​નવી દિલ્હી: દિગ્ગજ એફએમસીજી કંપની નેસ્લે ઈન્ડિયા (Nestle India) ફરી એકવાર ખાદ્ય સુરક્ષાના નિયમોના ઉલ્લંઘનને કારણે વિવાદમાં આવી છે. ભારતની સર્વોચ્ચ ખાદ્ય સુરક્ષા સંસ્થા 'ફૂડ સેફ્ટી એન્ડ સ્ટેન્ડર્ડ્સ ઓથોરિટી ઓફ ઈન્ડિયા' (FSSAI) એ જણાવ્યા અનુસાર, નવી દિલ્હીના કનોટ પ્લેસ સ્થિત 'ધ લલિત' હોટેલ (M/s Bharat Hotels Ltd.) ના પરિસરમાંથી લેવામાં આવેલું નેસ્લેના 'લો-ફેટ ડેરી વ્હાઈટનર' (Nestle Low Fat Dairy Whitener) નું સેમ્પલ તપાસ દરમિયાન અસુરક્ષિત (Unsafe) અને હલકી ગુણવત્તાવાળું (Substandard) મળી આવ્યું છે.

​સેમ્પલ ટેસ્ટિંગ અને FSSAIની કાર્યવાહી

FSSAI દ્વારા શેર કરવામાં આવેલી વિગતો અનુસાર, દિલ્હી સ્થિત હોટેલમાંથી આ સેમ્પલ એકત્ર કરીને ફૂડ એનાલિસ્ટ પાસે લેબોરેટરી તપાસ માટે મોકલવામાં આવ્યું હતું. લેબોરેટરી રિપોર્ટમાં આ પ્રોડક્ટ 'ફૂડ સેફ્ટી એન્ડ સ્ટેન્ડર્ડ્સ એક્ટ, 2006' (FSS Act, 2006) હેઠળ નક્કી કરવામાં આવેલા ગુણવત્તા અને સુરક્ષાના ધોરણો પર ખરી ઉતરી નથી.

​આ રિપોર્ટના આધારે FSSAI એ સંબંધિત સંસ્થાને નોટિસ પાઠવી છે અને આ ઓળખાયેલી અસુરક્ષિત પ્રોડક્ટના વેચાણ પર તાત્કાલિક ધોરણે રોક લગાવવાનો આદેશ આપ્યો છે. ઉપરાંત, કાયદાકીય પ્રક્રિયા મુજબ ઓપરેટરને નિયત સમયમર્યાદામાં ફૂડ એનાલિસ્ટના રિપોર્ટ સામે અપીલ કરવાનો વિકલ્પ પણ આપવામાં આવ્યો છે.

​નેસ્લે ઈન્ડિયાનો સ્પષ્ટતા અને સફાઈનો દાવો

આ બાબતે નેસ્લે ઈન્ડિયાના પ્રવક્તાએ કંપનીનો પક્ષ મૂકતાં જણાવ્યું છે કે તેમનું 'લો-ફેટ ડેરી વ્હાઈટનર' વાપરવા માટે સંપૂર્ણપણે સુરક્ષિત છે અને તે દેશના તમામ સરકારી નિયમોનું પાલન કરે છે.

​કંપનીએ સ્પષ્ટતા કરતા કહ્યું કે, "દૂધમાં સ્વાભાવિક રીતે જ ફોસ્ફરસ (Phosphorus) રહેલું હોય છે, જેના કારણે દૂધમાંથી બનતી પ્રોડક્ટ્સમાં પણ તેનું પ્રમાણ જોવા મળે છે. FSSAI ની લેબ તપાસમાં કુદરતી ફોસ્ફરસ અને ઉપરથી ઉમેરાતા (Added) ફોસ્ફરસ વચ્ચેનો તફાવત ધ્યાને લીધા વિના કુલ પ્રમાણ ગણવામાં આવ્યું હોય તેમ લાગે છે. ઉમેરવામાં આવતા ફોસ્ફરસની મર્યાદા બાબતે અમારી પ્રોડક્ટ FSSR ની નિર્ધારિત સીમાઓનું સંપૂર્ણ પાલન કરે છે." કંપનીએ વધુમાં જણાવ્યું કે તેઓ આ મુદ્દે સત્તાવાળાઓ સાથે સતત સંપર્કમાં છે અને જરૂરી ડેટા અને પુરાવા રજૂ કરી રહ્યા છે.

​અગાઉ પણ નેસ્લેની પ્રોડક્ટ્સ સ્કેનર હેઠળ

અત્રે નોંધનીય છે કે આ પહેલી વાર નથી જ્યારે નેસ્લે ઈન્ડિયા ગુણવત્તાના મુદ્દે FSSAI ના રડાર પર આવી હોય. તાજેતરમાં જ FSSAI એ નેસ્લેના બેબી ફૂડ પ્રોડક્ટ્સ (જેમ કે NAN Excella Pro Stage 1, Lactogen Pro 1) અને ઈ-કોમર્સ પ્લેટફોર્મ પર કરાતી પ્રોમોશનલ જાહેરાતોમાં ખાદ્ય સુરક્ષાના નિયમોના ભંગ બદલ કાનૂની કાર્યવાહી શરૂ કરી હતી.

​FSSAI ની આ તાજેતરની કડક કાર્યવાહી દર્શાવે છે કે દેશમાં પ્રોસેસ્ડ અને પેકેજ્ડ ફૂડની ગુણવત્તા જાળવવા માટે રેગ્યુલેટર દ્વારા હવે કડક નજર રાખવામાં આવી રહી છે.