નવી દિલ્‍હી,તા.૮: વિશ્વની સૌથી મોટી ઑઇલ-નિકાસકાર કંપની સાઉદી અરામકોએ એશિયાના દેશો-વેપારીઓ માટે નવેમ્‍બરમાં ‘આરબ લાઇટ' ક્રૂડ-ઑઇલના ભાવમાં ૬ વર્ષનું સૌથી મોટું ડિસ્‍કાઉન્‍ટ જાહેર કર્યું છે. અરામકો એશિયન ગ્રાહકોને

ઓમાન-દુબઈ બેન્‍ચમાર્ક કરતાં બેરલદીઠ ૪૮૦ રૂપિયા (પાંચ ડોલર) ઓછા ભાવે ક્રૂડ વેચશે જે ડિસ્‍કાઉન્‍ટ ઑક્‍ટોબરમાં ૧૯૨ રૂપિયા (બે ડોલર) હતું. ભારે ગ્રેડના ક્રૂડમાં પણ બેરલદીઠ ૪૮૦ રૂપિયા (પાંચ ડોલર)નો ઘટાડો કરાયો છે.

વિશ્વના સૌથી મોટા ક્રૂડ-આયાતકાર દેશોમાં સામેલ ભારતને આ નિર્ણયથી બે મોટા ફાયદા થશે. પ્રથમ, વેચાણભાવ ઘટવાથી ભારતીય રિફાઇનરીઓને સાઉદીનું ક્રૂડ-ઑઇલ સસ્‍તું મળશે. બીજું, એશિયાના માર્કેટમાં અમેરિકા, રશિયા અને ઇરાક સામે માર્કેટ-શેર બચાવવા સાઉદી સ્‍પર્ધામાં ઊતર્યું હોવાથી ભારતીય રિફાઇનરીઓ રશિયા અને ઇરાક જેવા અન્‍ય સપ્‍લાયરો સાથે વધુ સારી શરતોએ ભાવતાલ કરી શકશે. જોકે ભારતને મળનારો વાસ્‍તવિક લાભ ક્રૂડની અંતિમ લેન્‍ડેડ-કોસ્‍ટ પર આધાર રાખશે.