વોશિંગ્ટન: યુનાઇટેડ સ્ટેટ્સ ઓફ અમેરિકા (USA) ની આઝાદીની ૨૫૦મી વર્ષગાંઠ નિમિત્તે વોશિંગ્ટનના નેશનલ મોલ ખાતે આયોજિત 'સેલ્યુટ ટુ અમેરિકા' કાર્યક્રમમાં અમેરિકી પ્રમુખ ડોનાલ્ડ ટ્રમ્પે દેશભક્તિથી સભર અને રાજકીય રીતે અત્યંત આક્રમક ભાષણ આપ્યું હતું. ૪ જુલાઈના રોજ યોજાયેલા આ કાર્યક્રમની શરૂઆત પહેલાં જોરદાર પવન, વાવાઝોડું અને વીજળીના કડાકાને કારણે નેશનલ મોલ ખાલી કરાવવાની ફરજ પડી હતી અને કાર્યક્રમ થોડો મોડો શરૂ થયો હતો. જોકે, ડોનાલ્ડ ટ્રમ્પે સોશિયલ મીડિયા નેટવર્ક ટ્રુથ સોશિયલ પર "શો ચાલુ રહેશે — વરસાદ હોય કે તડકો" તેમ લખીને મક્કમતા દર્શાવી હતી. ત્યારબાદ મોટરકેડ સાથે ઘટનાસ્થળે પહોંચીને તેમણે "હું અહીં આવી ગયો છું!!!" તેમ જાહેર કરતાં જ એકત્રિત થયેલી મેદનીએ 'USA, USA' ના ગગનભેદી નારાઓ સાથે તેમનું સ્વાગત કર્યું હતું. આ પ્રસંગે સ્ટેજ પર તેમની સાથે ફર્સ્ટ લેડી શ્રીમતી મેલાનિયા ટ્રમ્પ પણ ઉપસ્થિત રહ્યા હતા.

ખરાબ હવામાન પણ ટ્રમ્પના ઉત્સાહને ડગાવી શક્યું નહીં:
ડોનાલ્ડ ટ્રમ્પે પોતાના સંબોધનની શરૂઆત જ હવામાનની ચર્ચાથી કરી હતી. પ્રતિકૂળ વાતાવરણ અને અગાઉ તંત્ર દ્વારા કરાયેલા ઇવેક્યુએશન (સ્થળાંતર) છતાં કાર્યક્રમમાં હાજર રહેલી જનમેદનીનો આભાર માનતાં તેમણે જણાવ્યું કે, "હું દરેકનો આભાર માનવા માંગું છું, કારણ કે તેમણે યોગ્ય નિર્ણય લીધો. તેમણે વીજળીના કડાકા જોયા અને મેં કહ્યું હતું કે જો મારે સવારના ૪ વાગ્યે કોઈ એક વ્યક્તિ સામે પણ ભાષણ આપવાનું હશે, તો પણ હું અહીં હાજર રહીશ. આપણને કોઈ રોકી શકે તેમ નથી." તેમણે ઉમેર્યું કે હવામાનને કારણે કેટલાક લોકોને જવું પડ્યું તેનું દુઃખ છે, પરંતુ આ સાંજ સદીઓ સુધી યાદ રહેશે. વીજળીના કડાકા વચ્ચે આ આયોજન વધુ અદભુત અને સુંદર બની ગયું છે.

*"સામ્યવાદ એ એક કેન્સર સમાન છે, તેને તાત્કાલિક કાપી નાખવો પડશે":*
પોતાના ભાષણમાં આગળ વધતા ટ્રમ્પે સામ્યવાદીઓ (કોમ્યુનિસ્ટો) પર આકરા પ્રહારો કર્યા હતા. તેમણે સ્પષ્ટ શબ્દોમાં જણાવ્યું કે, "આપણને આપણા દેશમાં સામ્યવાદીઓ જોઈતા નથી. તમે કાં તો સામ્યવાદી હોઈ શકો, અથવા તમે દેશભક્ત હોઈ શકો. તમે બંને એકસાથે ક્યારેય ન હોઈ શકો. જે લોકો આપણી ધરોહર વિશે માર્ક્સવાદી જુઠ્ઠાણું ફેલાવે છે અને આપણા બાળકોને એવું શીખવે છે કે આપણે ચોરાયેલી જમીન પર રહીએ છીએ અથવા આપણા નાયકો અત્યાચારી હતા, તેઓ આપણા ભૂતકાળની નિંદા કરવા કરતાં પણ વધુ ખરાબ કામ કરી રહ્યા છે. તેઓ આપણા ભવિષ્ય પર હુમલો કરી રહ્યા છે અને આપણે એવું ક્યારેય થવા દઈશું નહીં." સામ્યવાદને હારેલી વ્યવસ્થા ગણાવતા તેમણે ઉમેર્યું કે તે અમેરિકન સિસ્ટમથી તદ્દન વિપરીત છે અને તે ક્યારેય સફળ થઈ નથી. આ એક કેન્સર જેવું છે જેને શરૂઆતમાં જ ઝડપથી કાપી નાખવું પડશે. આ સાથે તેમણે બંધારણ હેઠળ મળેલા વાણી સ્વાતંત્ર્ય, ધાર્મિક સ્વાતંત્ર્ય અને સમાન ન્યાયના અધિકારોનો ઉલ્લેખ કરીને સામ્યવાદીઓ ક્યારેય ઇશ્વરના અસ્તિત્વનો સ્વીકાર નહીં કરે તેમ ઉમેર્યું હતું.

