(લિતેશ ચંદારાણા દ્વારા) વાંકાનેર તા. રર :.. કચ્‍છ નેશનલ હાઈવે પર આવેલા વઘાસિયા ટોલનાકે શનિવારે મોડી રાત્રે ટોલટેક્‍સના મુદ્દે ગ્રામજનો અને ટોલ સત્તાધીશો વચ્‍ચેનો લાંબા સમયથી સળગતો વિવાદ ફરી સપાટી પર આવ્‍યો હતો. સ્‍થાનિક વાહનચાલકો પાસેથી ટોલ વસૂલાતના વિરોધમાં મોટી સંખ્‍યામાં ગ્રામજનો ટોલનાકે એકત્રિત થયા હતા અને ચક્કાજામ કરતાં હાઈવે પર વાહનોની લાંબી કતારો લાગી ગઈ હતી.

વાંકાનેર બાઉન્‍ડ્રીથી કચ્‍છ તરફ જતાં રાષ્‍ટ્રીય ધોરીમાર્ગ પર આવેલા વઘાસિયા ટોલનાકે સ્‍થાનિક રહેવાસીઓ પાસેથી પણ ટોલટેક્‍સ વસૂલવામાં આવતો હોવાના આક્ષેપોને લઈને લોકોમાં લાંબા સમયથી અસંતોષ જોવા મળી રહ્યો હતો. શનિવારે મોડી રાત્રે આ મુદ્દે ઉગ્ર વિરોધ જોવા મળ્‍યો હતો.વિરોધ પ્રદર્શન દરમિયાન ગ્રામજનોએ ટોલનાકા પર ચક્કાજામ કરતાં હાઈવે પરનો વાહનવ્‍યવહાર અડધા કલાકથી વધુ સમય માટે પ્રભાવિત થયો હતો. બંને તરફ વાહનોની લાંબી લાઈનો લાગી જતાં મુસાફરોને ભારે હાલાકીનો સામનો કરવો પડ્‍યો હતો.

ઘટનાની જાણ થતાં સ્‍થાનિક પોલીસ તાત્‍કાલિક ઘટનાસ્‍થળે પહોંચી હતી અને કાયદો-વ્‍યવસ્‍થાની સ્‍થિતિ જળવાઈ રહે તે માટે મોરચો સંભાળ્‍યો હતો. પોલીસ દ્વારા ગ્રામજનો અને ટોલનાકા સંચાલકો વચ્‍ચે ચર્ચા અને સમજાવટના પ્રયાસો હાથ ધરવામાં આવ્‍યા હતા. ત્‍યારબાદ ધીમે ધીમે સ્‍થિતિ સામાન્‍ય બનતાં વાહનવ્‍યવહાર પૂર્વવત કરવામાં આવ્‍યો હતો. લાંબા સમયથી સળગતો સ્‍થાનિક મુદ્દો સ્‍થાનિક વાહનચાલકો પાસેથી ટોલ વસૂલાત અંગે ગ્રામજનોમાં અગાઉ થી અસંતોષ હોવાનું સામે આવ્‍યું છે. આવા ઙ્ક‘ો સમયસર ઉકેલવામાં ન આવે તો તે અચાનક ઉગ્ર સ્‍વરૂપ ધારણ કરી શકે છે.

ટોલનાકા સંચાલકો, સ્‍થાનિક તંત્ર અને ગ્રામજનો વચ્‍ચે અસરકારક સંવાદનો અભાવ હોય ત્‍યારે ગેરસમજ અને અસંતોષ વધી શકે છે.  વિરોધ પ્રદર્શન લોકશાહી અધિકાર છે, પરંતુ હાઈવે જામ થવાથી સામાન્‍ય મુસાફરો, ઈમરજન્‍સી સેવાઓ અને માલવાહક પરિવહનને સીધી અસર થાય છે.તાત્‍કાલીક પોલીસ દોડી આવતાં સમયસર સ્‍થિતિ વધુ બગડતી અટકી હતી.  ટોલ વસૂલાતના નિયમો, સ્‍થાનિકોને મળતી છૂટછાટ અને ફરિયાદ નિવારણ વ્‍યવસ્‍થા અંગે સ્‍પષ્ટતા કરીને સંબંધિત તંત્ર દ્વારા કાયમી ઉકેલ લાવવાની જરૂરિયાત સામે આવી છે.હાલ સમગ્ર મામલે કોઈ સત્તાવાર નિવેદન જાહેર થયું નથી. પોલીસ અને સંબંધિત તંત્ર દ્વારા ચર્ચા મારફતે ઉકેલ લાવવાના પ્રયાસો ચાલુ હોવાનું જાણવા મળી રહ્યું છે.