News of Monday, 16th November 2026
મનીલામાં PM મોદીનું ભવ્ય સ્વાગત: ભાંગડાની રમઝટ અને 'પૂર્ણ કુંભ શ્લોક' સાથે ભારતીય સમુદાયે વધાવ્યા
૨૩મા આસિયાન-ભારત અને ૨૧મા પૂર્વ એશિયા સમિટમાં ભાગ લેવા ફિલિપાઇન્સ પહોંચેલા વડાપ્રધાને ઐતિહાસિક 'લગુના તામ્રપત્ર શિલાલેખ' અને 'અગુસાનના સુવર્ણ તારા'ની પ્રતિકૃતિઓ નિહાળી બંને દેશોના સદીઓ જૂના સાંસ્કૃતિક સંબંધોને બિરદાવ્યા

મનીલા : વડાપ્રધાન નરેન્દ્ર મોદી ફિલિપાઇન્સના રાષ્ટ્રપતિ ફર્ડિનાન્ડ આર. માર્કોસ જુનિયરના ખાસ આમંત્રણ પર રાજધાની મનીલા પહોંચી ગયા છે, જ્યાં ત્યાં વસતા ભારતીય સમુદાય દ્વારા તેમનું અત્યંત ઉષ્માભર્યું અને ભવ્ય સ્વાગત કરવામાં આવ્યું હતું. સોશિયલ મીડિયા પ્લેટફોર્મ X પર આ મુલાકાતની તસવીરો અને ખુશી વ્યક્ત કરતા PM મોદીએ જણાવ્યું કે, વિદેશની ધરતી પર વસતો ભારતીય ડાયસ્પોરા માત્ર પોતાની સંસ્કૃતિ અને પરંપરાઓનું જ જતન નથી કરતો, પરંતુ ભારત અને ફિલિપાઇન્સને વધુ નજીક લાવવામાં એક મજબૂત સેતુની ભૂમિકા ભજવી રહ્યો છે. આ સ્વાગત સમારોહમાં બંને દેશોના બાળકોએ 'પૂર્ણ કુંભ શ્લોક'નું પઠન કરીને વાતાવરણને ભક્તિમય બનાવ્યું હતું અને ત્યારબાદ રંગબેરંગી બોલીવુડ નૃત્ય તેમજ જોશભર્યા ભાંગડા રજૂ કરીને સૌના દિલ જીતી લીધા હતા.
આ સાંસ્કૃતિક કાર્યક્રમ દરમિયાન વડાપ્રધાન મોદીએ બંને દેશોના ઐતિહાસિક વારસાની ઝલક દર્શાવતા 'અગુસાનના સુવર્ણ તારા' (Golden Tara of Agusan) અને ૯મી-૧૦મી સદીના અત્યંત મહત્વપૂર્ણ 'લગુના તામ્રપત્ર શિલાલેખ'ની પ્રતિકૃતિઓ પણ રસપૂર્વક નિહાળી હતી. તેમણે આ ઐતિહાસિક અવશેષોને ભારત અને ફિલિપાઇન્સ વચ્ચેના સદીઓ જૂના સંબંધોના જીવંત પ્રતીક ગણાવ્યા હતા. વડાપ્રધાને બાળકોની કલાની પ્રશંસા કરતા કહ્યું કે આ પ્રદર્શન બંને દેશો વચ્ચેના ગાઢ સાંસ્કૃતિક અને સભ્યતાગત જોડાણનું સુંદર ચિત્ર રજૂ કરે છે.
મનીલાની આ મુલાકાત દરમિયાન PM મોદી ૨૩મા આસિયાન-ભારત સમિટ (અને ૨૧મા પૂર્વ એશિયા સમિટમાં હાજરી આપશે. ફિલિપાઇન્સ રવાના થતા પહેલા આપેલા નિવેદનમાં વડાપ્રધાને સ્પષ્ટ કર્યું હતું કે આસિયાન દેશો સાથે ભારતના સંબંધો હવે વેપાર, માળખાગત જોડાણ, દરિયાઈ સુરક્ષા, ટેકનોલોજી અને લોકો-થી-લોકોના સંપર્ક સાથે એક 'વ્યાપક વ્યૂહાત્મક ભાગીદારી'માં પરિવર્તિત થયા છે. આ સમિટ દરમિયાન પ્રાદેશિક નેતાઓ સાથેની બેઠકોમાં આર્થિક વિકાસ, કનેક્ટિવિટી અને સહિયારી સમૃદ્ધિના લક્ષ્યોને નવી ઊંચાઈ પર લઈ જવા અંગે મહત્વપૂર્ણ ચર્ચાઓ કરવામાં આવશે.
(9:27 PM IST)









છેલ્લા 8 દિવસમાં સૌથી લોકપ્રિય 
