નવી દિલ્હી: બિહારના પૂર્ણિયાથી અપક્ષ સાંસદ પપ્પુ યાદવે ઉત્તર પ્રદેશના મુખ્યમંત્રી યોગી આદિત્યનાથ અને પૂર્વ સાંસદ બ્રિજભૂષણ શરણ સિંહ વચ્ચેના સંબંધોને લઈને આકરું નિવેદન આપ્યું છે. રવિવારે દિલ્હીમાં એક મુલાકાત દરમિયાન યાદવે કહ્યું કે, યોગીજી ભલે ગોરખપુરના દાદા ગણાતા હોય, પરંતુ બ્રિજભૂષણ શરણ સિંહનું પણ પોતાનું એક વર્ચસ્વ છે અને તેઓ પણ દાદા છે. તેમણે ઉમેર્યું કે યોગીજીનું સન્માન જળવાવું જોઈએ, પરંતુ બ્રિજભૂષણ સિંહની તાકાતને પણ નજરઅંદાજ કરી શકાય તેમ નથી.

પપ્પુ યાદવે ભાજપના આંતરિક સમીકરણો પર પ્રહાર કરતા જણાવ્યું હતું કે, મુખ્યમંત્રી યોગી આદિત્યનાથ અત્યારે ભાજપની મહેરબાની પર ટકી રહ્યા છે, જ્યારે ભાજપ પોતે બ્રિજભૂષણ શરણ સિંહની દયા પર નિર્ભર છે. તેમના મતે બ્રિજભૂષણ શરણ સિંહ એવા નેતા છે જે ભાજપની દયા પર નિર્ભર નથી. યાદવે એમ પણ યાદ અપાવ્યું હતું કે બ્રિજભૂષણ સિંહ ત્યારથી રાજકારણમાં સક્રિય છે જ્યારે યોગી આદિત્યનાથનું કોઈ અસ્તિત્વ પણ નહોતું, આથી બંને વચ્ચે ઘણો તફાવત છે.

આ નિવેદન બાદ ઉત્તર પ્રદેશ અને બિહારના રાજકારણમાં નવો વળાંક આવવાની શક્યતા છે. પપ્પુ યાદવ ઘણીવાર પોતાના બેબાક અને વિવાદાસ્પદ નિવેદનો માટે જાણીતા છે, પરંતુ યોગી આદિત્યનાથ જેવા કદાવર નેતા પર સીધું નિશાન સાધવું એ ભાજપના છાવણીમાં રોષ પેદા કરી શકે છે. બ્રિજભૂષણ શરણ સિંહ અગાઉ મુલાયમ સિંહ યાદવ અને અમિત શાહની પણ નજીક રહ્યા હોવાનો ઉલ્લેખ કરીને યાદવે આ વિવાદને વધુ હવા આપી છે, જેના પડઘા આગામી દિવસોમાં જોવા મળી શકે છે.