નવી દિલ્હી, તા.૦૧: વાહનચાલકો દ્વારા ટ્રાફિક નિયમોના ઉલ્લંઘન બાદ ઈ-ચલણની બાકી રકમ ન ચૂકવવાની બેદરકારી સામે સુપ્રીમ કોર્ટે લાલ આંખ કરી છે. જસ્ટિસ જે.બી. પારડીવાળા અને જસ્ટિસ કે.વી. વિશ્વનાથનની પીઠે સડક સુરક્ષા સંબંધિત એક મહત્વપૂર્ણ સુનાવણી દરમિયાન દેશના તમામ રાજ્યો અને કેન્દ્રશાસિત પ્રદેશોને કડક નિર્દેશ આપ્યા છે. અદાલતે સ્પષ્ટ આદેશ આપ્યો છે કે જે વાહનોના ટ્રાફિક દંડ લાંબા સમયથી અણચૂકવ્યા છે, તેમની તમામ ઓનલાઇન પરિવહન સેવાઓ તાત્કાલિક અસરથી ફ્રીઝ કરી દેવામાં આવે, જેથી વાહનચાલકો દંડ ભરવા માટે બાધ્ય બને.

આ કડક પગલું ભરવા પાછળનું મુખ્ય કારણ દેશભરમાં કરોડો રૂપિયાના અણવસૂલાયેલા ઈ-ચલણનો મોટો આંકડો છે. સુપ્રીમ કોર્ટ સમક્ષ રજૂ કરવામાં આવેલા સત્તાવાર આંકડા મુજબ, દેશભરમાં અત્યાર સુધીમાં આશરે રૂ. ૪૯,૧૯૪ કરોડના ઈ-ચલણ ઇશ્યૂ કરવામાં આવ્યા છે, જેમાંથી માત્ર રૂ. ૨૬,૧૭૫ કરોડની જ વસૂલાત થઈ શકી છે. આ પરિસ્થિતિ અંગે ચિંતા વ્યક્ત કરતા જસ્ટિસ જે.બી. પારડીવાળા અને જસ્ટિસ કે.વી. વિશ્વનાથનની ખંડપીઠે ટિપ્પણી કરી હતી કે, 'માત્ર લાખોની સંખ્યામાં ઈ-ચલણ ઇશ્યૂ કરવાથી કોઈ ફાયદો નથી, જ્યાં સુધી તેની જમીની સ્તર પર કડક વસૂલાત ન થાય'.

અદાલતના આ આદેશ બાદ હવે કેન્દ્રીય 'પરિવહન' પોર્ટલ પર બાકીદાર વાહનોને બ્લેકલિસ્ટ કરવાની કામગીરી શરૂ કરવામાં આવશે. આ બ્લેકલિસ્ટિંગના કારણે વાહન માલિકોને સૌથી મોટો ફટકો PUC (પોલ્યુશન અંડર કંટ્રોલ) સર્ટિફિકેટ મેળવવામાં પડશે, કારણ કે જૂનો દંડ ભર્યા વિના કોઈપણ સેન્ટર પરથી PUC ઈશ્યૂ થઈ શકશે નહીં. આ ઉપરાંત, વાહનની ખરીદ-વેચાણ કે માલિકી ટ્રાન્સફર (RC Transfer) ની પ્રક્રિયા પણ સંપૂર્ણપણે અટકી જશે, જેનાથી વાહન વેચવું કે ખરીદવું અશક્ય બની જશે.

આટલું જ નહીં, રજિસ્ટ્રેશન સર્ટિફિકેટ (RC) નું રિન્યુઅલ, ડુપ્લિકેટ RC મેળવવી, સરનામું બદલવું તેમજ વાહનના ફિટનેસ સર્ટિફિકેટ મેળવવા સંબંધિત તમામ મહત્વપૂર્ણ કામગીરીઓ પૂરેપૂરી ઠપ્પ થઈ જશે. વારંવાર ટ્રાફિક નિયમોનું ઉલ્લંઘન કરનારા અને દંડ ન ભરનારા વાહનચાલકોનું ડ્રાઇવિંગ લાયસન્સ રિન્યુ કરવામાં નહીં આવે અને ચાલુ લાયસન્સને પણ તાત્કાલિક અસરથી સસ્પેન્ડ કરવા માટે સત્તાવાળાઓને સ્પષ્ટ સૂચના આપવામાં આવી છે.

સુપ્રીમ કોર્ટે પોલીસ અને સ્થાનિક ટ્રાફિક પ્રશાસનને વધારાની સત્તા આપતા સ્પષ્ટ કર્યું છે કે, રસ્તાઓ પર ઓચિંતા ચેકિંગ દરમિયાન જો કોઈ વાહન પર અણચૂકવ્યા ઈ-ચલણ જણાય, તો તંત્ર તે વાહનને સ્થળ પર જ જપ્ત (Seize) કરી શકશે. કોર્ટે ભારપૂર્વક જણાવ્યું હતું કે ટ્રાફિક નિયમોનું પાલન માત્ર કાગળ પર નહીં પરંતુ રસ્તાઓ પર પ્રત્યક્ષ રીતે દેખાવું જોઈએ, જેથી રોડ અકસ્માતો પર નિયંત્રણ મેળવી શકાય અને રસ્તા પરના શિસ્તમાં સુધારો લાવી શકાય.

ઉલ્લેખનીય છે કે, દેશમાં સીસીટીવી અને ઓટોમેટિક કેમેરા દ્વારા ઈ-ચલણ ફાડવાની સિસ્ટમ અમલમાં આવ્યા બાદ દંડ ન ભરવાની પ્રવૃત્તિમાં સતત વધારો થયો હતો. સત્તાવાળાઓ હવે સુપ્રીમ કોર્ટના આ આદેશનો ઝડપથી અમલ કરવાની તૈયારી કરી રહ્યા છે. આ નિર્ણયના પરિણામે લાખો વાહનચાલકોએ પોતાની ઓનલાઇન સેવાઓ પુનઃશરૂ કરાવવા માટે બાકી રહેલા તમામ ઈ-ચલણની ચુકવણી સત્વરે કરવી પડશે, અન્યથા રસ્તા પર વાહન ચલાવવું મુશ્કેલ બની જશે.