વોશિંગ્ટન:અમેરિકાના પ્રમુખ ડોનાલ્ડ ટ્રમ્પે ઈરાન સામે સૂચિત લશ્કરી હુમલો રદ કરવાની જાહેરાત કરી છે. ટ્રમ્પે જણાવ્યું હતું કે ઈરાન સાથે એક કરારની મૂળભૂત રૂપરેખા પર સહમતિ સધાઈ ગઈ છે અને આ નિર્ણયમાં ઇઝરાયેલ પણ તેમની સાથે જોડાયેલું છે. પોતાની સોશિયલ મીડિયા પોસ્ટમાં ટ્રમ્પે દાવો કર્યો હતો કે તહેરાન અને પશ્ચિમ એશિયાના અન્ય દેશો તરફથી હોર્મુઝની સામુદ્રધુની (Strait of Hormuz) ને વાણિજ્યિક વાહનવ્યવહાર માટે સક્રિયપણે ખુલ્લી મૂકવાની ખાતરી આપવામાં આવ્યા બાદ આ મોટો લશ્કરી હુમલો રોકવામાં આવ્યો છે.

 ‘બીજા વિશ્વયુદ્ધ પછીનું સૌથી મોટું લશ્કરી દબાણ’, પણ શાંતિ માટે હુમલો ટાળ્યો - ટ્રમ્પ:

ટ્રમ્પે સોશિયલ મીડિયા પ્લેટફોર્મ પર લખ્યું હતું કે અમેરિકા ઈરાનની ઇસ્લામિક રિપબ્લિક સામે લશ્કરી તાકાત અને શક્તિના એવા સ્તરે કાર્યવાહી કરવા માટે સંપૂર્ણ તૈયાર હતું જે બીજા વિશ્વયુદ્ધ પછી ક્યારેય જોવામાં આવ્યું નથી. જોકે, ઈરાન અને મધ્ય પૂર્વના અન્ય દેશો દ્વારા હુમલો રોકવા માટે વિનંતી કરવામાં આવી હતી, કારણ કે કરારની વિગતો અને સીમાઓ નક્કી કરી લેવામાં આવી છે.

તેમણે ઉમેર્યું હતું કે આ પ્રસ્તાવિત સમજૂતી હેઠળ હોર્મુઝની સામુદ્રધુનીને તાત્કાલિક, સંપૂર્ણ અને આખરી રીતે ખુલ્લી મુકવામાં આવશે તથા ઈરાન તરફથી ઊભા થતા પરમાણુ ખતરાનો કાયમી અંત આવશે. વિશ્વના ભવિષ્યના લાભ માટે અને એક સમૃદ્ધ ઈરાનના અસ્તિત્વ માટે, ઝડપથી આ કરાર પૂર્ણ કરવાની શરતે હુમલો રદ કરવા અમેરિકા સંમત થયું છે. આ જોડાણમાં ઇઝરાયેલ દેશ પણ તેમની સાથે જોડાયેલો છે.

 અમેરિકી લશ્કરી હુમલાથી ઈરાનની સંરક્ષણ ક્ષમતા નબળી પડી - માર્કો રૂબિયો:

ટ્રમ્પની જાહેરાત બાદ અમેરિકાના વિદેશ મંત્રી માર્કો રૂબિયોએ દાવો કર્યો હતો કે વોશિંગ્ટનના લશ્કરી હુમલાઓને કારણે ઈરાન હવે તેના પરમાણુ કાર્યક્રમ અને હોર્મુઝની સામુદ્રધુની અંગે વાટાઘાટો કરવા માટે વધુ તૈયાર દેખાઈ રહ્યું છે.

એક ટીવી ઇન્ટરવ્યુ દરમિયાન તેમણે જણાવ્યું હતું કે અમેરિકી હુમલાઓએ ઈરાનની નૌકાદળ, વાયુસેના, મિસાઈલ ડિફેન્સ સિસ્ટમ્સ, લોન્ચર્સ અને હથિયાર ઉત્પાદન મથકોને ભારે નુકસાન પહોંચાડીને તેની સંરક્ષણ ક્ષમતાઓને અત્યંત નબળી પાડી દીધી છે. ઈરાન પાસે હજી પણ મિસાઈલો અને ડ્રોન છે જેનાથી તે નુકસાન પહોંચાડી શકે છે, પરંતુ તેમની પાસે જે પરંપરાગત લશ્કરી કવચ હતું તે હવે નષ્ટ થઈ ચૂક્યું છે. આ જ કારણસર ઈરાન હવે મજબૂતીની સ્થિતિમાંથી પરમાણુ મુક્ત થવા અને દરિયાઈ માર્ગો ખોલવા માટે વાટાઘાટો કરવા આતુર બન્યું છે.

 તહેરાનનો વળતો પ્રહાર - અમેરિકા ઈરાનની તાકાત સામે હિંમત કરી શકે તેમ નથી:

બીજી તરફ, ઈરાને અમેરિકી દાવાઓને ફગાવી દેતાં આકરો વલણ અપનાવ્યો છે. ટ્રમ્પના નિર્ણય પહેલા ઈરાનના સાંસદ હસન ઘશઘાવીએ સ્પષ્ટ કર્યું હતું કે યુદ્ધ ગમે તે દિશામાં આગળ વધે, પરંતુ હોર્મુઝની સામુદ્રધુનીમાં વાહનવ્યવહારનું સંચાલન તો તહેરાન દ્વારા જ કરવામાં આવશે. તેમણે ઉમેર્યું હતું કે મીડિયામાં તણાવ વધારવાની વાતો કરાય છે અને બીજી તરફ છુપા માર્ગોથી વાટાઘાટોની માંગણી કરાય છે. ઈરાનને છેતરી શકાય તેમ નથી અને સામુદ્રધુનીમાંથી પસાર થવા માટે ઈરાની ગોઠવણ જ એકમાત્ર વિકલ્પ છે.

દરમિયાન, ઈરાન-ચાઇના ચેમ્બર ઓફ કોમર્સ એન્ડ ઇન્ડસ્ટ્રીના પ્રમુખ મજિદરેઝા હરિરીએ સોશિયલ મીડિયા પર જણાવ્યું હતું કે વોશિંગ્ટન પાસે ઈરાનના ઉર્જા માળખાને લક્ષ્ય બનાવવાની હિંમત નથી. પ્રદેશના અન્ય દેશોની સરખામણીએ ઈરાનની ઇન્ફ્રાસ્ટ્રક્ચર બચાવવાની અને ટકી રહેવાની ક્ષમતા ખૂબ જ વધારે છે, તેથી અમેરિકા આવું સાહસ કરવાની તાકાત ધરાવતું નથી.