​નવી દિલ્હી / લખનૌ : ​ઉત્તર પ્રદેશમાં આગામી વિધાનસભા ચૂંટણીને આડે હવે ગણતરીના મહિનાઓ જ બાકી રહ્યા છે ત્યારે રાજધાની લખનૌનું રાજકીય તાપમાન પરાકાષ્ઠાએ પહોંચી ગયું છે. સમાજવાદી પાર્ટી (સપા)ના રાષ્ટ્રીય અધ્યક્ષ અને પૂર્વ મુખ્યમંત્રી અખિલેશ યાદવ તથા કૉકરોચ જનતા પાર્ટી (CJP)ના પદાધિકારી આશુતોષ રાંકા વચ્ચે યોજાયેલી ગુપ્ત બેઠકે રાજ્યના રાજકારણમાં ભારે ચર્ચા જગાડી છે. આ બેઠક બાદ હવે એવી જોરદાર અટકળો વહેતી થઈ છે કે શું CJP આગામી ઉત્તર પ્રદેશ ચૂંટણીમાં અખિલેશ યાદવ અને કોંગ્રેસના સમર્થનથી ચૂંટણી મેદાનમાં ઉતરશે?

​બંધબારણે 90 મિનિટ ચાલેલી બેઠક અને રાજકીય અટકળો

​મળતી માહિતી મુજબ, લખનૌમાં સમાજવાદી પાર્ટીના મુખ્યાલય નજીક આવેલ જનેશ્વર મિશ્ર ટ્રસ્ટના કાર્યાલય ખાતે અખિલેશ યાદવ અને આશુતોષ રાંકા વચ્ચે સાંજે ચાર વાગ્યાથી આશરે દોઢ કલાક સુધી બંધબારણે વાર્તાલાપ થયો હતો. મુલાકાત બાદ રાંકા મીડિયા સાથે વાત કર્યા વિના જ રવાના થઈ ગયા હતા. જોકે, બેઠક બાદ રાજકીય વર્તુળોમાં ચર્ચા શરૂ થઈ હતી કે જો સમાજવાદી પાર્ટી કે રાહુલ ગાંધી તરફથી સીજેપીને બેઠકો કે સમર્થન આપવામાં આવે તો શું પાર્ટી ચૂંટણી લડશે?

​CJP નેતાઓનો પ્રતિભાવ: 'ભવિષ્ય અંગે અત્યારે કંઈ કહેવું વહેલું ગણાશે'

​આ અંગે એક મુલાકાત દરમિયાન CJPના નેતાઓ સૌરભ દાસ અને રત્ના સિંહને પ્રશ્ન કરવામાં આવ્યો હતો કે જો સમાજવાદી પાર્ટી કે કોંગ્રેસ સમર્થન આપે તો શું તેઓ ચૂંટણી લડશે? આના જવાબમાં રત્ના સિંહે જણાવ્યું હતું કે, "ભવિષ્યમાં શું થશે તે અત્યારે કહી શકાય નહીં. હું વર્તમાનમાં જીવનારી વ્યક્તિ છું અને દરેક નિર્ણય તે જ દિવસે લઉં છું. આગામી સમયમાં હું ચૂંટણી લડીશ કે નહીં, અથવા સીજેપી સાથે શું કરી રહી હોઈશ તે અંગે અત્યારે કંઈ નક્કી નથી. હું હંમેશા મનનું ધાર્યું કરું છું."

​સમાજવાદી પાર્ટીની સ્પષ્ટતા

​સમાજવાદી પાર્ટીના પ્રવક્તા ફખરૂલ હસન ચાંદે આ મુલાકાત અંગે સ્પષ્ટતા કરતા જણાવ્યું હતું કે, "CJPના પ્રવક્તાએ અખિલેશ યાદવ સાથે મુલાકાત કરી હતી, પરંતુ તેનો હેતુ માત્ર આભાર વ્યક્ત કરવાનો હતો. જંતર-મંતર પર યોજાયેલા આંદોલનને સમાજવાદી પાર્ટીએ સમર્થન આપ્યું હતું અને ગૃહમાં પણ તે મુદ્દો ઉઠાવ્યો હતો. સપા CJPના અન્ય કોઈ રાજકીય નિર્ણયો પર ટિપ્પણી કરવા માંગતી નથી."

​યુપીના રાજકારણમાં શા માટે મહત્વની છે આ મુલાકાત?

​ઉત્તર પ્રદેશમાં ભાજપ સરકાર સામે સમાજવાદી પાર્ટી સતત બેરોજગારી, મોંઘવારી, શિક્ષણ અને પ્રાથમિક શાળાઓ બંધ થવા જેવા મુદ્દાઓ પર આક્રમક વલણ અપનાવી રહી છે. અખિલેશ યાદવે અગાઉ રાજસ્થાનમાં CJPના 'સ્કૂલ ઠીક કરો' અભિયાન દરમિયાન રાંકા પર થયેલા કથિત હુમલાનો મુદ્દો પણ જાહેર મંચ પરથી ઉઠાવ્યો હતો. સૂત્રોના જણાવ્યા અનુસાર, અખિલેશ યાદવ અને CJP વચ્ચેની આ બેઠકમાં વિદ્યાર્થીઓના પ્રશ્નો ઉપરાંત નવી પેઢી એટલે કે 'જેન ઝી' (Gen Z) અને 'જેન અલ્ફા'ની ચિંતાઓને લઈને પણ ગંભીર ચર્ચા થઈ હોવાની શક્યતા છે.

​NDAની ઓફર ફગાવી ચૂકી છે CJP

​અત્રે ઉલ્લેખનીય છે કે થોડા સમય પહેલાં જ કેન્દ્રીય મંત્રી રામદાસ આઠવલે દ્વારા CJPના સંસ્થાપક અભિજીત દીપકેને શાસક નેશનલ ડેમોક્રેટિક એલાયન્સ (NDA)માં જોડાવા માટે ઓફર આપવામાં આવી હતી. જોકે, અભિજીત દીપકેએ તે ઓફરને ફગાવી દઈ ભાજપ અને સાથી પક્ષોની મનશા સામે સવાલો ઊભા કર્યા હતા. બીજી તરફ, CJP દ્વારા પોતાની વિવિધ માગણીઓને લઈને દિલ્હીના સંસદ માર્ગ ખાતે વિરોધ પ્રદર્શન પણ ચાલુ રાખવામાં આવ્યું છે.