નાગપુર: આગામી ICC મેન્સ T20 વર્લ્ડ કપ ૨૦૨૬ના કાઉન્ટડાઉન વચ્ચે ભારત અને ન્યુઝીલેન્ડ વચ્ચે આજથી પાંચ મેચોની હાઈ-વોલ્ટેજ ટી-૨૦ શ્રેણીનો પ્રારંભ થઈ રહ્યો છે. નાગપુરના વિદર્ભ ક્રિકેટ એસોસિએશન સ્ટેડિયમ ખાતે રમાનારી આ પહેલી મેચ ભારત માટે વર્લ્ડ કપની તૈયારીઓને આખરી ઓપ આપવા માટે અત્યંત મહત્વની છે. એક તરફ ભારત પોતાના ઘરઆંગણે દબદબો જાળવી રાખવા માંગશે, તો બીજી તરફ કિવી ટીમ ભારતમાં પોતાનો વિજયી સિલસિલો ચાલુ રાખવા મેદાનમાં ઉતરશે.
 
કેપ્ટન સૂર્યકુમાર યાદવ માટે કરો યા મરો જેવી સ્થિતિ
ભારતીય ટી-૨૦ ટીમના સુકાની સૂર્યકુમાર યાદવ માટે આ શ્રેણી વ્યક્તિગત રીતે પણ પડકારજનક છે. ૨૦૨૪થી તેની કેપ્ટન્સી હેઠળ ટીમનો વિજય દર ૭૨ ટકા રહ્યો છે, પરંતુ બેટિંગમાં 'સ્કાય'નું ફોર્મ ચિંતાનો વિષય બન્યું છે. ૨૦૨૫ના વર્ષમાં ૧૯ મેચોમાં તે એક પણ અડધી સદી ફટકારી શક્યો નથી. આજે નાગપુરના મેદાન પર ચાહકોને ફરીથી તેના જૂના અંદાજમાં '360 ડિગ્રી' શોટ્સ જોવાની આશા છે.
ટીમમાં મોટા ફેરફાર: ઈશાન કિશનને મળી નવી જવાબદારી
ટીમ મેનેજમેન્ટે આ વખતે બેટિંગ ઓર્ડરમાં મોટો ફેરફાર કર્યો છે. સૂર્યકુમારે પોતે પુષ્ટિ કરી છે કે ઈશાન કિશન આજે નંબર-૩ પર બેટિંગ કરવા ઉતરશે. આ નિર્ણયને કારણે શ્રેયસ અય્યરને પ્લેઈંગ ઈલેવનમાંથી બહાર બેસવું પડી શકે છે. બીજી તરફ, વનડે શ્રેણીમાં આરામ કર્યા બાદ જસપ્રીત બુમરાહ અને હાર્દિક પંડ્યાની વાપસીથી ભારતીય બોલિંગ અને ઓલરાઉન્ડ વિભાગમાં જબરદસ્ત સંતુલન આવ્યું છે.
નાગપુરની પીચ અને 'X' ફેક્ટર
નાગપુરની પીચ પર સ્પિનરોની ભૂમિકા મહત્વની રહી શકે છે. વરુણ ચક્રવર્તી ભારત માટે 'X' ફેક્ટર સાબિત થઈ શકે છે, જે મધ્ય ઓવરોમાં ન્યુઝીલેન્ડના મજબૂત બેટિંગ લાઇનઅપને રોકવાની ક્ષમતા ધરાવે છે. ન્યુઝીલેન્ડ પાસે પણ ડેવોન કોનવે અને રચિન રવિન્દ્ર જેવા ખેલાડીઓ છે જે સ્પિન સામે શાનદાર રમત બતાવે છે.
બંને ટીમોની સંભવિત પ્લેઈંગ ઈલેવન:
ભારત (Team India)    ન્યુઝીલેન્ડ (New Zealand)
અભિષેક શર્મા, સંજુ સેમસન (WK)    ટિમ રોબિન્સન, ડેવોન કોનવે
ઇશાન કિશન, સૂર્યકુમાર યાદવ (C)    રચિન રવિન્દ્ર, માર્ક ચેપમેન
શિવમ દુબે, હાર્દિક પંડ્યા    ડેરિલ મિશેલ, માઈકલ બ્રેસવેલ
રિંકુ સિંહ, અક્ષર પટેલ/કુલદીપ યાદવ    જેમ્સ નીશમ, મિશેલ સેન્ટનર (C)
વરુણ ચક્રવર્તી, જસપ્રીત બુમરાહ    ઈશ સોઢી, મેટ હેનરી
અર્શદીપ સિંહ    જેકબ ડફી
મેચનો સમય: સાંજે ૭:૦૦ વાગ્યાથી (IST)
સ્થળ: વિદર્ભ ક્રિકેટ એસોસિએશન સ્ટેડિયમ, નાગપુર