ચૂંટણી સુધારા માટે 'સેવ અમેરિકા એક્ટ' અને સૈન્ય સફળતાઓનો ઉલ્લેખ:
ડોનાલ્ડ ટ્રમ્પે ગર્વભેર જાહેરાત કરી હતી કે "અમેરિકન ડ્રીમ" હવે પાછું આવી ચૂક્યું છે. લશ્કર અને પોલીસ દળોમાં નવી ભરતીઓનો પૂર આવ્યો છે. દેશને મહાન રાખવા માટે તેમણે ચૂંટણી પ્રક્રિયામાં સુધારાની હિમાયત કરી હતી અને 'સેવ અમેરિકા એક્ટ' (SAVE America Act) નો ઉલ્લેખ કરતા જણાવ્યું કે, હવેથી તમામ મતદારોએ મતદાન મથકો પર નાગરિકત્વનો પુરાવો આપવો પડશે. બીમારી, અપંગતા, સૈન્ય તૈનાતી અથવા મુસાફરી સિવાય કોઈ મેઇલ-ઇન બેલોટ (પોસ્ટલ બેલેટ) સ્વીકારવામાં આવશે નહીં, જેથી ચૂંટણીમાં કોઈ છેતરપિંડી ન થઈ શકે. આ સિવાય તેમણે વેનેઝુએલામાં પૂર્વ પ્રમુખ નિકોલાસ માદુરોની અમેરિકી દળો દ્વારા ધરપકડ અને ઇરાની નૌકાદળ પરના હુમલા સહિતની આંતરરાષ્ટ્રીય સૈન્ય દરમિયાનગીરીઓનો પણ ઉલ્લેખ કર્યો હતો.

ઐતિહાસિક ધ્વજ પ્રદર્શિત કરી યુદ્ધના વાસ્તવિક નાયકોનું સન્માન કર્યું:
આઝાદીના ૨૫૦ વર્ષના પર્વ નિમિત્તે ટ્રમ્પે અમેરિકાના પ્રારંભિક સમયના ૧૩ તારાવાળા ઐતિહાસિક રાષ્ટ્રધ્વજ સ્ટેજ પર પ્રદર્શિત કર્યા હતા. જેમાં વર્ષ ૧૭૭૭ ના સરાટોગા યુદ્ધ અને ૧૭૮૧ ના યોર્કટાઉન યુદ્ધના ધ્વજ સામેલ હતા જ્યાં બ્રિટિશ આર્મીએ શરણાગતિ સ્વીકારી હતી. આ ઉપરાંત પ્રમુખ અબ્રાહમ લિંકનની શબપેટી પર લપેટાયેલો ધ્વજ, થિયોડોર રૂઝવેલ્ટને ક્યુબાથી પરત ફરતી વખતે અપાયેલો ધ્વજ અને પર્લ હાર્બર યુદ્ધ વખતે ડૂબેલા યુએસએસ એરિઝોના વહાણનો ધ્વજ પણ બતાવવામાં આવ્યો હતો, જેને તેમણે અમેરિકી અવજ્ઞા અને મક્કમતાનું પ્રતીક ગણાવ્યું હતું.
આ પ્રસંગે ટ્રમ્પે બીજા વિશ્વયુદ્ધ, કોરિયન યુદ્ધ અને વિયેતનામ યુદ્ધના વેટરન્સ (પૂર્વ સૈનિકો) ને સ્ટેજ પર બોલાવી સન્માનિત કર્યા હતા. જેમાં પર્લ હાર્બરના સાક્ષી રહેલા ૧૦૪ વર્ષીય નિવૃત્ત આર્મી કેપ્ટન કેન શુબ્રિંગ અને વિયેતનામ યુદ્ધના મેડલ ઓફ ઓનર વિજેતા નિવૃત્ત આર્મી કર્નલ પેરિસ ડી ડેવિસનું મેદનીએ તાળીઓના ગડગડાટથી સન્માન કર્યું હતું. આ સાથે ચંદ્રની આસપાસ સફર કરનાર આર્ટેમિસ-૨ મિશનના અવકાશયાત્રીઓ અને વર્ષ ૧૯૭૨ ના એપોલો-૧૭ મિશન હેઠળ ચંદ્ર પર ચાલનારા અંતિમ વ્યક્તિ જેક શ્મિટ પણ સ્ટેજ પર ટ્રમ્પ સાથે જોડાયા હતા.

ભવ્ય આતશબાજી અને વાય.એમ.સી.એ. ગીત સાથે સમાપન:
આશરે ૪૦ મિનિટના આ ઐતિહાસિક ભાષણના અંતે ટ્રમ્પે દેશના ભવિષ્ય તરફ જોતાં ટિપ્પણી કરી હતી કે, "આ તો અમેરિકાના સુવર્ણ યુગની માત્ર શરૂઆત છે અને દેશની નિયતિ ઇશ્વર દ્વારા લખવામાં આવી છે." પ્રમુખના સંબોધન બાદ વ્હાઇટ, બ્લુ અને રેડ કલરની ભવ્ય આતશબાજીથી વોશિંગ્ટનનું આકાશ ઝળહળી ઉઠ્યું હતું. આકાશમાં કુદરતી વીજળીના ચમકારા અને ફટાકડાના અદભુત સંગમ વચ્ચે લોકોએ આ ક્ષણોને પોતાના મોબાઇલમાં કેદ કરી હતી. અંતમાં ડોનાલ્ડ ટ્રમ્પના સૌથી મનપસંદ ગીત 'Y.M.C.A.' ના સંગીત સાથે આ ભવ્ય સ્વાતંત્ર્ય પર્વની ઉજવણી સંપન્ન થઈ હતી.