કાઠમંડુ:  વિશ્વભરના ક્રિકેટ ચાહકો જ્યારે T20 વર્લ્ડ કપના રોમાંચમાં ડૂબેલા છે, ત્યારે ઈરાન અને ઇઝરાયલ વચ્ચે ફાટી નીકળેલા યુદ્ધે ક્રિકેટના મેદાનમાં પણ ભયનો માહોલ પેદા કર્યો છે. ICC (ઇન્ટરનેશનલ ક્રિકેટ કાઉન્સિલ) એ સુરક્ષાના કારણોસર 10 થી 20 માર્ચ દરમિયાન નેપાળના કીર્તિપુરમાં રમાનારી મહત્વપૂર્ણ ત્રિકોણીય શ્રેણીને તાત્કાલિક અસરથી મુલતવી રાખવાનો નિર્ણય લીધો છે. આ શ્રેણી 2027 ના ODI વર્લ્ડ કપ ક્વોલિફાયરનો ભાગ હતી, જેમાં નેપાળ, ઓમાન અને UAE ની ટીમો આમને-સામને ટકરાવવાની હતી. મધ્ય પૂર્વમાં યુદ્ધની જ્વાળાઓ ફેલાતા ખેલાડીઓની સુરક્ષા સાથે કોઈ જોખમ ન લેવા માટે ક્રિકેટ એસોસિએશન ઓફ નેપાળે સોશિયલ મીડિયા પર આ દુખદ સમાચારની પુષ્ટિ કરી છે.

યુદ્ધની અસર માત્ર મેચો રદ થવા સુધી સીમિત નથી, પરંતુ ખેલાડીઓની અવરજવર પર પણ ભારે બ્રેક લાગી છે. મધ્ય પૂર્વના દેશોએ પોતાના હવાઈ ક્ષેત્ર (Airspace) બંધ કરી દીધા હોવાથી ઘણી આંતરરાષ્ટ્રીય ટીમો વિદેશમાં ફસાઈ ગઈ છે. T20 વર્લ્ડ કપ 2026 માંથી બહાર થયેલી વેસ્ટ ઈન્ડિઝની ટીમ 1 માર્ચથી ઘરે જવા માટે મથી રહી હતી, જે હવે માંડ 5 માર્ચે ચાર્ટર્ડ ફ્લાઈટ દ્વારા રવાના થઈ શકશે. આવી જ કપરી સ્થિતિ ઝિમ્બાબ્વેની ટીમની પણ છે. યુદ્ધને કારણે ફ્લાઈટ રૂટ ડાયવર્ટ કરવા પડ્યા છે અથવા રદ કરવા પડ્યા છે, જેનાથી ખેલાડીઓ અને સપોર્ટ સ્ટાફમાં ભારે ચિંતા જોવા મળી રહી છે.

આંતરરાષ્ટ્રીય ક્રિકેટ કેલેન્ડર અત્યારે યુદ્ધના કારણે વેરવિખેર થઈ ગયું છે. ICC અને સંબંધિત ક્રિકેટ બોર્ડ સતત સંપર્કમાં છે, પરંતુ જ્યાં સુધી મધ્ય પૂર્વમાં શાંતિ સ્થપાય નહીં ત્યાં સુધી નવી તારીખો જાહેર કરવી મુશ્કેલ છે. રમત પ્રેમીઓ માટે આ એક મોટો આંચકો છે કારણ કે વર્લ્ડ લીગ-2 ની આ મેચો ક્વોલિફિકેશન માટે અત્યંત મહત્વની હતી. હાલમાં ક્રિકેટ જગત પ્રાર્થના કરી રહ્યું છે કે સ્થિતિ જલ્દી સામાન્ય થાય અને બેટ-બોલનો જંગ ફરી શરૂ થાય, પરંતુ અત્યારે તો બંદૂકો અને મિસાઈલોના અવાજ વચ્ચે ક્રિકેટના મેદાનમાં સન્નાટો વ્યાપી ગયો છે.