મોસ્કો:   વિશ્વ અત્યારે ઈરાન અને અમેરિકા વચ્ચેના ભીષણ સંઘર્ષને કારણે ગંભીર ઈંધણ સંકટનો સામનો કરી રહ્યું છે, જેની અસર ભારતમાં પણ વર્તાઈ રહી છે. સ્થિતિ એટલી નાજુક છે કે વડાપ્રધાન નરેન્દ્ર મોદી સહિતના ટોચના નેતાઓએ પોતાના કાફલા ઘટાડીને જનતાને ઈંધણ બચાવવાની અપીલ કરવી પડી છે. આ કટોકટીના સમયે, રશિયાએ ભારતનો હાથ મજબૂતીથી પકડ્યો છે. રશિયન વિદેશ પ્રધાન સેર્ગેઈ લવરોવે સ્પષ્ટ કર્યું છે કે ભલે ગમે તેટલું આંતરરાષ્ટ્રીય દબાણ હોય, રશિયા ભારતને તેલ, ગેસ અને કોલસાનો પુરવઠો કોઈપણ અવરોધ વિના ચાલુ રાખશે, જેથી ભારતના આર્થિક હિતો સુરક્ષિત રહે.

લવરોવે દિલ્હીની મુલાકાત પહેલા વડાપ્રધાન મોદીની મુક્તકંઠે પ્રશંસા કરતા તેમને વિશ્વના સૌથી ઉર્જાવાન નેતા ગણાવ્યા છે. તેમણે કુડનકુલમ ન્યુક્લિયર પાવર પ્લાન્ટને બંને દેશોના અતૂટ સહયોગનું પ્રતીક ગણાવ્યું અને ખાતરી આપી કે ૨૦૨૭ સુધીમાં આ પ્લાન્ટ ભારતની ઉર્જા જરૂરિયાતો પૂર્ણ કરવા માટે સંપૂર્ણ સજ્જ થઈ જશે. રશિયાના મતે 'હિન્દી-રુસી ભાઈ-ભાઈ' માત્ર એક જૂનું સૂત્ર નથી, પરંતુ રશિયાના ઘર-ઘરમાં લોકપ્રિય ભારતીય સિનેમા અને સંસ્કૃતિ સાથે જોડાયેલી એક અતૂટ લાગણી છે, જે કોઈપણ વૈશ્વિક દબાણ સામે ઝૂકશે નહીં.

આ મિત્રતા માત્ર ઉર્જા પુરવઠા પૂરતી મર્યાદિત નથી, પરંતુ સંરક્ષણ અને વ્યૂહાત્મક સ્તરે પણ એટલી જ મજબૂત છે. લવરોવે ઈશારામાં પશ્ચિમી શક્તિઓ પર નિશાન સાધતા કહ્યું કે કેટલીક તાકાતો ભારત-રશિયાના સંબંધોમાં તિરાડ પાડવા અને પોતાના નિયમો લાદવા માંગે છે, પરંતુ તેમના તમામ પ્રયાસો નિષ્ફળ રહ્યા છે. રશિયાએ સાબિત કર્યું છે કે જ્યારે મિત્ર દેશ સંકટમાં હોય, ત્યારે તેઓ માત્ર કરારો નથી નિભાવતા પણ ખડકની જેમ સાથે ઉભા રહે છે. આ આર્થિક અને રાજદ્વારી ખાતરી આગામી સમયમાં ભારતના વિકાસ રથને અટકતો રોકવામાં નિર્ણાયક સાબિત થશે.