નવી દિલ્હી : સુપ્રીમ કોર્ટે શુક્રવારે એક અત્યંત મહત્વપૂર્ણ અને સંવેદનશીલ કેસની સુનાવણી કરતા મુસ્લિમોમાં બહુપત્નીત્વ (Polygamy) ની પ્રથાને ગેરબંધારણીય જાહેર કરવાની માંગ કરતી અરજી પર કેન્દ્ર સરકાર પાસે જવાબ માંગ્યો છે. સર્વોચ્ચ અદાલતે આ પ્રથા બંધારણ હેઠળ ભારતીય મહિલાઓને મળેલા મૂળભૂત અધિકારો અને ગૌરવપૂર્ણ જીવન જીવવાના અધિકારનું ઉલ્લંઘન કરે છે કે નહીં તે અંગે ચર્ચા વિચારણા શરૂ કરી છે.

ચીફ જસ્ટિસ સૂર્યકાંત, જસ્ટિસ જોયમલ્યા બાગચી અને જસ્ટિસ વી. મોહનની પીઠે મહિલા અધિકાર કાર્યકર્તાઓ ઝાકિયા સોમન અને નૂરજહાં સાફિયા નિયાઝ દ્વારા દાખલ કરવામાં આવેલી અરજી પર કેન્દ્રને નોટિસ જારી કરી છે. અરજીમાં માંગ કરવામાં આવી છે કે ભારતીય ન્યાય સંહિતા (BNS) ની કલમ 82 હેઠળ દ્વિપત્નીત્વ (Bigamy) અને બહુપત્નીત્વને ગુનો ગણાવતો કાયદો ધર્મના ભેદભાવ વગર દેશના તમામ નાગરિકો પર સમાન રીતે લાગુ કરવામાં આવે.

અરજીકર્તાઓની કોર્ટમાં મુખ્ય દલીલો:

·         સમાનતાનો અધિકાર: જ્યારે અન્ય ધર્મોમાં બીજું લગ્ન કરવું એ ફોજદારી ગુનો છે, ત્યારે મુસ્લિમ પર્સનલ લો હેઠળ કાયદાકીય છૂટછાટ આપવી એ બંધારણની કલમ 14, 15 અને 21 નું સ્પષ્ટ ઉલ્લંઘન છે.

·         ઇસ્લામનો સંદર્ભ: બહુપત્નીત્વ એ ઇસ્લામનો અનિવાર્ય ધાર્મિક ભાગ નથી, અને ટ્યુનિશિયા તથા તુર્કી જેવા અનેક મુસ્લિમ દેશોએ પણ આ પ્રથા પર સંપૂર્ણ પ્રતિબંધ મૂકેલો છે.

·         મહિલાઓનું શોષણ: આ પ્રથાથી મહિલાઓ અને બાળકોને ગંભીર આર્થિક, સામાજિક અને માનસિક યાતનાઓ સહન કરવી પડે છે.

અરજીમાં મુસ્લિમ પર્સનલ લો (શરિયત) એપ્લિકેશન એક્ટ, 1937 ની કલમ 2 ની બંધારણીય માન્યતાને પણ પડકારવામાં આવી છે. અરજદારોએ રાજ્ય સત્તાવાળાઓ સમક્ષ તમામ મુસ્લિમ લગ્નો અને છૂટાછેડાની ફરજિયાત નોંધણી કરવાની તેમજ પહેલી પત્ની અને બાળકો માટે વૈવાહિક ઘર અને ભરણપોષણનો અધિકાર સુનિશ્ચિત કરવાની પણ માંગ કરી છે. સુપ્રીમ કોર્ટે આ મામલાને અગાઉથી પેન્ડિંગ રહેલી સમાન અરજીઓ સાથે જોડીને આગળની કાર્યવાહી હાથ ધરી છે.