નવી દિલ્હી : વડાપ્રધાન નરેન્દ્રભાઈ મોદીએ શનિવારે શ્રી રામ કોલેજ ઓફ કોમર્સના શતાબ્દી સમારોહમાં હાજરી આપીને એક પ્રભાવશાળી ભાષણ આપ્યું હતું. આ દરમિયાન તેમણે દેશના વૈચારિક વાતાવરણ અને આર્થિક વિકાસ અંગે ખુલીને વાત કરી અને દિમાગી નક્સલીઓ શબ્દનો ઉલ્લેખ કરીને કડક ચેતવણી ઉચ્ચારી હતી. તેમણે કહ્યું કે જે લોકો આ ખાસ એજન્ડાને પ્રોત્સાહન આપી રહ્યા છે, તેમને દેશની જનતા ખૂબ જ નજીકથી જોઈ રહી છે. આ ટિપ્પણીની સરખામણી હોમિયોપેથી દવા સાથે કરતા તેમણે સમજાવ્યું કે જે રીતે આવી દવાઓ શરૂઆતમાં રોગના લક્ષણોને વધુ સ્પષ્ટ કરે છે અને પછી સાજા કરે છે, તેવી જ રીતે તેમના આ શબ્દે પણ વિરોધીઓને ખુલ્લા પડવામાં મદદ કરી છે.

વડાપ્રધાન નરેન્દ્રભાઈ મોદીએ જણાવ્યું કે જેવું તેમણે આ હોમિયોપેથી જેવું નિવેદન આપ્યું, તરત જ તમામ દિમાગી નક્સલીઓ એક પછી એક બહાર આવવા લાગ્યા. હવે સામાન્ય જનતા પણ આ બીમારીને પ્રોત્સાહન આપનારાઓના અસલી રંગ અને અસલી ચહેરાને સ્પષ્ટપણે જોઈ રહી છે. નોંધનીય છે કે આ અગાઉ સ્વતંત્રતા દિવસના ભાષણ દરમિયાન પણ તેમણે આ શબ્દનો પ્રયોગ કર્યો હતો, જેના કારણે રાજકીય વર્તુળોમાં મોટો વિવાદ થયો હતો અને વિપક્ષે આકરા પ્રહારો કર્યા હતા. બાદમાં કેન્દ્રીય મંત્રી કિરેન રિજિજુએ સ્પષ્ટતા કરી હતી કે આ નિવેદન વિપક્ષી નેતાઓ માટે નહોતું, પરંતુ માઓવાદનું સમર્થન કરનારા અને બંધારણને નકારનારાઓ સામે હતું.

આ કાર્યક્રમમાં વડાપ્રધાન નરેન્દ્રભાઈ મોદીએ દેશની ઉત્સાહવર્ધક આર્થિક ઉપલબ્ધિઓ વિશે પણ વાત કરી હતી. તેમણે છેલ્લા સપ્તાહના સકારાત્મક વિકાસનો ઉલ્લેખ કરતા જણાવ્યું કે ત્રિમાસિક આર્થિક વૃદ્ધિ દર 7.8 ટકા નોંધાયો છે. આ ઉપરાંત જાપાનની એક એજન્સી દ્વારા ભારતની ક્રેડિટ રેટીંગમાં સુધારો કરવામાં આવ્યો છે. દેશમાં વીજ ઉત્પાદનમાં 9 ટકાનો વધારો થયો છે અને વાહનોનું કુલ વેચાણ 20 ટકા વધ્યું છે. જેમાં ટુ-વ્હીલરનું વેચાણ આશરે 20 ટકા અને થ્રી-વ્હીલરનું વેચાણ અંદાજે 30 ટકા સુધી વધ્યું છે જે ગ્રાહકોની મજબૂત માંગ દર્શાવે છે.

તેમણે દેશમાં વધી રહેલી વ્યાપારી પ્રવૃત્તિઓની પ્રશંસા કરતા કહ્યું કે 7.8 ટકાના આ વૃદ્ધિદરે દેશના આત્મવિશ્વાસને ખૂબ જ મજબૂત બનાવ્યો છે. અગાઉના સમયને યાદ કરતા તેમણે વિપક્ષ પર કટાક્ષ કર્યો કે જે લોકોએ ભૂતકાળમાં ભારતને ફ્રિઝાઇલ ફાઈવની સ્થિતિમાં ધકેલી દીધું હતું, તેમને આજની આ અદભુત આર્થિક આંકડાકીય માહિતી પચાવવામાં મુશ્કેલી પડી રહી છે. ભારત આજે દરેક ક્ષેત્રમાં અસાધારણ પ્રગતિ કરી રહ્યું છે અને દેશવાસીઓ આર્થિક સશક્તિકરણ તરફ આગળ વધી રહ્યા છે.