અંકારા:  યુગાન્ડાના રાષ્ટ્રપતિ યોવેરી મુસેવેનીના પુત્ર અને શક્તિશાળી આર્મી ચીફ જનરલ મુહૂઝી કૈનેરુગાબા ફરી એકવાર પોતાના વિવાદાસ્પદ અને અતાર્કિક નિવેદનોને કારણે દુનિયાભરમાં ચર્ચાનું કેન્દ્ર બન્યા છે. આ વખતે જનરલ મુહૂઝીની નજર તુર્કી પર છે. તેમણે સોશિયલ મીડિયા પ્લેટફોર્મ પર દાવો કર્યો છે કે સોમાલિયામાં આતંકવાદ સામે લડવા માટે યુગાન્ડાએ જે લશ્કરી ફાળો આપ્યો છે, તેના બદલામાં તુર્કીએ તેમને $1 બિલિયન (અંદાજે 8,400 કરોડ રૂપિયા) આપવા જોઈએ. જોકે, આ આર્થિક માંગણી કરતા પણ વધુ ચોંકાવનારી બાબત તેમની બીજી શરત છે, જેમાં તેમણે તુર્કીની 'સૌથી સુંદર મહિલા'ને પોતાની પત્ની બનાવવા માટે સોંપવાની માંગ કરી છે. આ પ્રકારની સામંતશાહી વિચારધારા ધરાવતી ટિપ્પણીએ આંતરરાષ્ટ્રીય સ્તરે મોટો વિવાદ ઊભો કર્યો છે.

જનરલ મુહૂઝીનો ઇતિહાસ આવા 'ગાંડાઘેલા' નિવેદનોથી ભરેલો છે. વર્ષ 2022 માં, જ્યારે ઇટાલીમાં જ્યોર્જિયા મેલોની વડાપ્રધાન બન્યા, ત્યારે મુહૂઝીએ જાહેરમાં જાહેરાત કરી હતી કે તેઓ મેલોની સાથે લગ્ન કરવા માંગે છે અને તેના બદલામાં ઇટાલીને 100 ઉત્તમ નસ્લની ગાયો ભેટમાં આપશે. જો ઇટાલી આ ઓફર ન સ્વીકારે, તો તેઓ રોમ પર હુમલો કરવાની ધમકી આપવા સુધી પણ ગયા હતા. આ અગાઉ તેમણે પાડોશી દેશ કેન્યાની રાજધાની નૈરોબીને માત્ર બે અઠવાડિયામાં કબજે કરવાની વાત પણ કરી હતી, જેના કારણે યુગાન્ડાની સરકારે માફી માંગવી પડી હતી અને રાષ્ટ્રપતિ મુસેવેનીએ પોતાના પુત્રને પદ પરથી હટાવવાની ફરજ પડી હતી, જોકે બાદમાં તેમને ફરીથી પ્રમોશન આપવામાં આવ્યું હતું.

યુગાન્ડામાં મુહૂઝીને તેમના પિતાના ઉત્તરાધિકારી અને ભાવિ રાષ્ટ્રપતિ તરીકે જોવામાં આવે છે, પરંતુ તેમની આ પ્રકારની "ટ્વિટર ડિપ્લોમસી" દેશની છબી ખરડી રહી છે. રાજદ્વારી નિષ્ણાતોનું માનવું છે કે તુર્કી જેવી પ્રાદેશિક મહાસત્તા સાથે આવા પ્રકારનો વ્યવહાર યુગાન્ડા માટે મોંઘો સાબિત થઈ શકે છે. તુર્કી હાલમાં આફ્રિકામાં પોતાનો પ્રભાવ વધારી રહ્યું છે અને યુગાન્ડામાં પણ તેનું મોટું રોકાણ છે, ત્યારે આર્મી ચીફની આવી વાહિયાત માંગણીઓ બંને દેશો વચ્ચેના સંબંધોમાં કડવાશ લાવી શકે છે. હાલમાં તુર્કીના વિદેશ મંત્રાલય તરફથી આ અંગે કોઈ સત્તાવાર પ્રતિક્રિયા આપવામાં આવી નથી, પરંતુ સોશિયલ મીડિયા પર લોકો આને 'ડિપ્લોમેટિક જોક' ગણાવી રહ્યા છે.