નવી દિલ્હી, તા.૧૭: વડાપ્રધાન નરેન્દ્ર મોદી અને આજની 'જનરેશન Z' (Gen Z) એટલે કે ઇન્ટરનેટ યુગના યુવાનો વચ્ચે ભલે પેઢીઓનું મોટું અંતર હોય, પરંતુ તેમની વચ્ચેનું આ અંતર હવે સ્માર્ટફોન અને ડિજિટલ મીડિયાના માધ્યમથી ઝડપથી ઘટી રહ્યું છે. જે પેઢીનું ધ્યાન ખેંચવું અત્યંત મુશ્કેલ માનવામાં આવે છે અને જે લાંબા ભાષણોના બદલે કન્ટેન્ટને તુરંત સ્ક્રોલ કરી દે છે, તે યુવાનો સુધી પહોંચવા માટે પીએમ મોદીએ પોતાની સંચાર વ્યૂહરચનામાં આશ્ચર્યજનક બદલાવ કર્યો છે. લાંબા રાજકીય ભાષણોના બદલે હવે તેમણે રીલ્સ, પોડકાસ્ટ, ગેમિંગ અને કન્ટેન્ટ ક્રિએટર્સની દુનિયામાં પ્રવેશ કરીને યુવાનો સાથે વાસ્તવિક જોડાણ સાધ્યું છે.

આ નોખી સંવાદ શૈલીની શરૂઆત ૨૦૧૮માં ‘પરીક્ષા પે ચર્ચા’ (Pariksha Pe Charcha) થી થઈ હતી, જ્યાં તેમણે રાજકારણથી દૂર રહીને એક વાલી અને માર્ગદર્શક તરીકે વિદ્યાર્થીઓ સાથે એન્ઝાયટી, પીઅર પ્રેશર અને ટાઈમ મેનેજમેન્ટ પર મુક્તચર્ચા કરી હતી. આ સફળતા બાદ, તેમણે ડિજિટલ સ્પેસમાં હાજરી વધારી. માર્ચ ૨૦૨૪માં યોજાયેલા પ્રથમ 'નેશનલ ક્રિએટર્સ એવોર્ડ' (National Creators Award) અને ગેમર્સ તથા કોડર્સ સાથેની તેમની સીધી મુલાકાતે સાબિત કર્યું કે તેઓ યુવા ભારતીયોની આકાંક્ષાઓને સારી રીતે સમજે છે. ગેમિંગ, એનિમેશન અને AI ને માત્ર શોખ નહીં પરંતુ દેશની અર્થવ્યવસ્થા અને ભવિષ્યની કારકિર્દી તરીકે પ્રોત્સાહન આપીને તેમણે યુવાનોમાં નવો વિશ્વાસ જગાડ્યો છે.

આ સિવાય, 'સ્ટાર્ટ-અપ ઈન્ડિયા' હેઠળ ૨.૨૩ લાખથી વધુ માન્યતાપ્રાપ્ત સ્ટાર્ટ-અપ્સ અને ₹૧૦,૦૦૦ કરોડના ફંડ ઓફ ફંડ્સ ૨.૦ જેવા પગલાઓએ સફળતાની પરંપરાગત વ્યાખ્યા બદલી નાખી છે. આજે યુવાન માત્ર સરકારી નોકરી જ નહીં, પરંતુ ફાઉન્ડર, ક્રિએટર અને ઉદ્યોગસાહસિક બનવાના સપના જોઈ રહ્યો છે. 'વિકસિત ભારત ૨૦૪૭' નો તેમનો વિઝન પીચ પણ આ જ યુવાનોને કેન્દ્રમાં રાખીને તૈયાર કરાયો છે. કોઈ ખોટા ઇન્ટરનેટ સ્લેંગ કે પરાણે ૨૦ વર્ષના દેખાવાનો પ્રયાસ કર્યા વગર, યુવાનો જે જોઈ રહ્યા છે, રમી રહ્યા છે અને બનવાની ઈચ્છા રાખે છે તેને સમજીને મોદીએ રાજકીય સંવાદની આખી રમત બદલી નાખી છે.