હરિયાણાના અંબાલા જિલ્લામાં રવિવારે બપોરે એક ગંભીર Building Collapseની ઘટના સામે આવી છે. ધૂલકોટ ગામ વિસ્તારમાં નિર્માણાધીન ઈમારતનું લેન્ટર નાખવાની કામગીરી ચાલી રહી હતી ત્યારે અચાનક આખી ઈમારત ધરાશાયી થઈ ગઈ. ઘટનાના સમયે મોટી સંખ્યામાં મજૂરો કામ કરી રહ્યા હતા, જેના કારણે અનેક લોકો કાટમાળ નીચે ફસાયા હોવાની આશંકા વ્યક્ત કરવામાં આવી હતી.

પ્રાપ્ત માહિતી મુજબ, ઈમારતના નિર્માણ કાર્યમાં આશરે 40થી 50 મજૂરો કામ કરી રહ્યા હતા. અચાનક બનેલી આ ઘટનાથી આસપાસના વિસ્તારમાં અફરાતફરી મચી ગઈ હતી. સ્થાનિક લોકો તાત્કાલિક ઘટનાસ્થળે પહોંચ્યા અને બચાવ કામગીરી શરૂ કરી હતી.

અકસ્મત બાદ સ્થાનિક લોકો અને Dial 112ની ટીમોએ કાટમાળમાંથી લોકોને બહાર કાઢવાની કામગીરી શરૂ કરી હતી. અત્યાર સુધીમાં ચાર મજૂરોના મોત થયાની માહિતી સામે આવી છે. જ્યારે કાટમાળમાંથી બહાર કાઢવામાં આવેલા 10 ઘાયલ શ્રમિકોને અંબાલા સિટી સિવિલ હોસ્પિટલમાં સારવાર માટે ખસેડવામાં આવ્યા છે.

હોસ્પિટલમાં તબીબોની દેખરેખ હેઠળ ઘાયલોની સારવાર ચાલી રહી છે. બીજી તરફ કાટમાળમાં હજુ અન્ય લોકો ફસાયેલા હોવાની આશંકાને પગલે રેસ્ક્યૂ ઓપરેશન સતત ચાલુ રાખવામાં આવ્યું છે.

ઘટનાની જાણ થતાં પોલીસ અને વહીવટી તંત્રના ઉચ્ચ અધિકારીઓ પણ ઘટનાસ્થળે પહોંચી ગયા હતા. JCB સહિતની ભારે મશીનરીની મદદથી કાટમાળ દૂર કરવાની કામગીરી કરવામાં આવી રહી છે. રેસ્ક્યૂ ટીમો કાટમાળના વિવિધ ભાગોમાં તપાસ કરી રહી છે, જેથી કોઈ વ્યક્તિ અંદર ફસાઈ હોય તો તેને શક્ય તેટલી ઝડપથી બહાર કાઢી શકાય.

વહીવટી તંત્રની પ્રાથમિકતા હાલમાં કાટમાળમાં ફસાયેલા લોકોને શોધી કાઢવાની અને ઘાયલોને તાત્કાલિક તબીબી સારવાર આપવાની છે. ઈમારત કયા કારણોસર અચાનક ધરાશાયી થઈ તે અંગેની તપાસ બચાવ કામગીરી પૂર્ણ થયા બાદ કરવામાં આવશે. અકસ્માત બાદ સ્થળ પર સુરક્ષા વ્યવસ્થા પણ વધારવામાં આવી છે.