​તિરુવનંતપુરમ:​કેરળ કોંગ્રેસમાં આંતરિક જૂથબંધી અને ખેંચતાણ સપાટી પર આવી છે. કેરળના ચિરાયનકીઝુ વિસ્તારમાં શુક્રવારે રાત્રે કોંગ્રેસના જ કાર્યકરો અને પક્ષના મહિલા ધારાસભ્ય રમ્યા હરિદાસ વચ્ચે તીવ્ર બોલાચાલી થયા બાદ મામલો મારામારી સુધી પહોંચી ગયો હતો. આ હિંસક ઘર્ષણમાં પૂર્વ સાંસદ અને વર્તમાન MLA રમ્યા હરિદાસને ઈજાઓ પહોંચી હતી. બનાવ બાદ તેમને તાત્કાલિક સારવાર અર્થે ચિરાયનકીઝુ તાલુક હોસ્પિટલમાં દાખલ કરવામાં આવ્યા છે.

​આ ઘટનાને પગલે સ્થાનિક રાજકારણમાં ગરમાવો આવી ગયો છે. ઘટનાની ગંભીરતાને ધ્યાને લઈને પોલીસે ત્વરિત કાર્યવાહી કરતા ઘટનામાં સામેલ કોંગ્રેસ પક્ષના સાત કાર્યકર્તાઓ સામે ગુનો નોંધીને કાયદેસરની તપાસ શરૂ કરી છે.

​મળતી માહિતી મુજબ, શુક્રવારે મોડી રાત્રે સ્થાનિક સ્તરે પક્ષના જ કાર્યકરો અને ધારાસભ્ય વચ્ચે કોઈ મુદ્દા પર ઘર્ષણ શરૂ થયું હતું, જેણે જોતજોતામાં ઉગ્ર સ્વરૂપ ધારણ કરી લીધું હતું. આ દરમિયાન થયેલી હાથાપાઈમાં રમ્યા હરિદાસ ઈજાગ્રસ્ત થયા હતા. ઘટના બાદ પોલીસ કાફલો સ્થળ પર પહોંચી ગયો હતો અને પરિસ્થિતિ પર કાબૂ મેળવ્યો હતો.

​પોલીસે ધારાસભ્ય પર થયેલા હુમલા અને મારામારીના મામલે સાત જણા સામે કેસ નોંધીને આગળની કાનૂની કાર્યવાહી હાથ ધરી છે. જ્યારે બીજી તરફ પક્ષના પોતાના જ કાર્યકર્તાઓ દ્વારા મહિલા નેતા પર કરવામાં આવેલા આ હુમલાને લઈને કોંગ્રેસના સ્થાનિક સંગઠનમાં ભારે ઘમાસાણ મચી ગયું છે.