નવી દિલ્હી, તા. ૧૪: મશહૂર ઉદ્યોગપતિ સ્વર્ગસ્થ સંજય કપૂરના પરિવારમાં ચાલી રહેલો મિલકતનો જંગ હવે સુપ્રીમ કોર્ટના ઉંબરે પહોંચ્યો છે. સંજય કપૂરની માતા રાની કપૂર અને તેમની પત્ની પ્રિયા કપૂર વચ્ચે કરોડોની સંપત્તિ અને ‘આરકે ફેમિલી ટ્રસ્ટ’ પર કબજો મેળવવા માટે ચાલી રહેલી કાયદાકીય લડાઈ દરમિયાન સુપ્રીમ કોર્ટે આજે અત્યંત માનવીય અને ભાવુક અવલોકન કર્યું હતું. જસ્ટિસ જે.બી. પારડીવાલા અને ઉજ્જલ ભુયાનની બેન્ચે પક્ષકારોને વિવાદ વધારવાને બદલે શાંતિથી ઉકેલ લાવવા ટકોર કરી હતી.
 
ન્યાયાધીશની ટકોર: ‘ખાલી હાથે જવાનું છે’
સુનાવણી દરમિયાન ૮૦ વર્ષીય રાની કપૂરની હાલત અને પારિવારિક વિખવાદ જોઈને બેન્ચે કહ્યું કે, "આપણે બધા આ દુનિયામાં ખાલી હાથે આવ્યા હતા અને ખાલી હાથે જ જવું પડશે. અંતે આપણે ફક્ત આપણા આત્માને જ સાથે લઈ જઈએ છીએ. ૮૦ વર્ષની ઉંમરે આવી લડાઈ લડવાનો કોઈ અર્થ નથી." કોર્ટે પક્ષકારોને ‘ભારે હૃદય’ થી નહીં પણ સાચી ઇચ્છાશક્તિ સાથે મધ્યસ્થી (Mediation) પાસે જવા વિનંતી કરી હતી, જેથી આ લાંબી કાયદાકીય લડાઈનો અંત આવી શકે.
 
શું છે સમગ્ર વિવાદ?
સોના ગ્રુપના સંજય કપૂરના અવસાન બાદ તેમની માતા રાની કપૂરે આક્ષેપ કર્યો છે કે તેમની પુત્રવધૂ પ્રિયા સચદેવ કપૂરે એક ‘છેતરપિંડી ટ્રસ્ટ’ બનાવીને તેમને તેમના જ ઘરમાંથી અને મિલકતમાંથી બાકાત કરી દીધા છે. રાની કપૂરનો દાવો છે કે ૨૦૧૭માં તેમને સ્ટ્રોક આવ્યા બાદ તેમની લાચારીનો ફાયદો ઉઠાવીને પ્રિયા કપૂર અને સ્વર્ગસ્થ સંજય કપૂરે તેમની જાણ બહાર શેરહોલ્ડિંગ ટ્રસ્ટમાં ટ્રાન્સફર કરી દીધું હતું. હવે જ્યારે સંજય કપૂર હયાત નથી, ત્યારે પ્રિયા કપૂર કંપનીઓ પર સંપૂર્ણ નિયંત્રણ મેળવવા પ્રયાસ કરી રહી હોવાનો આક્ષેપ છે.
 
બોર્ડ મીટિંગ પર આંશિક રોક
તાજેતરનો વિવાદ રઘુવંશી ઇન્વેસ્ટમેન્ટ પ્રાઇવેટ લિમિટેડ (RIPL) ની બોર્ડ મીટિંગ બાબતે હતો. સુપ્રીમ કોર્ટે બેઠક અટકાવવાનો તો ઇનકાર કર્યો હતો, પરંતુ એવો આદેશ આપ્યો હતો કે બે સ્વતંત્ર ડિરેક્ટરોની નિમણૂક અને બેંક ખાતામાં સહી કરનાર વ્યક્તિના ફેરફાર જેવા મહત્વના મુદ્દાઓ પર અત્યારે કોઈ ચર્ચા કરવામાં આવશે નહીં. વરિષ્ઠ વકીલ કપિલ સિબ્બલે આરબીઆઈના નિયમોનો હવાલો આપ્યો હતો, જેની પર કોર્ટે કહ્યું કે કાયદાકીય પાલન જરૂરી છે પણ મધ્યસ્થી પર અસર ન પડવી જોઈએ.
 
કરિશ્મા કપૂરના બાળકોના હિતોનું રક્ષણ
આ કેસમાં દિલ્હી હાઈકોર્ટે અગાઉ બોલિવૂડ અભિનેત્રી કરિશ્મા કપૂર (સંજય કપૂરની પૂર્વ પત્ની) ના બે બાળકોના પક્ષમાં મહત્વનો ચુકાદો આપ્યો હતો. હાઈકોર્ટે પ્રિયા સચદેવ કપૂરને સંજય કપૂરની મિલકત પર કોઈપણ તૃતીય-પક્ષ અધિકારો બનાવવા પર રોક લગાવી દીધી હતી, જેથી સંજય કપૂરના પ્રથમ લગ્નથી થયેલા સંતાનોના હિસ્સાને નુકસાન ન થાય.
હવે સુપ્રીમ કોર્ટે ભારતના ભૂતપૂર્વ મુખ્ય ન્યાયાધીશ ડીવાય ચંદ્રચુડને મધ્યસ્થી તરીકે નિયુક્ત કર્યા છે અને આશા વ્યક્ત કરી છે કે પરિવાર આર્થિક લાલચ છોડીને સંબંધોની ગરિમા જાળવી રાખશે.