નવી દિલ્હી : રાજ્યસભાના પુનઃ ચૂંટાયેલા અપક્ષ સાંસદ પરિમલભાઈ નથવાણીએ સંસદ ભવનના રાજ્યસભા ચેમ્બરમાં વિધિવત રીતે પદ અને ગોપનીયતાના શપથ ગ્રહણ કર્યા છે. રાજ્યસભાના અધ્યક્ષ સી પી રાધાકૃષ્ણને તેમને આ શપથ લેવડાવ્યા હતા.

આ ગૌરવપૂર્ણ ક્ષણ અંગે પરિમલભાઈએ સોશિયલ મીડિયા પર પોતાની ભાવનાઓ વ્યક્ત કરતા જણાવ્યું હતું કે, રાજ્યસભાના સાંસદ તરીકે ચોથી ટર્મ માટે અને પોતાની કર્મભૂમિ ઝારખંડનું પ્રતિનિધિત્વ કરવા માટે ત્રીજી વાર શપથ લેવા એ તેમના માટે અત્યંત ગૌરવપૂર્ણ ક્ષણ છે.

તેમણે વધુમાં ઉમેર્યું કે, આ જનાદેશ ઝારખંડ રાજ્યભરમાં મજબૂત ગ્રામીણ ઈન્ફ્રાસ્ટ્રક્ચર, આરોગ્ય સેવાઓ અને કૌશલ્ય વિકાસ (સ્કિલ ડેવલપમેન્ટ)ને વેગ આપવા માટેની તેમની પ્રતિબદ્ધતાને વધુ મજબૂત બનાવે છે. આ સન્માન બદલ તેમણે એનડીએ (NDA) નેતૃત્વ અને ઝારખંડની જનતાનો હૃદયપૂર્વક આભાર માન્યો હતો અને પોતાના સંદેશના અંતમાં ‘જોહાર ઝારખંડ’ લખીને રાજ્યના લોકો પ્રત્યે આદર વ્યક્ત કર્યો હતો.