જમ્મુ, તા. ૧૩ : નિયંત્રણરેખા પારનો વેપાર સ્થગિત થયાના સાત વર્ષ બાદ ઉત્તર કાશ્મીરના ઉરી ખાતે આવેલું સલામાબાદ વેપાર સુવિધા કેન્દ્ર હવે સરહદી પ્રવાસનના નવા કેન્દ્ર તરીકે વિકસાવાશે. પ્રવાસન વિભાગને કેન્દ્રની મિલકત અને ઉપલબ્ધ માળખાનો પ્રવાસન પ્રવૃત્તિઓ માટે ઉપયોગ કરવાની સૈદ્ધાંતિક મંજૂરી મળી ગઈ છે.

કાશ્મીરના પ્રવાસન નિયામક સૈયદ કમર સજ્જાદના જણાવ્યા અનુસાર કેન્દ્ર ખાતે ઉપલબ્ધ ઇમારતો, ખુલ્લી જગ્યા અને અન્ય સુવિધાઓનું મૂલ્યાંકન કરવામાં આવશે. પ્રવાસીઓને જરૂરી સુવિધા, સરળ અવરજવર અને નિયંત્રણરેખા નજીકનાં દર્શનીય સ્થળોની મુલાકાત માટે સંબંધિત એજન્સીઓ સાથે સંકલન કરાશે. વિગતવાર ઉપયોગ યોજના હવે તૈયાર થવાની છે.

સલામાબાદ કેન્દ્ર નિયંત્રણરેખા પારના વેપાર માટે સ્થાપવામાં આવેલા બે કેન્દ્રોમાંનું એક હતું. બીજું કેન્દ્ર પુંછના ચક્કાં-દા-બાગ ખાતે આવેલું છે. ભારત અને પાકિસ્તાન વચ્ચે વિશ્વાસવર્ધક પગલાંરૂપે ૨૧ ઑક્ટોબર, ૨૦૦૮થી આ વેપાર શરૂ થયો હતો. કોઈ ચલણ કે આયાતજકાત વગર ચીજવસ્તુઓની અદલાબદલી થતી હતી.

ગેરકાયદે હથિયારો, નશીલા પદાર્થો અને નકલી ચલણની હેરફેર માટે માર્ગનો દુરુપયોગ થતો હોવાના અહેવાલ બાદ એપ્રિલ, ૨૦૧૯માં વેપાર સ્થગિત કરાયો હતો. પ્રવાસન વિકાસથી ઉરી અને સરહદી ગામોમાં સ્થાનિક યુવાઓ માટે રોજગાર તથા આજીવિકાની નવી તકો ઊભી થવાની આશા છે.