નેધરલેન્ડ્સ,: રશિયા સામેના યુદ્ધમાં છેલ્લા ચાર વર્ષથી વધુ સમયથી અડગ ઊભેલા યુક્રેનના રાષ્ટ્રપતિ વોલોડીમીર ઝેલેન્સકીને વૈશ્વિક સ્તરે એક મોટું સન્માન મળ્યું છે. ગુરુવારે નેધરલેન્ડ્સમાં યોજાયેલા એક વિશેષ સમારોહમાં તેમને પ્રતિષ્ઠિત ‘ઇન્ટરનેશનલ ફોર ફ્રીડમ્સ એવોર્ડ’ (International Four Freedoms Award) એનાયત કરવામાં આવ્યો હતો. આ એવોર્ડ યુક્રેનિયન લોકોની અતૂટ હિંમત અને ઝેલેન્સકીના મક્કમ નેતૃત્વનું પ્રતીક માનવામાં આવે છે.
રૂઝવેલ્ટના ચાર સિદ્ધાંતોનું સન્માન
૧૯૮૨માં સ્થપાયેલા રૂઝવેલ્ટ ફાઉન્ડેશન દ્વારા આ સન્માન આપવામાં આવે છે. આ એવોર્ડ અમેરિકાના પૂર્વ રાષ્ટ્રપતિ ફ્રેન્કલિન ડી. રૂઝવેલ્ટના ૧૯૪૧ના ઐતિહાસિક ભાષણ પર આધારિત છે, જેમાં તેમણે ચાર પાયાની સ્વતંત્રતાનો ઉલ્લેખ કર્યો હતો: અભિવ્યક્તિની સ્વતંત્રતા, પૂજાની સ્વતંત્રતા, જરૂરિયાતથી સ્વતંત્રતા અને ભયથી સ્વતંત્રતા. ફાઉન્ડેશનના પ્રમુખ હ્યુગો ડી જોંગે કહ્યું કે, "ઝેલેન્સકીએ ભય સામે ઝૂકવાને બદલે જે અડગતા બતાવી છે, તે સમગ્ર વિશ્વ માટે પ્રેરણારૂપ છે."
ડચ વડાપ્રધાનના હસ્તે સન્માન
નેધરલેન્ડ્સના વડાપ્રધાન રોબ ઝેટ્ટેને આ સમારોહમાં ઝેલેન્સકીનું સન્માન કર્યું હતું. નોંધનીય છે કે આ એવોર્ડ અગાઉ નેલ્સન મંડેલા, દલાઈ લામા, એન્જેલા મર્કેલ અને રેડ ક્રોસ જેવી આંતરરાષ્ટ્રીય સંસ્થાઓને મળી ચૂક્યો છે. હવે આ પ્રતિષ્ઠિત યાદીમાં વોલોડીમીર ઝેલેન્સકીનું નામ પણ ગૌરવપૂર્વક જોડાઈ ગયું છે.
યુક્રેન પર રશિયાના આક્રમણ પછી ઝેલેન્સકી જે રીતે પશ્ચિમી દેશોને એક કરવામાં અને પોતાના દેશની રક્ષા કરવામાં સફળ રહ્યા છે, તે જોતા આ એવોર્ડ તેમની રાજકીય કારકિર્દીનું અત્યાર સુધીનું સૌથી મોટું આંતરરાષ્ટ્રીય સન્માન માનવામાં આવે છે.
ફાઉન્ડેશનનો સંદેશ: "યુક્રેનના લોકોની આઝાદી માટેની લડાઈ એ માત્ર એક દેશની નહીં, પણ સમગ્ર માનવતાની સ્વતંત્રતા માટેની લડાઈ છે."