મેડ્રિડ, : સ્પેનના દક્ષિણ-પૂર્વ ભાગમાં આવેલા મેડ્રિગુએરાસ શહેરમાં શુક્રવારે અચાનક ત્રાટકેલા ભારે વરસાદ અને પૂરના પ્રકોપના કારણે જનજીવન સંપૂર્ણપણે અસ્તવ્યસ્ત થઈ ગયું હતું, જ્યાં માત્ર થોડા કલાકોમાં પ્રતિ ચોરસ મીટર ૧૪૨ લિટર જેટલો જંગી વરસાદ નોંધાતા રસ્તાઓ પર કારો પાણીમાં તછડતી નજરે પડી હતી.

આ ભયાનક કુદરતી આપત્તિ દરમિયાન અગ્નિશામક દળની ટીમે તાત્કાલિક ધોરણે બચાવ કામગીરી હાથ ધરીને પૂરના પાણીમાં ફસાયેલા આશરે ૯૦ જેટલા નાગરિકોને સુરક્ષિત સ્થળે ખસેડવામાં મોટી સફળતા મેળવી હતી.

પ્રાદેશિક સત્તાવાળાઓ દ્વારા આપવામાં આવેલી સત્તાવાર માહિતી મુજબ, પૂરના પાણી ઘરમાં પ્રવેશી જતા અને જળસ્તર એક મીટર એટલે કે ત્રણ ફૂટથી વધુ ઊંચું થઈ જતા ૧૦૨ વર્ષીય વૃદ્ધ મહિલાનું તેના જ ઘરમાં ડૂબી જવાથી કરૂણ મૃત્યુ નીપજ્યું હતું, જેનો મૃતદેહ અગ્નિશામકો દ્વારા શોધી કાઢવામાં આવ્યો હતો.

આ દુર્ઘટના અગાઉ સ્પેનમાં અત્યાર સુધીનો સૌથી ગરમ ઉનાળો નોંધાયો હતો, જેમાં ઓગસ્ટ મહિના દરમિયાન ગરમી સંબંધિત કારણોસર અંદાજે ૨,૧૫૦ જેટલા લોકોના મૃત્યુ થયા હોવાના અહેવાલો સામે આવ્યા હતા, અને હવે અચાનક પૂરની આફત ત્રાટકતા લોકોની મુશ્કેલીઓમાં વધુ વધારો થયો છે.

શુક્રવારે સ્પેનના દક્ષિણ-પૂર્વ તેમજ ઉત્તર-પૂર્વના અનેક વિસ્તારોમાં વરસેલા ભારે વરસાદને પગલે સ્થાનિક વહીવટી તંત્ર અને આપત્તિ વ્યવસ્થાપન ટીમો હરકતમાં આવી ગઈ છે, અને ક્ષતિગ્રસ્ત વિસ્તારોમાં નુકસાનનું આકલન તથા રાહત કાર્યો યુદ્ધના ધોરણે ચાલુ રાખવામાં આવ્યા છે.