નવી દિલ્હી, તા. 23  : દેશભરમાં ઉનાળાએ પોતાનું રૌદ્ર સ્વરૂપ બતાવવાનું શરૂ કરી દીધું છે અને મેદાની વિસ્તારોમાં તાપમાન 40 ડિગ્રીને પાર પહોંચી ગયું છે. આવી કાળઝાળ ગરમીમાં જો તમે પરિવાર સાથે ઠંડક અને શાંતિની શોધમાં કોઈ સુંદર સ્થળે ફરવા જવાનું પ્લાનિંગ કરી રહ્યા છો, તો દેશમાં કેટલાક એવા હિલ સ્ટેશન છે જે હજુ પણ ભીડભાડથી દૂર અને પ્રાકૃતિક સૌંદર્યથી ભરપૂર છે. ઉત્તરાખંડનું ચોપતા અને કનાતાલ તેમજ આસામનું હાફલોંગ આ ઉનાળામાં તમારી ફેમિલી ટ્રિપ માટે બેસ્ટ ડેસ્ટિનેશન સાબિત થઈ શકે છે. 

ઉત્તરાખંડના રુદ્રપ્રયાગ જિલ્લામાં આવેલું ચોપતા સમુદ્ર સપાટીથી લગભગ 2,680 મીટરની ઊંચાઈ પર વસેલું છે. તેને ‘ભારતનું મિની સ્વિટ્ઝર્લેન્ડ’ પણ કહેવામાં આવે છે. અહીં મે-જૂન મહિનામાં પણ તાપમાન 10 થી 20 ડિગ્રીની વચ્ચે રહે છે. ચોપતાની ચારેબાજુ ગાઢ દેવદાર અને બુરાંશના જંગલો, લીલાછમ ઘાસના મેદાનો અને બરફથી ઢંકાયેલા હિમાલયના શિખરોનો નજારો મન મોહી લે છે. અહીંથી તુંગનાથ મંદિર અને ચંદ્રશિલા ટ્રેક કરી શકાય છે. તુંગનાથ વિશ્વનું સૌથી ઊંચાઈ પર આવેલું શિવ મંદિર છે. પરિવાર સાથે શાંત વાતાવરણમાં કેમ્પિંગ અને નેચર વોક માટે ચોપતા સૌથી ઉત્તમ સ્થળ છે. અહીં પહોંચવા માટે ઋષિકેશથી બસ કે ટેક્સી મળી રહે છે.

ઉત્તરાખંડમાં જ આવેલું કનાતાલ મસૂરી-ચંબા રોડ પર સ્થિત એક નાનું અને અત્યંત સુંદર હિલ સ્ટેશન છે. દેહરાદૂનથી માત્ર 78 કિલોમીટર દૂર આવેલું આ સ્થળ પ્રવાસીઓની ભીડથી હજુ અળગું છે. સફરજનના બગીચાઓ, ગાઢ જંગલો અને શાંત વાતાવરણ કનાતાલની ઓળખ છે. અહીંથી હિમાલયની પહાડીઓનો 360 ડિગ્રી વ્યૂ જોવા મળે છે. પરિવાર સાથે તમે અહીં સુરકંડા દેવી મંદિરના દર્શન કરી શકો છો, જે એક ટેકરી પર આવેલું છે અને ત્યાં પહોંચવા માટે રોપ-વેની સુવિધા પણ છે. કનાતાલમાં કેમ્પિંગ, જીપ લાઈન, વેલી ક્રોસિંગ જેવી એડવેન્ચર એક્ટિવિટી પણ થાય છે. ઓછા બજેટમાં ફેમિલી સાથે ક્વોલિટી ટાઈમ વિતાવવા માટે કનાતાલ પરફેક્ટ ચોઈસ છે. 

જો તમે ઉત્તર-પૂર્વ ભારતની સુંદરતા જોવા માંગતા હોવ તો આસામનું હાફલોંગ તમારા માટે શ્રેષ્ઠ વિકલ્પ છે. તે આસામનું એકમાત્ર હિલ સ્ટેશન છે અને તેને ‘લેન્ડ ઓફ બ્લુ હિલ્સ’ તરીકે પણ ઓળખવામાં આવે છે. સમુદ્ર સપાટીથી 966 મીટરની ઊંચાઈ પર આવેલું હાફલોંગ તેના સુંદર સરોવરો, લીલીછમ પહાડીઓ અને નારંગીના બગીચાઓ માટે પ્રખ્યાત છે. અહીં હાફલોંગ તળાવ, જટિંગા વેલી અને મૈબાંગ જેવા જોવાલાયક સ્થળો છે. જટિંગા વેલી પક્ષીઓના રહસ્યમય વર્તન માટે દુનિયાભરમાં જાણીતી છે. અહીંનું હવામાન આખું વર્ષ ખુશનુમા રહે છે અને ઉનાળામાં પણ તાપમાન 25 ડિગ્રીથી નીચે રહે છે. ગુવાહાટીથી હાફલોંગ ટ્રેન કે રોડ માર્ગે સરળતાથી પહોંચી શકાય છે. 

આ ત્રણેય સ્થળો મોટા હિલ સ્ટેશનો જેવા કે શિમલા, મનાલી કે નૈનીતાલની સરખામણીએ ઓછા ભીડવાળા અને શાંત છે. અહીં હોટલ અને હોમ-સ્ટે પણ વ્યાજબી ભાવે મળી રહે છે. તેથી જો તમે આ ઉનાળામાં પરિવાર સાથે ગરમીથી રાહત મેળવવા સાથે કુદરતને નજીકથી માણવા માંગતા હોવ તો ચોપતા, કનાતાલ અને હાફલોંગની મુલાકાત જરૂર લો.