ગોંડલ : ગોંડલ-કોટડા સાંગાણી રોડ પર ૧૮ જુલાઈની સાંજે એક હૃદયદ્રાવક દુર્ઘટના સર્જાઈ હતી, જેમાં પૂરપાટ ઝડપે આવતી બ્રેઝા કારે એક્ટિવાને જોરદાર ટક્કર મારતા મામા-ફઈના બે સગા ભાઈઓના ઘટનાસ્થળે જ કમકમાટીભર્યા મોત નીપજ્યાં હતા. ૧૫ વર્ષીય દર્શીત ચૌહાણ અને ૧૨ વર્ષીય હેમેન્દ્ર પરમાર પોતાના વતન પરત ફરી રહ્યા હતા ત્યારે આ આકાશી આફત જેવો અકસ્માત સર્જાતા બંને પરિવારો પર આભ તૂટી પડ્યું હતું.

મળતી વિગતો મુજબ, કોટડા સાંગાણીનો વતની દર્શીત ગોંડલ કમ્પ્યુટર ક્લાસ પૂર્ણ કરીને તેના મામાને ઘરેથી હેમેન્દ્ર સાથે એક્ટિવા પર નીકળ્યો હતો. અંધારપટ ધરાવતા આ રોડ પર એક જોખમી વળાંક પાસે સામેથી બેફામ ગતિએ આવતી સફેદ બ્રેઝા કારે તેમના વાહનને અડફેટે લીધું હતું. અકસ્માત એટલો ભયાનક હતો કે એક્ટિવા કારની સાથે લગભગ ૧૦૦ મીટર સુધી ઢસડાયું હતું, જેના પરિણામે બંને કિશોરોના પ્રાણ પંખેરું ઉડી ગયા હતા.

આ અકસ્માત સમયે કોટડા સાંગાણી પોલીસ સ્ટેશનના એએસઆઈ વિશાલ ગઢાધરા ત્યાંથી પસાર થઈ રહ્યા હતા, જેમણે તાત્કાલિક ૧૦૮ અને ૧૧૨ને જાણ કરી માનવતા દાખવી હતી. અકસ્માત કરનાર કારમાં સવાર પરિવારે પણ સંવેદના બતાવી મૃતકને હોસ્પિટલ સુધી પહોંચાડવામાં મદદ કરી હતી. કારની એરબેગ્સ ખુલી જવાને કારણે કારમાં સવાર લોકોનો ચમત્કારિક બચાવ થયો હતો, જ્યારે બંને કિશોરોનું ઘટનાસ્થળે જ અવસાન થયું હતું.

ગોંડલ ડિવિઝનના ડીવાયએસપી કે.જી. ઝાલા તથા કોટડા સાંગાણી પોલીસ કાફલો ઘટનાસ્થળે પહોંચીને સ્થિતિને કાબૂમાં લીધી હતી. પોલીસે મૃતદેહોને પીએમ માટે ખસેડી આગળની કાર્યવાહી હાથ ધરી છે. હેમેન્દ્ર પરમાર તેના માતા-પિતાનો એકનો એક પુત્ર હતો, જ્યારે દર્શીત બે ભાઈઓમાં મોટો હતો. આ ઘટનાએ સમગ્ર પંથકમાં ભારે અરેરાટી ફેલાવી દીધી છે.

મૃતક દર્શીતના પિતા રાજેશભાઈ ચૌહાણની ફરિયાદના આધારે પોલીસે કાર ચાલકની અટકાયત કરી છે. પોલીસે ભારતીય નાગરિક સુરક્ષા સંહિતા (BNSS)ની કલમ ૨૮૧, ૧૦૬(૧) તથા મોટર વાહન અધિનિયમ હેઠળ ગુનો દાખલ કર્યો છે. અકસ્માત સર્જનાર ચાલકની પૂછપરછ અને તપાસના આધારે કાયદેસરની કાર્યવાહી આગળ વધારવામાં આવી રહી છે.