વોશિંગ્ટન :  મધ્ય-પૂર્વમાં ઈરાન અને અમેરિકા-ઇઝરાયલ વચ્ચે ચાલી રહેલા સૈન્ય સંઘર્ષે હવે અત્યંત ભયાનક વળાંક લઈ લીધો છે. ઇઝરાયલી વડાપ્રધાન બેન્જામિન નેતન્યાહૂ મંગળવારે વ્હાઇટ હાઉસ ખાતે અમેરિકી પ્રમુખ ડોનાલ્ડ ટ્રમ્પ સાથે એક અત્યંત મહત્વપૂર્ણ બેઠક યોજવા જઈ રહ્યા છે. વોશિંગ્ટનના કટ્ટર સમર્થક સેનેટર લિન્ડસે ગ્રેહામના અચાનક અવસાન બાદ તેમના અંતિમ સંસ્કારમાં હાજરી આપવાના બહાને યોજાઈ રહેલી આ ઇમરજન્સી મુલાકાત માત્ર ઈરાન જ નહીં પરંતુ સમગ્ર આરબ જગતનું ભવિષ્ય નક્કી કરશે. ટ્રમ્પના બીજા કાર્યકાળમાં નેતન્યાહૂની વ્હાઇટ હાઉસની આ સાતમી મુલાકાત છે, જે દર્શાવે છે કે ઈરાન વિરુદ્ધના મહાયુદ્ધમાં બંને દેશો એકજૂથ થઈને આક્રમક યોજના બનાવી રહ્યા છે.

આ મહાબેઠક એવા સમયે થઈ રહી છે જ્યારે અમેરિકા અને ઈરાન વચ્ચે તાજેતરમાં થયેલો યુદ્ધવિરામ કરાર (MoU) સંપૂર્ણપણે નિષ્ફળ ગયો છે અને સંઘર્ષ પાંચમા મહિનામાં પ્રવેશ્યો છે. ફેબ્રુઆરીના અંતમાં શરૂ થયેલા આ યુદ્ધમાં ઈરાને જોર્ડનમાં યુએસ બેઝ પર હુમલો કરીને ત્રણ અમેરિકી સૈનિકોને મોતને ઘાટ ઉતાર્યા હતા, જેના જવાબમાં યુએસ સેન્ટ્રલ કમાન્ડે ઈરાની ઠેકાણાઓ પર બોમ્બમારો તીવ્ર બનાવ્યો છે. ઇઝરાયલે શરૂઆતથી જ ઈરાન સાથેની શાંતિ વાટાઘાટોનો વિરોધ કર્યો હતો, અને હવે આ બેઠક બાદ ઇઝરાયલ ખુલ્લેઆમ યુદ્ધના મેદાનમાં કૂદીને ઈરાન પર પૂર્ણ કક્ષાનો હુમલો કરે તેવી પૂરી શક્યતા સેવાઈ રહી છે.

તેહરાન અને ઈરાની નેતૃત્વમાં હવે એ વાતનો ભય વ્યાપી ગયો છે કે ટ્રમ્પ અને નેતન્યાહૂની આ જુગલબંધી ઈરાનને સંપૂર્ણપણે નષ્ટ કરવાની વ્યૂહરચના તૈયાર કરી રહી છે. લેબનોનમાં હિઝબુલ્લાહ અને ઇઝરાયલ વચ્ચે ચાલી રહેલા સંઘર્ષ અને સીમા પરના કબજા અંગેની જટિલ પરિસ્થિતિ વચ્ચે ટ્રમ્પે કોઈ સમયમર્યાદા આપવાનો ઇનકાર કરી દીધો છે. ઇઝરાયલની સૈન્ય તાકાત આ યુદ્ધમાં પૂર્ણપણે જોડાઈ જતાં ઈરાન સામે ચારેય તરફથી વિનાશક ઘેરાબંધી સર્જાશે. આગામી મંગળવારની આ બેઠક બાદ મધ્ય-પૂર્વમાં શાંતિ સ્થાપાશે કે પછી ઈરાનનો કાયમી સફાયો થશે તેના પર આખી દુનિયાની નજર મંડાયેલી છે.