(વિનોદ ગાલા દ્વારા) ભુજ તા.૨0 :  પંજાબ રાજ્યમાંથી કરોડો રૂપિયાનું માદક પદાર્થ (હેરોઇન) ખરીદીને કચ્છ જિલ્લામાં ઊંચા ભાવે વેચવાની પેરવી કરી રહેલી પંજાબની ગેંગના પાંચેય આરોપીઓને ભુજની ત્રીજી અધિક સેશન્સ અને સ્પેશિયલ NDPS કોર્ટે દોષિત ઠેરવી ૧૦ વર્ષની સખત કેદ અને પ્રત્યેકને બે લાખના દંડની સજા સંભળાવી છે.ઘટનાની વિગતે વાત કરીએ તો તારીખ ૧૩/૦૭/૨૦૨૩ના રોજ ભુજ સ્પેશિયલ ઓપરેશન ગ્રુપને ખાનગી બાતમી મળી હતી કે સફેદ કલરની કારમાં પંજાબના કેટલાક ઇસમો ગેરકાયદેસર માદક પદાર્થનો મોટો જથ્થો વેચવા માટે કચ્છમાં ગ્રાહકની શોધમાં ફરી રહ્યા છે. બાતમીના આધારે એસઓજી ટીમે ડમી ગ્રાહક ઊભો કરી માધાપર પાસે રેડ પાડી હતી.પોલીસને જોઈને કારચાલકે ગાડી ભાગાડી જવાનો પ્રયાસ કરતા સુરક્ષાના ભાગરૂપે પોલીસે કારના ટાયર પર ફાયરિંગ કરી ગાડી રોકી લીધી હતી. ગાડીમાંથી કબ્જે કરાયેલા ૪૨૦ ગ્રામ ગેરકાયદેસર હેરોઇન (જેની આંતરરાષ્ટ્રીય કિંમત આશરે ૨ કરોડ રૂપિયા) સાથે પાંચેય પંજાબી શખ્સોની ધરપકડ કરવામાં આવી હતી.દંડાયેલા આરોપીઓ તમામ રહે. મરગીન્દપુરા, તા. પટ્ટી, જી. તરનતારન, પંજાબ) ના હોવાનું સામે આવ્યું હતુ આ મામલો ભુજ કોર્ટમાં ચાલી જતા રણજીતસિંઘ જરગાનસિંઘ જાટ (ઉં.વ. ૩૦),હરપ્રિતસિંઘ જસવિંદરારા સિંઘ જાટ (ઉં.વ. ૨૭),સરતાજસિંઘ ઉર્ફે સતરાજસિંઘ રસપાલસિંઘ જાટ (ઉં.વ. ૪૨),દલેરસિંઘ જોગીન્દરસિંઘ જાટ (ઉં.વ. ૪૭) ગુરબેજસિંઘ ઉર્ફે ભેજા સલવિન્દરસિંઘ જાટ (ઉં.વ. ૩૪)ને ભુજ કોર્ટના ત્રીજા અધિક સેશન્સ જજ વી. એ. બુદ્ધ સાહેબની અદાલતે સજા ફટકારી હતી. પ્રોસિક્યુશન તરફે મુખ્ય જિલ્લા સરકારી વકીલ એચ. બી. જાડેજાએ ૩૧ દસ્તાવેજી પુરાવા અને ૧૦ સાક્ષીઓની તપાસ કરી ધારદાર દલીલો કરી હતી. કોર્ટે નોંધ્યું હતું કે આરોપીઓએ આર્થિક ફાયદા માટે યુવાનોને નશામાં ધકેલવા સુનિયોજિત વ્યૂહરચના ઘડી ગંભીર ગુનો આચર્યો છે. NDPS એક્ટની કલમ ૮(સી), ૨૨(સી) અને ૨૯ હેઠળ તમામ આરોપીઓને સખત શિક્ષા કરવામાં આવી છે. કચ્છમાં સ્થાનિક પોલીસ દ્વારા ડ્રગ્સ પકડવા માટે ફાયરિંગ થયું હોય તેવો આ પ્રથમ મામલો હતો જે મામલે સ્થાનિક પોલીસ અધિકારી સહિત રાજ્યના પોલીસવડા સહિતના લોકોએ પોલીસ કામગીરીની પ્રશંસા કરી હતી.