ચેન્નઈ:  તમિલનાડુના રાજકારણમાં લાંબા સમયથી ચાલી રહેલી અટકળોનો અંત આવ્યો છે અને અભિનેતામાંથી નેતા બનેલા વિજયની પાર્ટી 'તમિલગા વેત્રી કઝગમ' (TVK) ને સરકાર બનાવવા માટે કોંગ્રેસનું સમર્થન મળી ગયું છે. કોંગ્રેસના હાઈકમાન્ડ અને તમિલનાડુ કોંગ્રેસ કમિટીની બેઠક બાદ સત્તાવાર રીતે વિજયને ટેકો આપવાની જાહેરાત કરવામાં આવી છે. રાજ્યમાં કુલ ૧૧૮ના બહુમતી આંકડા સામે વિજયની પાર્ટીને સરકાર રચવા માટે માત્ર ૧૦ બેઠકોની જરૂર હતી, જે હવે કોંગ્રેસના સમર્થનથી પૂરી થઈ ગઈ છે.

 કોંગ્રેસની શરત અને વિચારધારાનો સમન્વય:

ઓલ ઈન્ડિયા કોંગ્રેસ કમિટી (AICC) ના તમિલનાડુ પ્રભારી ગિરીશ ચોડણકરે એક પ્રેસ રિલીઝ દ્વારા જણાવ્યું હતું કે ટીવીકે અધ્યક્ષ વિજયે કોંગ્રેસ પાસે ઔપચારિક રીતે સમર્થન માંગ્યું હતું. કોંગ્રેસે યુવાઓના મિજાજ અને જનાદેશને માન આપીને 'પૂર્ણ સમર્થન' આપવાનો નિર્ણય કર્યો છે. જોકે, કોંગ્રેસે સ્પષ્ટ શરત મૂકી છે કે આ ગઠબંધનમાં એવી કોઈ પણ 'સાંપ્રદાયિક શક્તિ' ને સામેલ કરવામાં નહીં આવે જે ભારતના બંધારણમાં વિશ્વાસ ન ધરાવતી હોય. આ ગઠબંધન પેરીયાર, કામરાજ અને ડો. બી.આર. આંબેડકરના સામાજિક ન્યાયના આદર્શો પર આગળ વધશે.

 ભવિષ્યના ચૂંટણી જંગમાં પણ સાથે રહેશે:

કોંગ્રેસે સ્પષ્ટ કર્યું છે કે આ જોડાણ માત્ર સરકાર રચવા પૂરતું મર્યાદિત નથી, પરંતુ આગામી સ્થાનિક સ્વરાજની ચૂંટણીઓ, લોકસભા અને રાજ્યસભાની ચૂંટણીઓમાં પણ બંને પક્ષો સાથે મળીને કામ કરશે. દરમિયાન, કોંગ્રેસ નેતા માણિકમ ટાગોરે 'X' પર રાજેશ કુમારને તમિલનાડુમાં કોંગ્રેસ વિધાયક દળ (CLP) ના નેતા તરીકે ચૂંટાવા બદલ અભિનંદન પાઠવ્યા હતા અને તેમની નિષ્ઠાની પ્રશંસા કરી હતી.

 રાહુલ ગાંધી અને વિજયનો સંયુક્ત સંકલ્પ:

રાજકીય સૂત્રોના જણાવ્યા અનુસાર, રાહુલ ગાંધી અને વિજયે સંયુક્ત રીતે તમિલનાડુની જનતા અને ખાસ કરીને યુવાનોના સપના સાકાર કરવાનો સંકલ્પ લીધો છે. આ ઐતિહાસિક જનાદેશ બાદ હવે રાજ્યમાં નવી પેઢીના રાજકારણનો ઉદય થવા જઈ રહ્યો છે. વિજય હવે રાજ્યના આગામી મુખ્યમંત્રી બને તેવી તમામ તૈયારીઓ પૂર્ણ થઈ ગઈ છે, જેનાથી તમિલનાડુના રાજકીય સમીકરણો સંપૂર્ણપણે બદલાઈ ગયા છે. ગઠબંધનની જાહેરાત બાદ રાજ્યભરમાં ટીવીકે અને કોંગ્રેસના કાર્યકરોમાં ભારે ઉત્સાહ જોવા મળી રહ્યો છે.