નવી દિલ્હી  :  વૈશ્વિક અર્થતંત્રમાં ભારત હવે માત્ર એક ગ્રાહક દેશ તરીકે નહીં, પરંતુ વિશ્વના સૌથી મોટા નિકાસકાર તરીકે ઉભરી રહ્યું છે. સંસદના રાજ્યસભા સત્ર દરમિયાન કેન્દ્ર સરકારે એક મોટો ખુલાસો કરતાં જણાવ્યું છે કે ભારત માત્ર અમેરિકા કે યુરોપિયન યુનિયન (EU) પર નિર્ભર નથી, પરંતુ વિશ્વના 10 અન્ય પ્રભાવશાળી દેશો અને આંતરરાષ્ટ્રીય બ્લોક્સ સાથે મુક્ત વેપાર કરારો (FTA) કરવા માટે વ્યાપક રણનીતિ પર કામ કરી રહ્યું છે. વાણિજ્ય અને ઉદ્યોગ રાજ્યમંત્રી જિતિન પ્રસાદે સ્પષ્ટ કર્યું કે મેડ ઇન ઇન્ડિયા ઉત્પાદનોને વિશ્વના ખૂણે-ખૂણે પહોંચાડવા માટે કેનેડા, ઇઝરાયલ, ચિલી, પેરુ, માલદીવ્સ અને યુરેશિયન ઇકોનોમિક યુનિયન સાથેની વાટાઘાટો હવે અંતિમ અને નિર્ણાયક તબક્કામાં પહોંચી ગઈ છે.

આ નવી ભાગીદારીઓ ઉપરાંત, ભારત તેના જૂના અને વિશ્વસનીય વેપાર ભાગીદારો સાથેના સંબંધોને પણ નવું રૂપ આપી રહ્યું છે. દક્ષિણ કોરિયા સાથેના 'CEPA' કરારને અપગ્રેડ કરવામાં આવી રહ્યો છે, શ્રીલંકા સાથે 'ETCA' પર વાટાઘાટો ફરી શરૂ થઈ છે અને ઓસ્ટ્રેલિયા સાથે 'CECA' નું નવું આધુનિક સ્વરૂપ તૈયાર થઈ રહ્યું છે. આ સિવાય, આસિયાન (ASEAN) દેશો સાથેના હાલના વેપાર કરારની સમીક્ષા કરીને ભારતીય વેપારીઓને વધુ અનુકૂળ બનાવવા માટે સુધારા થઈ રહ્યા છે. મંત્રીએ નોંધ્યું કે આ વર્ષની શરૂઆતમાં જ યુરોપિયન યુનિયન અને અમેરિકા સાથે મહત્વપૂર્ણ વચગાળાના માળખાકીય કરારો પર સંમતિ સાધી લેવામાં આવી હતી, જે ભારતના વૈશ્વિક વેપાર દ્રષ્ટિકોણને વધુ મજબૂત બનાવે છે.

આ કરારોનો સીધો અને મોટો ફાયદો દેશના સામાન્ય નાગરિકો, યુવાનો અને નાના નિકાસકારોને મળશે. ફ્રી ટ્રેડ એગ્રીમેન્ટ લાગુ થવાથી વિદેશોમાં ભારતીય માલસામાન પર લાગતો ભારે ટેક્સ નાબૂદ થશે, જેનાથી વિદેશી બજારમાં ભારતીય વસ્તુઓ સસ્તી અને વધુ સ્પર્ધાત્મક બનશે. વિશેષરૂપે કાપડ (Textile), ગારમેન્ટ્સ અને ચામડા (Leather) જેવા ક્ષેત્રોને સૌથી મોટો ફાયદો થશે, કારણ કે આ ક્ષેત્રો દેશમાં સૌથી વધુ રોજગારી પૂરી પાડે છે. વિદેશી ઓર્ડરમાં તીવ્ર વધારો થવાથી સ્થાનિક ફેક્ટરીઓનો ઉત્પાદન ક્ષમતામાં વધારો થશે, જે દેશમાં લાખો નવી નોકરીઓના સર્જન અને દેશવાસીઓની આવકમાં વધારો કરવા માટે કારગર સાબિત થશે.