ચેન્નાઈ:  તમિલનાડુ વિધાનસભા ચૂંટણી ૨૦૨૬ના પડઘમ વાગી રહ્યા છે ત્યારે ‘થલપતિ’ તરીકે જાણીતા અભિનેતા અને તમિલગા વેત્રી કઝગમ (TVK) ના સ્થાપક વિજય માટે કાયદાકીય મુસીબત ઊભી થઈ છે. મદ્રાસ હાઈકોર્ટે વિજયને તેમના ચૂંટણી સોગંદનામામાં આશરે ૧૦૦ કરોડ રૂપિયાની સંપત્તિની વિસંગતતા મુદ્દે ઔપચારિક નોટિસ ફટકારી છે. મુખ્ય ન્યાયાધીશ એસ.એ. ધર્માધિકારી અને ન્યાયાધીશ જી. અરુલ મુરુગનની બેન્ચે આ મામલાને ગંભીર ગણાવ્યો છે.
એક ઉમેદવાર અને બે અલગ આંકડા
ચેન્નાઈના રહેવાસી વી. વિગ્નેશ દ્વારા દાખલ કરવામાં આવેલી અરજી મુજબ, વિજયે બે અલગ-અલગ બેઠકો માટે ફાઇલ કરેલા સોગંદનામામાં સંપત્તિના આંકડામાં મોટો તફાવત જોવા મળ્યો છે. પેરામ્બુર મતવિસ્તાર માટે તેમણે ૧૧૫.૧૩ કરોડ રૂપિયાની સંપત્તિ જાહેર કરી હતી, જ્યારે ત્રિચી (પૂર્વ) બેઠક માટેના ફાઇલિંગમાં આ આંકડો વધીને ૨૨૦.૧૫ કરોડ રૂપિયા થઈ ગયો હતો. આટલી મોટી રકમનો ખુલાસો ન કરવો અથવા આંકડામાં વિસંગતતા હોવી તેને કોર્ટે ગંભીર "અનિયમિતતા" ગણાવી છે.
ગુનાહિત રેકોર્ડ છુપાવ્યાનો પણ આરોપ
નાણાકીય વિસંગતતાઓ ઉપરાંત વિજયના કાનૂની રેકોર્ડ પર પણ સવાલો ઉઠ્યા છે. આરોપ છે કે એક સોગંદનામામાં તેમણે પોતાની સામે કોઈ કેસ ન હોવાનું જણાવ્યું હતું, જ્યારે બીજા સોગંદનામામાં બાકી રહેલી એફઆઈઆર (FIR) નો ઉલ્લેખ કર્યો હતો. આ વિરોધાભાસી માહિતીને કારણે તેમની ચૂંટણી લડવાની કાનૂની સ્થિતિ વધુ જટિલ બની શકે છે.
ચૂંટણી પહેલા તપાસની માંગ
અરજદારે માંગ કરી છે કે ૨૩ એપ્રિલના મતદાન પહેલા આ મામલે આવકવેરા વિભાગ દ્વારા સંપૂર્ણ તપાસ કરવામાં આવે અને તેનો રિપોર્ટ જાહેર કરવામાં આવે. જનતા મતદાન કરે તે પહેલા તેમને ઉમેદવારની સાચી સંપત્તિ અને સ્ત્રોત વિશે જાણવાનો અધિકાર છે. હાઈકોર્ટે હવે વિજયની સાથે સાથે ચૂંટણી પંચ અને આવકવેરા વિભાગ પાસેથી પણ આ અંગે સ્પષ્ટતા માંગી છે.
 
સોગંદનામામાં વિસંગતતાની વિગતો:
•    પેરામ્બુર બેઠક: ૧૧૫.૧૩ કરોડની સંપત્તિ જાહેર કરી.
•    ત્રિચી (પૂર્વ) બેઠક: ૨૨૦.૧૫ કરોડની સંપત્તિ જાહેર કરી.
•    તફાવત: આશરે ૧૦૦ કરોડ રૂપિયા.
•    મુખ્ય મુદ્દો: સંપત્તિ છુપાવવી અને એફઆઈઆર અંગે ખોટી માહિતી આપવી.