મુકુંદ બદીયાણી, જામનગર:આયુષ મંત્રાલય હેઠળ કાર્યરત આઈટીઆરએ (ITRA) જામનગર દ્વારા આજરોજ ૨૧ જૂન આંતરરાષ્ટ્રીય યોગ દિવસ નિમિત્તે ધન્વંતરી મેદાન ખાતે એક વિશાળ અને ભવ્ય કોમન યોગ પ્રોટોકોલ અભ્યાસનું આયોજન કરવામાં આવ્યું હતું. આ કાર્યક્રમમાં જામનગરના નાગરિકો અને વિવિધ સંસ્થાઓનો અભૂતપૂર્વ પ્રતિસાદ જોવા મળ્યો હતો, જેને કારણે સમગ્ર ધન્વંતરી મેદાન યોગમય વાતાવરણ અને દિવ્ય ઊર્જાથી ભરાઈ ગયું હતું. આ ભવ્ય યોગ સંગમમાં જામનગરની જનતાએ વહેલી સવારથી જ ઉત્સાહભેર ભાગ લીધો હતો.
આ વિશેષ યોગાભ્યાસ કાર્યક્રમ સંસ્થાના ડાયરેક્ટર પ્રો. ડૉ. તનુજા નેસરીની ગરિમામય અધ્યક્ષતામાં યોજાયો હતો. આ પ્રસંગે શ્રી કૃષ્ણ પ્રણામી સંપ્રદાયના લક્ષ્મણ દેવ સ્વામીજી અતિથિ વિશેષ તરીકે ખાસ ઉપસ્થિત રહ્યા હતા. મહાનુભાવોની પ્રેરણાદાયી ઉપસ્થિતિમાં આયોજિત આ કાર્યક્રમમાં વિવિધ ક્ષેત્રોના લોકો એકસાથે આસન પર બેસીને સામૂહિક યોગાભ્યાસના સાક્ષી બન્યા હતા.
આ ભવ્ય આયોજનમાં સંસ્થાના ઉત્સાહી વિદ્યાર્થીઓ, અધ્યાપકો, વહીવટી કર્મચારીઓ ઉપરાંત સીઆઈએસએફ (CISF) ના જવાનો, ડબલ્યુએચઓ - જીટીએમસી (WHO - GTMC) ના પ્રતિનિધિઓ અને કર્મચારીઓ, ગુલાબકુંવરબા આયુર્વેદ સોસાયટીના સભ્યો તેમજ મોટી સંખ્યામાં જાહેર જનતા ઉપસ્થિત રહી હતી. આ તમામ ક્ષેત્રોના ૨૦૦૦ થી વધુ લોકોએ એકસાથે મેદાન પર શિસ્તબદ્ધ રીતે વિવિધ યોગ મુદ્રાઓ અને આસનો કરીને યોગને પોતાના જીવનમાં આત્મસાત કરવાનો પ્રશંસનીય પ્રયાસ કર્યો હતો.
કાર્યક્રમમાં આકર્ષણનું મુખ્ય કેન્દ્ર આઈટીઆરએ (ITRA) યોગ વિભાગના વિદ્યાર્થીઓ દ્વારા રજૂ કરવામાં આવેલું 'યોગ ફ્યૂઝન' રહ્યું હતું. વિદ્યાર્થીઓએ સંગીતના મધુર સૂરો અને યોગના સમન્વય થકી એક અવિસ્મરણીય અને દિવ્ય પ્રસ્તુતિ કરી ઉપસ્થિત સૌ કોઈને મંત્રમુગ્ધ કરી દીધા હતા. આ સાથે જ, વડાપ્રધાન નરેન્દ્રભાઈ મોદી દ્વારા શરૂ કરવામાં આવેલી યોગની વૈશ્વિક સફર અને તેની ભવ્ય યાત્રાને પ્રદર્શિત કરતી એક સુંદર ઓડિયો-વિડિયો ઝાંખી પણ રજૂ કરવામાં આવી હતી.
"યોગ હું થી હું નો સંગમ" નામની આ વિશેષ ડિજિટલ ઝાંખી પ્રસ્તુત કરવામાં આવી હતી, જે જામનગર શહેર માટે અત્યંત ગૌરવની ક્ષણ બની રહી છે. આ પ્રોજેક્ટ આઈટીઆરએ (ITRA) અને તેની અધિકૃત ટીવી ચેનલ એએનસીએન (ANCN) ની ટીમના સંયુક્ત પ્રયાસોથી પ્રો. વૈદ્ય મનોજ નેસરી દ્વારા ખૂબ જ મહેનતપૂર્વક તૈયાર કરવામાં આવ્યો છે. આ સમગ્ર ભવ્ય આયોજને જામનગરમાં આંતરરાષ્ટ્રીય યોગ દિવસની ઉજવણીને એક નવી ઊંચાઈ આપી હતી.