સેન ફ્રાન્સિસ્કો : ટેસ્લાના પૂર્વ AI ડિરેક્ટર અને OpenAI ના ફાઉન્ડિંગ મેમ્બર આન્દ્રેજ કારપથીએ એલોન મસ્કના સોશિયલ મીડિયા પ્લેટફોર્મ X ના એલ્ગોરિધમને 'ઝેરી' ગણાવ્યું છે. એક પોડકાસ્ટમાં બોલતા કારપથીએ કહ્યું કે X નું હાલનું એલ્ગોરિધમ યુઝર્સને જાણીજોઈને ગુસ્સો, નફરત અને વિભાજનકારી કન્ટેન્ટ બતાવી રહ્યું છે.

કારપથી 2017 થી 2022 સુધી ટેસ્લામાં AI અને ઓટોપાયલટ વિભાગના હેડ હતા અને મસ્કના ખાસ ગણાતા હતા. મતભેદ થતા તેમણે ટેસ્લા છોડી દીધી હતી. તેમણે કહ્યું, "X નો ધ્યેય પહેલા 'ફ્રી સ્પીચ' હતો, પણ હવે તે 'મેક્સિમમ એન્ગેજમેન્ટ' બની ગયો છે. એલ્ગોરિધમ એવી રીતે ડિઝાઇન કરાયું છે કે તે તમને ગુસ્સે કરે, કારણ કે ગુસ્સે થયેલો યુઝર વધુ કોમેન્ટ કરે છે, વધુ સમય પ્લેટફોર્મ પર વિતાવે છે."

તેમણે ઉમેર્યું કે, "જ્યારે તમે સવારે X ખોલો છો ત્યારે તમારી ટાઈમલાઈન પર સૌથી પહેલા એવી પોસ્ટ દેખાય છે જે તમને ચીડવે અથવા તમારા વિરોધી વિચારની હોય. આનાથી સમાજમાં ધ્રુવીકરણ વધી રહ્યું છે. આ લાંબા ગાળે ખૂબ ખતરનાક છે."

કારપથીના આ નિવેદન બાદ ટેક જગતમાં ખળભળાટ મચી ગયો છે. ઘણા યુઝર્સે તેમની વાત સાથે સહમતિ દર્શાવી છે. જોકે, એલોન મસ્ક કે X તરફથી હજુ સુધી આ મુદ્દે કોઈ સત્તાવાર પ્રતિક્રિયા આપવામાં આવી નથી.

ઉલ્લેખનીય છે કે છેલ્લા એક વર્ષમાં X પર હેટ સ્પીચ અને ખોટી માહિતી ફેલાવવાના આરોપો વધ્યા છે. યુરોપિયન યુનિયને પણ X ને કન્ટેન્ટ મોડરેશન માટે ચેતવણી આપી છે.