પોરબંદર : વાંસજાળિયા–રાણાવાવ રેલખંડમાં વહેલી સવારે બનેલી એક અનોખી અને રોમાંચક ઘટનામાં, લોકોપાઇલટની સજાગતા અને ત્વરિત નિર્ણયશક્તિને કારણે એક સંભવિત મોટી રેલ દુર્ઘટના ટળી ગઈ હતી. ઘટનાની વિગતો મુજબ, ગત વહેલી સવારે આશરે 4:30 વાગ્યાના સુમારે ટ્રેન નંબર 19015 દાદર–પોરબંદર સૌરાષ્ટ્ર એક્સપ્રેસ વાંસજાળિયા નજીક આવેલા બ્રિજ નં. 95 પરથી પસાર થઈ રહી હતી, ત્યારે લોકોપાઇલટ કાલિદાસ અને સહાયક લોકોપાઇલટ જગદીશ સાહુએ રેલવે ટ્રેક પર એક ઊંટને બેઠેલો જોયો હતો. પરિસ્થિતિની ગંભીરતાને પારખીને બંનેએ તક્ષ ક્ષણનો વિલંબ કર્યા વિના ઇમરજન્સી બ્રેક લગાવી દીધી હતી અને ટ્રેનને ઊંટથી સુરક્ષિત અંતરે રોકીને સેંકડો મુસાફરોનો જીવ બચાવી લીધો હતો.

ટ્રેન થંભી ગયા બાદ સહાયક લોકોપાઇલટે નીચે ઉતરીને સ્થળ પર જઈને તપાસ કરી ત્યારે માલુમ પડ્યું કે ઊંટ માત્ર ટ્રેક પર બેઠેલો ન હતો, પરંતુ રેલવે બ્રિજના પિલરો અને લોખંડના ભાગોની વચ્ચે ફસાઈ ગયો હતો અને તે જાતે બહાર નીકળી શકે તેમ નહોતો. આ અસામાન્ય ઘટનાની ગંભીરતાને ધ્યાનમાં રાખીને તાત્કાલિક ધોરણે ટ્રેન મેનેજર એસ.પી. મીણા, રેલવે કંટ્રોલ રૂમ અને વાંસજાળિયા સ્ટેશન સુપરિન્ટેન્ડન્ટને જાણ કરવામાં આવી હતી. મંડળ રેલ પ્રબંધક દિનેશ વર્માના કડક અને સચોટ માર્ગદર્શન હેઠળ રેલવે પ્રશાસનની ટેકનિકલ ટીમે તુરંત જ રાહત અને બચાવ કામગીરીનો ધમધમાટ શરૂ કરી દીધો હતો અને મૂંગા પશુને બચાવવા માટે વિશેષ ક્રેન તેમજ જરૂરી સાધનો મોકલાયા હતા.

સતત ચાર કલાક સુધી ચાલેલી અથાક મહેનત અને જહેમત બાદ રેલવે કર્મચારીઓ દ્વારા બ્રિજ વચ્ચે ફસાયેલા ઊંટને કોઈપણ પ્રકારની ગંભીર ઈજા પહોંચાડ્યા વિના સુરક્ષિત રીતે બહાર કાઢવામાં આવ્યો હતો અને ત્યારબાદ સવારે 8:45 વાગ્યે રેલવે ટ્રેકને સંપૂર્ણપણે ક્લિયર જાહેર કરવામાં આવ્યો હતો. આ સમગ્ર રેસ્ક્યુ ઓપરેશન અને ટ્રેક ક્લિયર કરવાની પ્રક્રિયા દરમિયાન મુસાફરોની સુરક્ષાને પ્રાથમિકતા આપીને રેલવે તંત્ર દ્વારા તકેદારીના ભાગરૂપે બે પેસેન્જર ટ્રેનોને અસ્થાયી રૂપે રદ કરવી પડી હતી, જ્યારે અન્ય ચાર મહત્વપૂર્ણ ટ્રેનો નિર્ધારિત સમય કરતા મોડી દોડી હતી.

રેલવે વિભાગના સત્તાવાર સૂત્રોના જણાવ્યા અનુસાર, ખુલ્લા પશુઓ અને ઢોર-ઢાંખર અચાનક રેલવે ટ્રેક પર આવી જવાના કારણે અગાઉ પણ અનેક નાના-મોટા અકસ્માતો સર્જાયા છે, જેને ધ્યાનમાં રાખીને ભવિષ્યમાં આવા બનાવો ન સર્જાય તે માટે ટ્રેક આસપાસ ફેન્સિંગ અથવા સુરક્ષા દીવાલ ઊભી કરવાના પ્રસ્તાવો પર ગંભીરતાથી વિચારણા ચાલી રહી છે. વહેલી સવારે જીવના જોખમે મૂંગા પ્રાણીનો જીવ બચાવનાર લોકોપાઇલટની આ સતર્કતા અને રેલવે ટીમના સરાહનીય સમન્વયને કારણે એક મોટો અનર્થ ટળ્યો હોવાથી સમગ્ર પંથકમાં રેલવે કર્મચારીઓની પ્રશંસા થઈ રહી છે.