વોશિંગ્ટન : વિશ્વના વિવિધ ભાગોમાં ચાલી રહેલા સશસ્ત્ર સંઘર્ષો, રાજકીય અસ્થિરતા અને સુરક્ષા સામેના વધતા જોખમો વચ્ચે યુએસ સ્ટેટ ડિપાર્ટમેન્ટે તેના નાગરિકો માટે સૌથી ગંભીર ટ્રાવેલ એડવાઈઝરી જારી કરીને ૨૩ દેશોને લેવલ ૪ એટલે કે 'મુસાફરી ન કરો' (Do Not Travel) શ્રેણીમાં મૂક્યા છે. આ કડક ચેતવણીમાં રશિયા, યુક્રેન, ઈરાન, ઈરાક, અફઘાનિસ્તાન અને ઉત્તર કોરિયા જેવા દેશોનો સમાવેશ કરવામાં આવ્યો છે. અમેરિકી સરકારના જણાવ્યા મુજબ, આ એવા સ્થળો છે જ્યાં સ્થાનિક પરિસ્થિતિઓ અત્યંત જીવલેણ છે અને કટોકટીના સમયે પોતાના નાગરિકોને સહાય પૂરી પાડવાની સરકારની ક્ષમતા ખૂબ જ મર્યાદિત રહે છે.

આ લેવલ ૪ ની યાદીમાં અફઘાનિસ્તાન, બેલારુસ, બુર્કિના ફાસો, મ્યાનમાર, સેન્ટ્રલ આફ્રિકન રિપબ્લિક, ચાડ, ડેમોક્રેટિક રિપબ્લિક ઓફ કોંગો, હૈતી, ઈરાન, ઈરાક, લેબનોન, લિબિયા, માલી, નાઇજર, ઉત્તર કોરિયા, રશિયા, સોમાલિયા, દક્ષિણ સુદાન, સુદાન, સીરિયા, યુગાન્ડા, યુક્રેન અને યેમેનનો સમાવેશ થાય છે. આ ૨૩ દેશોમાંથી ૧૧ આફ્રિકન દેશો છે, જ્યાં આતંકવાદ, અપહરણ, ગુનાખોરી અને સશસ્ત્ર હિંસા જેવા પડકારો ચરમસીમા પર હોવાથી મુસાફરો માટે ભારે જોખમ ઊભું થાય છે.

અમેરિકી સ્ટેટ ડિપાર્ટમેન્ટ આંતરરાષ્ટ્રીય પ્રવાસ માટે ચાર-સ્તરીય સિસ્ટમ ધરાવે છે, જેમાં લેવલ ૧ સામાન્ય સાવધાની, લેવલ ૨ વધારાની સાવધાની, લેવલ ૩ પ્રવાસ અંગે પુનર્વિચાર અને લેવલ ૪ બિલકુલ મુસાફરી ન કરવાની સૂચના આપે છે. ભારતના સંદર્ભમાં અમેરિકાએ રાહત આપતાં તેને લેવલ ૨ એટલે કે 'વધારેલી સાવધાની રાખો' શ્રેણીમાં રાખ્યું છે, જેનો અર્થ એ થાય છે કે અમેરિકી નાગરિકો ભારતમાં પ્રવાસ કરી શકે છે પરંતુ તેમણે વધારાની તકેદારી રાખવાની રહેશે.

આ અગાઉ પણ વૈશ્વિક અસ્થિરતા કે યુદ્ધ જેવી સ્થિતિ વખતે સ્ટેટ ડિપાર્ટમેન્ટ દ્વારા ચોક્કસ ઝોન માટે આવી એડવાઈઝરીઓ બહાર પાડવામાં આવતી રહી છે. હાલમાં જારી કરાયેલી આ યાદી બાદ હવે વિવિધ દેશોમાં ફસાયેલા અમેરિકી નાગરિકો માટે આગામી દિવસોમાં વિશેષ સલાહ અને પ્રવાસન ક્ષેત્રે નવી માર્ગદર્શિકા જાહેર કરાય તેવી પૂરેપૂરી શક્યતા છે.