ભુજ : બંગાળની ખાડીમાં સર્જાયેલા મજબૂત ડિપ્રેશન અને રાજ્યમાં એકસાથે સક્રિય થયેલી વરસાદી સિસ્ટમોના પ્રભાવ હેઠળ મેઘતૃષ્ણાના મુલક ગણાતા કચ્છ જિલ્લામાં મેઘરાજાએ ધમાકેદાર હાજરી નોંધાવી છે. હવામાન વિભાગ દ્વારા કચ્છ માટે 'ઓરેન્જ એલર્ટ' જારી કરવામાં આવ્યું છે, જેની અસરરૂપે પૂર્વ અને પશ્ચિમ કચ્છના તમામ વિસ્તારોમાં સુસવાટા મારતા પવન અને ગાજવીજ સાથે સાર્વત્રિક મુસળધાર વરસાદ નોંધાયો છે.

વાગડ અને જોડિયા શહેરોમાં ૨ થી ૩ ઈંચ ખાબક્યો, રસ્તાઓ બન્યા બેટ

વાગડ પંથકથી શરૂ થયેલી મેઘસવારી ભચાઉ, ગાંધીધામ, અંજાર અને ખડીર વિસ્તાર સુધી ફરી વળી હતી. ખડીરના ઐતિહાસિક ધોળાવીરા અને ચોબારી પંથકમાં તોફાની પવન સાથે દોઢથી બે ઈંચ વરસાદથી ખેતરો પાણી-પાણી થઈ ગયા હતા. જોડિયા શહેરો એવા ગાંધીધામ અને આદિપુરમાં ભારે ઉકળાટ બાદ મોડી રાત્રે હેલી વરસતાં માર્ગો પર પાણી ફરી વળ્યા હતા. અંજાર અને ભચાઉમાં પણ ૨ થી અઢી ઈંચ જેટલો વરસાદ પડાતાં ઔદ્યોગિક સંકુલમાં ખુશીનો માહોલ છવાયો હતો.

વાવણી કાર્યને નવજીવન, ભુજમાં અવિરત હેલીથી હમીરસર છલકાવાની આશા

સામખિયાળી, દુધઈ, લખપત, ખાવડા અને નખત્રાણા સહિતના ગ્રામ્ય વિસ્તારોમાં ૩ ઈંચથી વધુ વરસાદ થતાં વાવણી કરનારા ખેડૂતોમાં ભારે હરખની હેલી જોવા મળી રહી છે. બીજી તરફ, જિલ્લા મથક ભુજ ખાતે શુક્રવાર રાતથી શરૂ થયેલી ધીમીધારની હેલી અવિરત ચાલુ રહી હતી. આગામી સાતમ-આઠમના ભાતીગળ મેળા પૂર્વે જ ભુજનું હૃદયસમાં હમીરસર તળાવ ઓગની (ઓવરફ્લો થઈ) જાય તેવી શક્યતાથી શહેરીજનો ઉત્સાહમાં આવી ગયા છે.

તાલુકાવાર વરસાદની સ્થિતિ: રાપરમાં મોસમનો ૫૫% વરસાદ ખાબક્યો

સ્ટેટ ઈમરજન્સી ઓપરેશન સેન્ટર (SEOC)ના આંકડા મુજબ સમગ્ર કચ્છ જિલ્લામાં મોસમનો સરેરાશ ૨૦.૬૭ ટકા વરસાદ નોંધાઈ ચૂક્યો છે:

· રાપર: ૫૫.૨૭%

· ભચાઉ: ૩૪.૭૫%

· ગાંધીધામ: ૨૪.૫૮%

· ભુજ: ૧૮.૮૭%

· નખત્રાણા: ૧૬.૩૯%

· લખપત: ૧૪.૪૦%

· માંડવી: ૧૨.૬૧%

· અંજાર: ૧૧.૪૧%

· મુન્દ્રા: ૯.૭૧%

· અબડાસા: ૭.૦૦%

હવામાન નિષ્ણાતોના મતે આગામી ૨૪ કલાકમાં સિસ્ટમ નબળી પડે તો પણ વરસાદની તીવ્રતા ઘટવાની શક્યતા ઓછી છે, જેના પગલે વહીવટી તંત્રને સંપૂર્ણપણે સાબદું કરવામાં આવ્યું છે.