નવી દિલ્હી તા.૨૬ : ઉત્તર પ્રદેશના હરદોઈમા વિશ્વાસનું કાળું કૃત્ય સામે આવ્યું છે. ઘરમાં રાખેલા 1.29 કરોડ રૂપિયાની રોકડ પર નોકરોની જ નજર બગડી અને તેઓ 8 બેગ ભરીને ફરાર થઈ ગયા.

ઘરમાં 1.29 કરોડ રૂપિયા રોકડા પડ્યા હતા. તક મળતા જ ઘરના નોકરોએ ષડયંત્ર રચ્યું. આરોપીઓએ માલિકોના ભોજનમાં ઊંઘની ગોળીઓ ભેળવી દીધી. ભોજન કર્યા બાદ ઘરના સભ્યો બેભાન થઈ ગયા.

આ તકનો ફાયદો ઉઠાવીને નોકરોએ રોકડ ભરેલી 8 બેગ લઈને ઘરમાંથી ચંપત થઈ ગયા.

ઘટનાની જાણ થતાની સાથે જ પોલીસે તપાસ શરૂ કરી છે. સીસીટીવી ફૂટેજ અને અન્ય પુરાવાઓના આધારે આરોપીઓને ઝડપી પાડવા માટે ટીમો બનાવવામાં આવી છે.

આ ઘટનાથી વિસ્તારમાં ચકચાર મચી જવા પામી છે. પોલીસ લોકોને અપીલ કરી રહી છે કે ઘરમાં કામ કરતા નોકરોની પૂરતી ચકાસણી કર્યા બાદ જ તેમને રાખવામાં આવે.

પોલીસનું કહેવું છે કે આરોપીઓને જલ્દીથી ઝડપીને રકમ પરત મેળવવાના પ્રયાસો ચાલી રહ્યા છે.