ભાવનગર, તા.૧૮:ભાવનગર ડિસ્ટ્રિક્ટ કો-ઓપરેટિવ બેંક હેકિંગ કાંડમાં પોલીસને મોટી સફળતા મળી છે. 7.34 કરોડ રૂપિયાની સાયબર છેતરપિંડીના આ કેસમાં પોલીસે એક મહિલા સહિત કુલ 4 આરોપીઓની ધરપકડ કરી છે. પૂછપરછમાં આખા કૌભાંડને લઈને ચોંકાવનારા ખુલાસા સામે આવ્યા છે.

પ્રાપ્ત વિગતો મુજબ આરોપીઓએ ફિશિંગ ઈ-મેઈલ અને મેલવેર દ્વારા બેંકની સિસ્ટમમાં ઘૂસણખોરી કરી હતી. બેંકના સર્વરની એક્સેસ મેળવીને આરોપીઓએ અલગ-અલગ બેંક ખાતાઓમાં 7.34 કરોડ રૂપિયા ટ્રાન્સફર કરી દીધા હતા. આ રકમ ત્યારબાદ દેશભરના 50થી વધુ બેંક ખાતાઓમાં વહેંચી દેવામાં આવી હતી.

પોલીસ તપાસમાં સામે આવ્યું છે કે આ આખું કૌભાંડ આંતરરાજ્ય ગેંગ દ્વારા આચરવામાં આવ્યું હતું. ઝડપાયેલા ચારેય આરોપીઓ ગેંગના મહત્વના સૂત્રધારો છે. ગેંગનો માસ્ટરમાઇન્ડ વિદેશમાં બેઠો હોવાની આશંકા છે. આરોપીઓ પાસેથી મોબાઈલ ફોન, લેપટોપ, અનેક સીમકાર્ડ અને બનાવટી દસ્તાવેજો કબજે કરવામાં આવ્યા છે.

પોલીસે જણાવ્યું કે આરોપીઓએ ટેક્નિકલ જાણકારીનો દુરુપયોગ કરીને આ ગુનો આચર્યો હતો. હેક કરેલી રકમ ક્રિપ્ટો કરન્સી અને અન્ય માધ્યમથી સગેવગે કરવાનો પ્લાન હતો. હાલ પોલીસે ચારેય આરોપીઓની સઘન પૂછપરછ શરૂ કરી છે અને ગેંગ સાથે સંકળાયેલા અન્ય આરોપીઓને પકડવા માટે તપાસનો ધમધમાટ શરૂ કર્યો છે. બેંકના સાયબર સિક્યુરિટી સેટઅપની પણ સમીક્ષા કરવામાં આવી રહી છે.