નવી દિલ્હી/કોલંબો: ટી-20 વર્લ્ડ કપ 2026ના સૌથી મોટા અને હાઈ-વોલ્ટેજ ડ્રામા સમાન ભારત-પાકિસ્તાન મહા મુકાબલા પહેલા ક્રિકેટ જગતમાં ઉત્તેજનાનો પારો ચરમસીમાએ છે. આ હાઈ-પ્રોફાઈલ મેચ પૂર્વે ભારતીય કેપ્ટન સૂર્યકુમાર યાદવે શનિવારે પ્રેસ કોન્ફરન્સ ગજવી હતી. 'મિસ્ટર 360' એ પાકિસ્તાન સામેની રણનીતિથી લઈને ટીમની તૈયારીઓ સુધીના તમામ સવાલોના જવાબ પોતાની આગવી અને આત્મવિશ્વાસભરી શૈલીમાં આપ્યા હતા.

કોઈપણ પરિસ્થિતિ માટે ટીમ સજ્જ

પ્રેસ કોન્ફરન્સ દરમિયાન સૂર્યાએ સ્પષ્ટ કર્યું હતું કે ભારતીય ટીમ કોઈપણ પડકારને પહોંચી વળવા માટે માનસિક રીતે તૈયાર છે. તેણે કહ્યું, "અમે પાકિસ્તાન સામે રમવા માટે અગાઉથી જ પ્લાનિંગ કરી લીધું હતું. શ્રીલંકાની પીચો અને પરિસ્થિતિઓથી અમે પરિચિત છીએ. અત્યારે અમારું પૂરું ધ્યાન માત્ર ક્રિકેટ પર છે અને મેદાન પર સર્વશ્રેષ્ઠ પ્રદર્શન કરવા અમે આતુર છીએ."

અભિષેક શર્મા અને ઉસ્માન તારિકનો પડકાર

જ્યારે સૂર્યાને વિસ્ફોટક બેટ્સમેન અભિષેક શર્માને પ્લેઈંગ ઈલેવનમાં સ્થાન આપવા અંગે પૂછવામાં આવ્યું, ત્યારે તેણે રમુજી અંદાજમાં હકારાત્મક સંકેત આપ્યા હતા, જેનાથી ચાહકોમાં ઉત્સાહ વધી ગયો છે. આ ઉપરાંત, પાકિસ્તાની બોલર ઉસ્માન તારિકની રહસ્યમય બોલિંગ અને કોલંબોના મેદાનની મિસ્ટ્રી અંગેના સવાલો પર સૂર્યાએ બિન્દાસ થઈને કહ્યું કે ભારતીય બેટ્સમેનો દરેક પ્રકારના બોલિંગ એટેકને તોડવા માટે સક્ષમ છે.

હાઈ-વોલ્ટેજ મેચ પૂર્વે આત્મવિશ્વાસ

પાકિસ્તાની કેપ્ટને મેચ પહેલા જ 'હિતશત્રુ' જેવો બચાવ રજૂ કર્યો હોવાની ચર્ચાઓ વચ્ચે સૂર્યાનું આક્રમક વલણ ભારતીય ચાહકો માટે સારા સમાચાર છે. સૂર્યાએ ભારપૂર્વક કહ્યું કે ટીમમાં દરેક ખેલાડી પોતાની ભૂમિકા જાણે છે અને પાકિસ્તાન સામેની મેચમાં દબાણને કેવી રીતે હેન્ડલ કરવું તેની અમને પૂરી સમજ છે. રવિવારે યોજાનારા આ મહાજંગમાં આખું વિશ્વ ભારત અને પાકિસ્તાન વચ્ચેના રોમાંચક મુકાબલાની રાહ જોઈ રહ્યું છે.