વોશિંગ્ટન તા.૨૦ :  અમેરિકાના રાષ્ટ્રપતિ ડોનાલ્ડ ટ્રમ્પે કતાર સરકાર તરફથી ભેટમાં મળેલા અતિ આલીશાન બોઇંગ 747 વિમાનનું ભવ્ય અનાવરણ કર્યું છે. આ વિમાનને સત્તાવાર રીતે નવા એરફોર્સ વન તરીકે જાહેર કરવામાં આવ્યું છે. અંદાજે 400 મિલિયન ડોલર એટલે કે 3,300 કરોડ રૂપિયાની કિંમત ધરાવતા આ વિમાનને 'વિશ્વનું સૌથી વૈભવી વિમાન' તરીકે ઓળખવામાં આવી રહ્યું છે.

કતાર દ્વારા ભેટમાં આપવામાં આવેલા આ બોઇંગ 747માં પ્રેસિડેન્શિયલ સ્યુટ, કોન્ફરન્સ રૂમ, અત્યાધુનિક સંચાર વ્યવસ્થા અને મિસાઇલ ડિફેન્સ સિસ્ટમ જેવી સુવિધાઓ ઉમેરવામાં આવી છે. વિમાનનું ઇન્ટિરિયર સોનાથી શણગારેલું છે અને તેમાં પ્રમુખ માટે ખાસ આરામદાયક કેબિન તૈયાર કરવામાં આવી છે. સુરક્ષાની દ્રષ્ટિએ પણ આ વિમાન અત્યંત અદ્યતન છે.

અનાવરણ પ્રસંગે રાષ્ટ્રપતિ ટ્રમ્પે જણાવ્યું કે આ વિમાન અમેરિકાની તાકાત, સમૃદ્ધિ અને તકનિકી ક્ષમતાનું પ્રતીક છે. તેમણે કતાર સરકારનો આ ઐતિહાસિક ભેટ માટે આભાર માન્યો હતો. આ વિમાન હવે અમેરિકાના પ્રમુખના સત્તાવાર પ્રવાસો માટે ઉપયોગમાં લેવાશે અને જૂના એરફોર્સ વનના સ્થાને સેવા આપશે.

જોકે આ ભેટને લઈને અમેરિકામાં રાજકીય ચર્ચાઓ પણ શરૂ થઈ છે. વિરોધ પક્ષોનું કહેવું છે કે વિદેશી સરકાર તરફથી આટલી મોંઘી ભેટ સ્વીકારવી એ બંધારણીય નિયમોની વિરુદ્ધ છે. બીજી તરફ સમર્થકોનું માનવું છે કે આનાથી અમેરિકા અને કતાર વચ્ચેના રાજદ્વારી સંબંધો વધુ મજબૂત થશે.

દુનિયાભરના મીડિયામાં આ વિમાનની તસવીરો અને વીડિયો વાયરલ થઈ રહ્યા છે. એરફોર્સ વનના નવા રૂપને જોઈને સૌ કોઈ આશ્ચર્યચકિત થઈ ગયા છે.