): શુભમન ગિલ (c), જોસ બટલર, મોહમ્મદ સિરાજ, કાગીસો રબાડા.
•    દિલ્હી કેપિટલ્સ (DC): કેએલ રાહુલ, અક્ષર પટેલ, કુલદીપ યાદવ, મિચેલ સ્ટાર્ક.
•    રાજસ્થાન રોયલ્સ (RR): યશસ્વી જયસ્વાલ, રવીન્દ્ર જાડેજા, સેમ કરન, જોફ્રા આર્ચર.
•    સનરાઇઝર્સ હૈદરાબાદ (SRH): પેટ કમિન્સ (c), ટ્રેવિસ હેડ, અભિષેક શર્મા, ઈશાન કિશન.
•    પંજાબ કિંગ્સ (PBKS): શ્રેયસ અય્યર, અર્શદીપ સિંહ, યુઝવેન્દ્ર ચહલ, માર્કસ સ્ટોઈનિસ.
•    લખનૌ સુપર જાયન્ટ્સ (LSG): ઋષભ પંત (c), નિકોલસ પૂરન, મોહમ્મદ શમી, એઇડન માર્કરામ.
 
હરાજીના હીરો
આ સિઝનમાં અનકેપ્ડ ખેલાડીઓનો પણ દબદબો રહ્યો છે. CSK એ પ્રશાંત વીર અને કાર્તિક શર્માની જોડી પર ૧૪.૨૦ કરોડ રૂપિયા ખર્ચીને તેમને IPL ઈતિહાસના સૌથી મોંઘા અનકેપ્ડ ખેલાડી બનાવ્યા છે. હવે જોવાનું એ રહેશે કે આ કરોડોના ખેલાડીઓ મેદાન પર કેવું પ્રદર્શન કરે છે.
ટુર્નામેન્ટની શરૂઆત બેંગલુરુથી થશે, જેના કારણે સ્થાનિક ચાહકોમાં અત્યારથી જ ટિકિટો માટે પડાપડી શરૂ થઈ ગઈ છે. ૨૮ માર્ચની રાત્રે જ્યારે રોહિત, કોહલી અને ધોની જેવા દિગ્ગજો ફરી એકવાર મેદાનમાં ઉતરશે, ત્યારે આખું ભારત ક્રિકેટના જનૂનમાં ડૂબી જશે.