સિંગાપોર, તા.૦૪: વિશ્વની શ્રેષ્ઠ એરલાઇન્સમાં જેની ગણના થાય છે તેવી સિંગાપોર એરલાઇન્સ (SIA) એ આજે વિમાન પ્રવાસને વધુ હાઈટેક બનાવવાની દિશામાં એક મોટી જાહેરાત કરી છે. સિંગાપોર એરલાઇન્સે એલન મસ્કની કંપની સ્પેસ-એક્સ (SpaceX) ના 'સ્ટારલિંક' (Starlink) સાથે હાથ મિલાવ્યા છે. આ કરાર મુજબ, ૨૦૨૭ના પ્રથમ ત્રિમાસિક ગાળાથી એરલાઇન્સના મુસાફરોને આકાશમાં હાઈ-સ્પીડ ઇન્ટરનેટની સુવિધા મળશે.
૧૦,૦૦૦ ફૂટની ઊંચાઈએ પણ મળશે સુપરફાસ્ટ સ્પીડ
સ્ટારલિંક તેના પૃથ્વીની નીચલી ભ્રમણકક્ષામાં (LEO) રહેલા ૧૦,૦૦૦ થી વધુ સેટેલાઇટ્સના નેટવર્કનો ઉપયોગ કરીને મલ્ટી-ગીગાબિટ બ્રોડબેન્ડ સ્પીડ આપશે. આનો અર્થ એ છે કે હવે મુસાફરો આંતરરાષ્ટ્રીય ફ્લાઈટ્સ દરમિયાન પણ કોઈપણ અડચણ વગર વીડિયો કોલ કરી શકશે, એચડી મૂવીઝ સ્ટ્રીમ કરી શકશે અને ઓનલાઇન ગેમિંગનો આનંદ માણી શકશે. કંપનીના જણાવ્યા અનુસાર, ૨૦૨૯ સુધીમાં તમામ એરબસ A350-900 અને A380 વિમાનોમાં આ સુવિધા ઉપલબ્ધ થઈ જશે.
બિઝનેસ અને ઇકોનોમી તમામ ક્લાસ માટે ખુશખબર
સિંગાપોર એરલાઇન્સે સ્પષ્ટ કર્યું છે કે તેમની હાલની 'અનલિમિટેડ કોમ્પ્લીમેન્ટરી Wi-Fi' પોલિસી સ્ટારલિંક કનેક્ટિવિટીવાળા વિમાનોમાં પણ ચાલુ રહેશે. એટલે કે સ્વીટ્સ, ફર્સ્ટ ક્લાસ અને બિઝનેસ ક્લાસના મુસાફરોની સાથે સાથે ક્રિસફ્લાયર (KrisFlyer) મેમ્બર્સ પણ પ્રીમિયમ ઇકોનોમી અને ઇકોનોમી ક્લાસમાં મફત હાઇ-સ્પીડ ઇન્ટરનેટનો ઉપયોગ કરી શકશે.
મુસાફરીનો અનુભવ બદલાઈ જશે
સિંગાપોર એરલાઇન્સના સિનિયર વાઇસ પ્રેસિડેન્ટ યો પી ટેકે જણાવ્યું હતું કે, "આજકાલ સીમલેસ કનેક્ટિવિટી એ પ્રવાસનો અનિવાર્ય ભાગ છે. સ્ટારલિંકની મદદથી અમે મુસાફરોને ટેક-ઓફથી લેન્ડિંગ સુધી અવિરત અને હાઈ-સ્પીડ અનુભવ આપી શકીશું." બીજી તરફ સ્ટારલિંકના વાઇસ પ્રેસિડેન્ટ જેસન ફ્રિચે પણ ખુશી વ્યક્ત કરતા કહ્યું કે, સ્ટારલિંક હવે બિઝનેસ અને લેઝર ટ્રાવેલર્સ માટે આકાશમાં ઇન્ટરનેટની વ્યાખ્યા બદલી નાખશે.
ડિજિટલ યુગમાં સિંગાપોર એરલાઇન્સનો આ માસ્ટરસ્ટ્રોક અન્ય એરલાઇન્સ માટે પણ નવા માપદંડો સ્થાપિત કરશે તે નક્કી છે. હવે લાંબા અંતરની ફ્લાઈટ્સમાં મુસાફરો માટે સમય પસાર કરવો માત્ર સરળ જ નહીં પણ વધુ પ્રોડક્ટિવ બનશે.