તિરુવનંતપુરમ | તા.૧૧: કેરળ વિધાનસભા ચૂંટણીમાં ૧૪૦માંથી ૧૦૨ બેઠકો જીતીને એક દાયકા બાદ ઐતિહાસિક પુનરાગમન કરનાર કોંગ્રેસ નેતૃત્વ હેઠળના યુનાઇટેડ ડેમોક્રેટિક ફ્રન્ટ (UDF) માં અત્યારે 'ઉજવણી' કરતા 'ઉચાટ' વધુ જોવા મળી રહ્યો છે. વિજયના અનેક દિવસો બાદ પણ આગામી મુખ્યમંત્રી કોણ બનશે તે અંગેનો કોયડો ઉકેલાયો નથી. આ વિલંબ અને આંતરિક જૂથબંધી વચ્ચે હવે ભાજપે પણ કોંગ્રેસની મજાક ઉડાવવાની તક ઝડપી લીધી છે, જેના કારણે કેરળનું રાજકીય નાટક વધુ રસપ્રદ બન્યું છે.
દિલ્હીમાં હાઈકમાન્ડ સ્તરે મલ્લિકાર્જુન ખડગે અને રાહુલ ગાંધીએ અનેક બેઠકો કરી હોવા છતાં કોઈ અંતિમ નામ પર મહોર વાગી શકી નથી. આ ગતિરોધને કારણે કેરળ અને દિલ્હીમાં વરિષ્ઠ નેતાઓ વીડી સતીસન, કેસી વેણુગોપાલ અને રમેશ ચેન્નીથલાના સમર્થકો રસ્તા પર ઉતરી આવ્યા છે અને પોતપોતાના નેતાના સમર્થનમાં પ્રદર્શનો કરી રહ્યા છે.
 
ભાજપની 'એક્સ' પરની પોસ્ટ અને રાજીવ ચંદ્રશેખરનો સૂચક જવાબ
કોંગ્રેસના આ આંતરિક સંઘર્ષ વચ્ચે કેરળ ભાજપે સોશિયલ મીડિયા પ્લેટફોર્મ 'X' પર એક વ્યંગ્યાત્મક પોસ્ટ શેર કરી હતી. આ પોસ્ટમાં લખવામાં આવ્યું હતું કે, "કેરળ ભાજપ અને રાષ્ટ્રીય ભાજપ વચ્ચે રમુજી જંગ છે. કેરળ ભાજપ ઈચ્છે છે કે કેસી વેણુગોપાલ કેરળના સીએમ બને, જ્યારે રાષ્ટ્રીય ભાજપ ઈચ્છે છે કે તેઓ દિલ્હીમાં જ રહે." આ પોસ્ટ પાછળનો તર્ક એવો હતો કે વેણુગોપાલ જ્યાં પણ રહે ત્યાં ભાજપને રાજકીય રીતે ફાયદો થઈ શકે છે.
આ પોસ્ટ પર કેરળ ભાજપના વડા અને ભૂતપૂર્વ કેન્દ્રીય મંત્રી રાજીવ ચંદ્રશેખરે હસતા અને 'ઝિપર મોઢા' વાળા ઇમોજી સાથે પ્રતિક્રિયા આપતા લખ્યું, "હું આ વાતની પુષ્ટિ કે ઇનકાર કરીશ નહીં." તેમના આ રહસ્યમય જવાબે સોશિયલ મીડિયા પર ખળભળાટ મચાવી દીધો છે અને કોંગ્રેસની મુશ્કેલીમાં વધારો કર્યો છે.
 
સત્તાના દાવેદારો: અનુભવ વિરુદ્ધ યુવા જોશ
મુખ્યમંત્રી પદની રેસમાં અત્યારે ત્રણ મુખ્ય નામો ચાલી રહ્યા છે:
•    કેસી વેણુગોપાલ: સંગઠનાત્મક તાકાત અને દિલ્હી હાઈકમાન્ડની નિકટતા ધરાવે છે.
•    વીડી સતીસન: વિધાનસભામાં વિપક્ષી નેતા તરીકે તેમની આક્રમક શૈલીને કારણે ધારાસભ્યોમાં લોકપ્રિય છે.
•    રમેશ ચેન્નીથલા: પક્ષના વરિષ્ઠ અને અનુભવી નેતા છે.
કોંગ્રેસ હાઈકમાન્ડ કોઈપણ એવું પગલું ભરવા માંગતું નથી જેનાથી પક્ષમાં ભંગાણ પડે, તેથી જ અજય માકન અને મુકુલ વાસનિક જેવા નિરીક્ષકોની હાજરીમાં સાવચેતીપૂર્વક મંથન ચાલી રહ્યું છે. જોકે, ભાજપના આ 'નામ સૂચન' અને મજાકિયા અંદાજે કોંગ્રેસને બચાવ પક્ષ પર લાવી દીધી છે. હવે જોવાનું એ રહેશે કે 'ભગવાનના પોતાના દેશ' ગણાતા કેરળની સત્તાની બાગડોર કોના હાથમાં સોંપવામાં આવે છે.