મુંબઈ : માયાનગરી મુંબઈની સડકો આજે એક ઐતિહાસિક રાજકીય ઘટનાની સાક્ષી બની હતી, જ્યાં લાંબા સમય પછી ઠાકરે બંધુઓ ઉદ્ધવ ઠાકરે અને રાજ ઠાકરે એક જ મંચ પરથી 'વિરાટ ગર્જના મોરચા' દ્વારા કેન્દ્ર સરકાર અને ચૂંટણી પંચ સામે રણશિંગું ફૂંક્યું હતું. સવારે ૧૧ વાગ્યે દક્ષિણ મુંબઈના મેટ્રો સિનેમાથી શરૂ થયેલી આ કૂચમાં પક્ષના કોઈ પણ ધ્વજ કે પાટીયા વગર હજારોની સંખ્યામાં લોકો જોડાયા હતા. આ મહામોરચો મુંબઈ મ્યુનિસિપલ કોર્પોરેશન (BMC) ના મુખ્ય મથક પહોંચીને એક જાહેરસભામાં ફેરવાઈ ગયો હતો, જ્યાં મહા વિકાસ આઘાડી (MVA) ના તમામ ઘટક પક્ષોના અગ્રણી નેતાઓએ ઉપસ્થિત રહીને વિરોધ પ્રદર્શનને મજબૂત સમર્થન આપ્યું હતું.

જાહેરસભાને સંબોધતા મહારાષ્ટ્ર નવનિર્માણ સેના (MNS) ના પ્રમુખ રાજ ઠાકરેએ ભાજપ અને ચૂંટણી પંચની કામગીરી સામે આકરા પ્રહારો કર્યા હતા. તેમણે ગંભીર આરોપ લગાવતા કહ્યું કે, "સુપ્રીમ કોર્ટ, હાઈકોર્ટ, ચૂંટણી પંચ અને દેશની ટેલિવિઝન ચેનલો પર સત્તાધારી પક્ષનો કબજો થઈ ચૂક્યો છે." લોકસભા અને મહારાષ્ટ્ર વિધાનસભા ચૂંટણીના પરિણામો સામે સવાલો ઉઠાવતા રાજે આશ્ચર્ય વ્યક્ત કર્યું હતું કે, "ઓછા મતદાન છતાં થોડા જ મહિનાઓમાં ભાજપનો વોટ શેર અચાનક કેવી રીતે વધી ગયો? આ કયું ગુપ્ત રહસ્ય છે?" તેમણે ઉમેર્યું હતું કે જનતાને ભાજપની સત્તા સામે વાંધો નથી, પરંતુ તે સત્તાના દુરુપયોગ સામે આક્રોશ છે અને દેશમાં કોની સરકાર બનશે તે જનતા નક્કી કરશે, નહીં કે કાગળ પર બેઠેલું ચૂંટણી પંચ.

બીજી તરફ, શિવસેના પ્રમુખ ઉદ્ધવ ઠાકરેએ પણ મુખ્ય ચૂંટણી કમિશનર જ્ઞાનેશ કુમાર અને કેન્દ્રીય ગૃહમંત્રી અમિત શાહ પર આકરાં ચબખાં માર્યા હતા. ઉદ્ધવે દાવો કર્યો હતો કે, મતદાર યાદીના ખાસ સઘન સુધારા (SIR) ના બહાને દેશભરમાંથી ૧૩ કરોડ અને મહારાષ્ટ્રના ૨ કરોડ સાચા મતદારોના નામો વ્યવસ્થિત રીતે કાઢી નાખવામાં આવ્યા છે, જે સીધી રીતે 'મત ચોરી' સમાન છે. આ લડાઈને દેશના 'બીજા સ્વતંત્રતા સંગ્રામ' તરીકે ઓળખાવતા તેમણે ચેતવણી આપી હતી કે 'મેક ઈન ઈન્ડિયા' ના આડમાં દેશમાં ચલાવવામાં આવતી કોઈ પણ સરમુખત્યારશાહીને સહેજ પણ સહન કરવામાં નહીં આવે. ઠાકરે બંધુઓના આ સંયુક્ત હુમલાથી મહારાષ્ટ્રના રાજકારણમાં ભારે ગરમાવો આવી ગયો છે.