ઇસ્લામાબાદ :  પાકિસ્તાનમાં આસમાને આંબી રહેલી કમરતોડ મોંઘવારી, મોંઘા ડાટ પેટ્રોલિયમ પદાર્થો અને વીજળી-ગેસના અસહ્ય બિલ સામે સામાન્ય જનતાનો આક્રોશ હવે જ્વાળામુખીની જેમ ફાટી નીકળ્યો છે. લાહોરના ઐતિહાસિક રસ્તાઓ પર હજારોની સંખ્યામાં મજૂર સંગઠનો, ઓટોરિક્ષા ચાલકો અને રેલ્વે કર્મચારીઓએ એકઠા થઈને સરકાર વિરૂદ્ધ ઉગ્ર વિરોધ પ્રદર્શન કર્યું હતું. હાથમાં પ્લેકાર્ડ્સ અને સરકાર વિરોધી સૂત્રોચ્ચાર સાથે પ્રદર્શનકારીઓએ શાસકો પર ગરીબ અને મધ્યમ વર્ગને આર્થિક કંગાળિયત તરફ ધકેલી દેવાનો સીધો આક્ષેપ કર્યો છે. મજૂર નેતાઓએ સ્પષ્ટ શબ્દોમાં કડક ચેતવણી આપી છે કે જો સરકારે આવશ્યક ચીજવસ્તુઓના ભાવમાં તાત્કાલિક ઘટાડો નહીં કર્યો, તો આ આંદોલન માત્ર લાહોર પૂરતું સીમિત નહીં રહે પરંતુ આખા પાકિસ્તાનને બાનમાં લેશે.

આ ભયાનક મોંઘવારીએ પાકિસ્તાનના શ્રમજીવી પરિવારોના કૌટુંબિક બજેટને સંપૂર્ણપણે વેરવિખેર કરી નાખ્યું છે, જેના કારણે લોકો માટે બે ટંકનું ભોજન મેળવવું પણ લોઢાના ચણા ચાવવા સમાન બન્યું છે. રેલીને સંબોધતા રાષ્ટ્રીય રિક્ષા યુનિયનના પ્રમુખ રાણા શમજાદે ઇંધણના ભાવવધારાને સખત શબ્દોમાં નકારી કાઢીને માગ કરી હતી કે પેટ્રોલ-ડીઝલના ભાવ યુદ્ધ પહેલાના સ્તરે પાછા લાવવામાં આવે. વિરોધ પ્રદર્શનમાં સામેલ રિક્ષાચાલક મોહમ્મદ જમીલે પોતાની હૃદયદ્રાવક વ્યથા ઠાલવતા કહ્યું કે, દિવસભર રસ્તા પર કાળી મજૂરી કરવા છતાં મર્યાદિત કમાણી અને મોંઘા ઇંધણને કારણે આજે લાખો પરિવારોને ભૂખ્યા પેટે સૂવાની નોબત આવી છે.

બીજી તરફ, રેલ્વે કર્મચારી યુનિયનના અગ્રણી ઇનાયત અલી ગુજ્જરે જણાવ્યું હતું કે, મોંઘવારીના કારણે લોકોની ખરીદ શક્તિ તળિયે બેસી ગઈ છે અને દેશનો કયો એવો વર્ગ છે જે આ આર્થિક દબાણથી પીડાતો નથી. પ્રદર્શનકારીઓએ સરકાર સમક્ષ પાયાની જરૂરિયાતો સસ્તી કરવાની સાથે સરકારી અને ખાનગી ક્ષેત્રના કર્મચારીઓના પગાર તેમજ પેન્શનમાં મોટો વધારો કરવાની સખત અપીલ કરી છે. અર્થતંત્રના મુખ્ય સ્તંભ સમાન મજૂરો અને વાહનચાલકોની આ આરપારની લડાઈએ પાકિસ્તાન સરકારની ઊંઘ હરામ કરી દીધી છે, કારણ કે જનતાનો આ રોષ ગમે ત્યારે સત્તાપલટો કરવા માટે સક્ષમ દેખાઈ રહ્યો છે.