દેવભૂમિ દ્વારકા : હવામાન વિભાગ દ્વારા દેવભૂમિ દ્વારકા જિલ્લામાં રેડ એલર્ટ જાહેર કરવામાં આવતાં સમગ્ર જિલ્લા વહીવટી તંત્ર હાઈ એલર્ટ પર આવી ગયું છે. અરબી સમુદ્રમાં ભારે કરંટ અને ઊંચા મોજાં સર્જાતા દરિયાકાંઠાના વિસ્તારોમાં જોખમ વધ્યું છે. યાત્રાળુઓ અને સ્થાનિક નાગરિકોની સુરક્ષાને ધ્યાનમાં રાખીને દ્વારકાના પ્રસિદ્ધ ગોમતી ઘાટ પર લોકોના પ્રવેશ પર તાત્કાલિક પ્રતિબંધ મૂકવામાં આવ્યો છે, જ્યારે ઓખા બંદર પર ૩ નંબરનું ભયસૂચક સિગ્નલ ફરકાવવામાં આવ્યું છે.

શનિવાર સવારથી દેવભૂમિ દ્વારકા જિલ્લામાં ભારે વાદળછાયું વાતાવરણ અને તેજ પવન વચ્ચે દરિયાની સ્થિતિ વધુ જોખમી બની છે. દરિયામાં ઊંચા મોજાં અને જોરદાર કરંટને કારણે ગોમતી ઘાટ સહિત દરિયાકાંઠાના વિસ્તારોમાં વિશેષ સુરક્ષા વ્યવસ્થા ગોઠવવામાં આવી છે. ઘાટ પર પોલીસ દ્વારા સતત પેટ્રોલિંગ કરવામાં આવી રહ્યું છે અને યાત્રાળુઓને દરિયાની નજીક ન જવા સમજાવવામાં આવી રહ્યું છે.

દરિયાઈ પરિસ્થિતિને ધ્યાનમાં રાખીને ઓખા બંદર પર ૩ નંબરનું ચેતવણી સિગ્નલ જાહેર કરવામાં આવ્યું છે. બંદર તંત્રે તમામ માછીમારોને આગામી સૂચના સુધી દરિયો ન ખેડવા કડક સૂચના આપી છે. દરિયામાં રહેલી માછીમારી બોટોને પણ સુરક્ષિત બંદરે પરત ફરવા જણાવવામાં આવ્યું છે. ખરાબ હવામાનને કારણે કોઈપણ પ્રકારની દુર્ઘટના ટાળવા માટે વહીવટી તંત્ર સતત પરિસ્થિતિ પર નજર રાખી રહ્યું છે.

સંભવિત આપત્તિને પહોંચી વળવા માટે જીડ્ઢઇહ્લ, ફાયર વિભાગ અને અન્ય બચાવ દળોની ટીમોને સ્ટેન્ડબાય રાખવામાં આવી છે. જરૂર પડ્યે તાત્કાલિક બચાવ અને રાહત કામગીરી શરૂ કરી શકાય તે માટે તમામ જરૂરી સાધનો અને માનવબળ તૈયાર રાખવામાં આવ્યા છે.

જિલ્લા કલેક્ટરે નાગરિકોને અફવાઓથી દૂર રહેવા અને માત્ર સત્તાવાર સૂચનાઓ પર જ વિશ્વાસ રાખવાની અપીલ કરી છે. સાથે જ ભારે વરસાદ અને ખરાબ હવામાન દરમિયાન બિનજરૂરી બહાર ન નીકળવા તેમજ દરિયાકાંઠાના વિસ્તારોની મુલાકાત ટાળવા અનુરોધ કરવામાં આવ્યો છે.