બેંગલુરુ : દેશની આઈટી રાજધાની ગણાતા બેંગલુરુ શહેરમાં આજે સાંજે આકાશી આફતે ભારે તાંડવ મચાવ્યું છે. પૂર્વ અને ઉત્તર-પૂર્વ બેંગલુરુ સહિત સમગ્ર મેટ્રો સિટીમાં વીજળીના કડાકા-ભડાકા અને કલાકના ૪૦ કિમીની ઝડપે ફૂંકાયેલા તેજ પવન સાથે મુસળધાર વરસાદ તૂટી પડ્યો છે. હવામાન વિભાગે બેંગલુરુ શહેરી અને ગ્રામીણ જિલ્લાઓ માટે તાત્કાલિક અસરથી 'યલો એલર્ટ' જાહેર કરીને નાગરિકોને ઘરમાં જ રહેવાની અને બિનજરૂરી પ્રવાસ ટાળવાની કડક સલાહ આપી છે.

IT હબમાં જળબંબાકાર: રસ્તાઓ સ્વિમિંગ પૂલ બન્યા, વાહનચાલકો અટવાયા

શહેરના મહાદેવપુરાથી લઈને વ્હાઇટફિલ્ડ સુધીના ટેક-પાર્ક વિસ્તારો તેમજ હેબ્બાલ, મેખરી સર્કલ, મલ્લેશ્વરમ, સેન્ટ્રલ બિઝનેસ ડિસ્ટ્રિક્ટ, યશવંતપુર, રિચમંડ ટાઉન, એમ.જી. રોડ અને સરજાપુરમાં સાંજના સમયે તૂટી પડેલા ધોધમાર વરસાદને કારણે ઘૂંટણસમા પાણી ભરાઈ ગયા હતા. ઓફિસેથી ઘરે પરત ફરી રહેલા લાખો આઈટી પ્રોફેશનલ્સ અને વાહનચાલકો ભીષણ ટ્રાફિક જામમાં અટવાઈ પડ્યા હતા. આગામી ૨ થી ૩ કલાકમાં સપ્ટેમ્બર મહિનાનો સૌથી ભયાનક વરસાદ પડવાની શક્યતા છે, જેનાથી નીચાણવાળા વિસ્તારોમાં જળબંબાકારની સ્થિતિ વધુ વકસી શકે છે.

કર્ણાટકના ૮ જિલ્લાઓમાં ઓરેન્જ અને યલો એલર્ટ: મલનાડમાં ભારે વરસાદની આશંકા

હવામાન ખાતાના જણાવ્યા મુજબ, વરસાદી માહોલ માત્ર બેંગલુરુ પૂરતો સીમિત નથી પરંતુ સમગ્ર કર્ણાટકમાં વ્યાપક અસર બતાવી રહ્યો છે. ઉડુપી અને દક્ષિણ કન્નડના દરિયાકાંઠાના વિસ્તારો ઉપરાંત શિવમોગ્ગા, ચિક્કમગલુરુ, હસન અને કોડાગુ જેવા મલનાડ વિસ્તારોમાં ભારેથી અતિભારે વરસાદની આગાહી કરવામાં આવી છે.

બીજી તરફ, ઉત્તર આંતરિક કર્ણાટકના બેળગાવી, ધારવાડ, ગદગ અને હાવેરી જિલ્લામાં ૩૦ થી ૪૦ કિમીની ઝડપે પવન ફૂંકાવાની સાથે મધ્યમ વરસાદી ઝાપટાં પડવાની શક્યતા છે. જ્યારે બગલકોટ, બીદર, કલાબુરાગી અને રાયચુર જેવા જિલ્લાઓમાં હવામાન સૂકું રહેશે તેમ કર્ણાટક રાજ્ય પ્રાકૃતિક આપત્તિ નિરીક્ષણ કેન્દ્ર (KSNDMC) એ જણાવ્યું છે.